Teerika 4 - WEN GBAŊKA

¹ Ni wom de, Izirali demma, sinsaŋŋa ate m boro a yaali ayen m sak ni la ale wie ŋaai ate ni a va la. Ni va ŋa ate ni vua ate ni jo tɛŋka po a tuesi ka, kaai ate Naawen dii ale ka ni kokpieŋsaŋa Wen la ale te ni la.

² Ni kan yaali wari a gum dii ate mi a weeni la po abe ni kan yeeri wari dii ate mi a weeni ni la po mɛ a basi alege ni tanla Naawen dii ale ka ni Wen la sinsaŋŋa ate mi a te ni la.

³ Ni nya kama ale nidek nina dii ate Naawen a nye Baal Peor la kama. Naawen dii ale ka ni Wen la a jam ko waai meena ale va Peor bɔglukku Baal la,

⁴ Alege nama baai meena ale chiib va Naawen dii ale ka ni Wen la a diem vua kama jinla.

⁵ Nya de m jam a sak ni wie ale sinsaga ase Naawen dii ale ka ni Wen la ale weeni mu diila, ayen tɛŋ kaai po ate nama a jo ni tuesi la ni va ŋa.

⁶ Ni kpesi a va ŋa nalimnyiini, ale ka dila ale ku sak ni yam ale miŋ chakka tɛŋsaŋa de jigi, waai meena ale wa wom wieŋa de meena la a yaa le weeni ayen, <>

⁷ Ka tɛŋ boa ale zuak a ta ka wena ate ŋa moata ba ase Naawen dii ale ka ti Wen la ale moata ti diipo meena ate tama a puusi a te wa?

⁸ Ka tɛŋ kana ale zuak a ta ŋmarisika ale buusa ase sinsaŋŋa de meena ate mi a pai a te ni jinla nna la?

⁹ Ni kpesi yik nidek, a moata chaab ate ni kan baŋ dii ate ni nya ale ni ninaŋa la yaase ni basi ate ŋa sati a nyini ni suiniimaŋa po a nyini ase ni le diem vua la. Ni pai ŋa a sak ni bisaŋa ale ni ŋaaŋsaŋa mɛ.

¹⁰ Ni teeri dai dii danni ate ni jam zaani Naawen dii ale ka ni Wen la niŋ Yoreb guuku zuk la diipo ate wa weeni mi ayen, <>

¹¹ Ni jam torisi moata kama ale za guuku zuk alege ate ku jam a nyaksi ase bolim la a jueli wenŋmazuk ale chiŋma sobta ate ku jam nye legi,

¹² Ate Naawen a yaa jam biisi bolimu po ale ni. Ni wom ka wieŋa nuemka alege ni an jam nya jaaboa ku jam ka lueluk nyiini.

¹³ Wa yaa weeni ni wa nɔiyeŋka, Wie Piika ŋaai ate wa weeni ni ayen ni va ŋa abe ni ŋmarisiŋa a dueni tintain paglaksa siye zuk.

¹⁴ Ate Naawen a yaa weeni mi dipo ayen m sak ni wa wieŋa ale sinsaŋŋa ate ni va ŋa tɛŋ kaai ate ni a yaali ni gaam Jodan benni a taam soaka la.

¹⁵ Ni an jam nya wari ya da dii danni ate Naawen a biisi ale ni bolimu po Yoreb guuku zuk la. Dila nyiŋla ni be kpesi nidek nalimnyiini,

¹⁶ dii ale ku nye ate ni kan taŋ nidek ale bɔgta, yaali ŋan mɛɛnta, baai ale a nye ase nidoa yaase nipok la.

¹⁷ Yaase duŋ tɛŋka po yaase nuim ale a yiri wenzuk la,

¹⁸ yaase ŋanta baai ale a cheŋ tɛŋka zuk la yaase ŋan baai ale bo nyaataŋa po la.

¹⁹ Ase ni dan zak nya chiŋmaaŋa po a nya wenbinni ale chiika ale chiŋmarisaŋa ale wenŋmazuk ŋantaŋa meena ni kan koori tɛŋ a zuli ŋan baai ate Naawen dii ale ka ni Wen la a pai te tɛŋ meena tɛŋzuk de la.

²⁰ Alege nama, Naawen a jam yeeri ni kama a ta ni nyini Ejipiti bolimu po a nyini ayen ni chim nuru baai ale ba soa wa ŋantaŋa la ase ni yaa le ka dii yɔgyɔgla de la.

²¹ Naawen sui ale jam puuri ale mu nama nyiŋ, ate wa yaa pɛ ayen m kan gaam Jodan benni a jo wenŋmazuk kuui ate Naawen dii ale ka ni Wen la a yaali wa te ni ate ni ta la.

²² M le kpi kama tɛŋka de po; m kan gaam Jodan benni a taamu, alege nama boro a yaali ni gaam kama abe le tuesi tɛŋ naliŋka.

²³ Ni be kpesi nidek ate ni kan baŋ Naawen dii ale ka ni Wen la ale nye nɔiyeŋ kaai ale ni la; ni kan nye bɔgta a te ni dega a ta va dii ate Naawen dii ale ka ni Wen la a kisi la.

²⁴ Ale Naawen dii ale ka ni Wen la a nye ase ka bolim buui ale dɛ la, wa ka Naawen dii ale a dɛ nyuri.

²⁵ Ku ŋaaŋnyiŋ ni yaa dan ta bisa ale ŋaaŋsa a bo tɛŋka po ate ku beni ate ni yaa taŋ nidek a basi a yaa se bɔgta, a nye biem Naawen dii ale ka ni Wen la nimbie po a nye ate wa sui a puuri,

²⁶ mi ale wi ka wenŋmazuk ale tɛŋ ate ba chim m seerɔba a ta va ni jigi ate daaŋa de po ate nama ale kpi nwuli tɛŋ kaai po ate nama a yaali ni gaam Jodan benni a taam a ta la. Ni kan bo dula a beni ni ale kpi kama.

²⁷ Naawen ale kati ni a waaŋ kama nuruma po, ka ni maga ale ni vuuk a bo tɛŋ sii ate Naawen a ta ni a cheŋ la.

²⁸ Dula jigini ni yaa ale kaab bɔgluk tii ate nuruba a pai nisa a nye ale daata ale tintana la, tii ale kaa nya yaase ti a wom yaase ti a dɛ yaase ti a wom nyum la.

²⁹ Alege a nyini dula ni gisi Naawen dii ale ka ni Wen la, ni ale nya wa ase ni ale a gisi wa ale ni suinum ale ni chiik meena.

³⁰ Ase ni dan bo watuasa po ate wieŋa de meena a nye ni ku kan beni ale ni ale tulim Naawen dii ale ka ni Wen la jigi a wom wa.

³¹ Naawen dii ale ka ni Wen la ka jiirim Wen. Wa kan zɛri ni yaase wa kaasi ni yaa wa baŋ nɔiyeŋka ate wa nye ale ni kokpieŋsaŋa kaai la.

³² Yɔgyɔgla de ni bek da ŋaai ale taam alege ate nama daaŋa a paari la wie. A nyini diipo ate Wen a nye nuru tɛŋka zuk la, ni bek jigi meena ase wa kpienni de choa a nye yaase wanni de choa ba wom di?

³³ Nuru yonta a wom Wen lueluk ale ku a biisi bolim po ale boro ase nama ale wom diila?

³⁴ Bɔgluk kuui a diem baga a tuesi tɛŋ a tara a ta va nyenyaka yaase wakperikaliisa yaase wakinkagla yaase zuaka ale nyeka ase wie ŋaai meena ate Naawen dii ale ka ni Wen la a nye ni nimbie po a te ni diipo ate ni jam bo Ejipiti po la?

³⁵ Ni jam nya wieŋa de kama ate ku basi ate ni seba ayen Naawen ka Wen; kan daa wala waai a ŋman karo.

³⁶ A nyini wenŋmazuk wa basi ate ni wom wa lueluku ayen wa namsi ni. Tɛŋzuk de sak ni wa bolim kpiemu ale ka diila kama, ate ni wom wa wieŋa bolimu po.

³⁷ Wa ale jam a yaali ni kokpieŋsaŋa ale lueri ba ŋaaŋbisaŋa la nyiŋ ate wa yaa ta ni a nyini Ejipiti po nyini ale wa pagrim kpiemu,

³⁸ ale yiak tɛŋ sii ale pagra a gaam ni la ate si nyini ale ta ni a jam ba tɛŋsaŋa po ayen ni tanla se ku ale ka dii jinla de la.

³⁹ Ni be seba, abe le basi ate ku bo ni suiniima po jinla danni ayen, Naawen ka Wen wenŋmazuk po ale tɛŋzuk de mɛ. Waai a ŋman karo.

⁴⁰ Ni be ta wa wieŋa ale wa sinsaŋŋa, ŋaai ate mi a te ni jinla de la, ate ku ale cheŋ nalimnyiini ale nama ale ni bisaŋa ate ku ŋaaŋnyiŋ ate ni ale goa tɛŋ kaai ate Naawen dii ale ka ni Wen la a pai a te ni la po a beni.

⁴¹ Ate Moosis a yaa lueri tɛŋsa sita Jodan benni kori geŋsa.

⁴² Kauk kuui ate waai a dan ko nuru abe wa chali a cheŋ ase wa dan kan ta waai ale wa a potim seba ale ko wa. Wa baga a chali a cheŋ tɛŋsaŋa de kanyi kama a vari wa nyuvunni a basi.

⁴³ Tɛŋ sila abe le nna: Bezer, Aruben dɔkku ale soa dula, Aramat ate ka bo Gilead la ate Gad demma soa la ale Golan ale bo Basan po la Manasa dɔkku mɛ ale soa dula.

⁴⁴ Sinsaŋŋa ale nna ate Moosis a weeni Izirali demma la.

⁴⁵ Sinsaŋŋa de ate Moosis a jam te ba diipo ate ba nyini Ejipiti po a nyini la

⁴⁶ ale diipo ate ba jam bo Bet Peor viaka po Jodan kori geŋka la, tɛŋ kaai ate ba a wi ayen Amori la, ate Siyon a jam chim ka naab la waai ale jam a nya Yesbon ate Moosis ale Izirali demma nak yik ba diipo ate ba jam nyini Ejipiti po a nyini la.

⁴⁷ Ba jam tuesi wa tɛŋka kama ale Basan Naawa Og tɛŋka, nalima ŋayewa ale jam bo Amori tɛŋsaŋa ale bo Jodan benni kori geŋsa la.

⁴⁸ Tɛŋka de a jam zaani ka Aroer a ga nye ban ale Arnon Buboalika a ta ga va Sirion guuku (Yermon ale la),

⁴⁹ a ga pai Araba ale bo Jodan benni kori geŋsa la meena a gum du a ta ga paari nyakpiemu ale bo Araba la a ta jueli tuak Pisga.