Teerika 33 - WEN GBAŊKA

¹ Niaka de Moosis Naawen nuruwa a biisi te Izirali demma alege kpi,

² Naawen a yaa jam Sinai guuku zuk; wa jam a yiti ase wenbinni ale bo Seir tɛŋka zuk diila a yaa jam a nyaksi diipo ate wa nuruma a jam bo Paran guuku zuk la. Maarɔba tusa pi ale jam bo ale wa, ate bolim ŋiak a jam bo wa juga nisaŋa po.

³ Naawen a yaali wa nuruma kama ale a kasi baai ate wa soa la. Dila nyiŋ ti a koori ka wa niŋ abe ti wom wa sinsaŋŋa.

⁴ Ti le va sinsaŋŋa ŋaai ate Moosis a te la, ti tɛŋka tuilum jaab a magsi ta ka.

⁵ Naawen a jam chim ka wa nuruma Izirali demma Naab diipo ate ba dɔkku ale niŋdeerɔma a jam tigsi chaab la.

⁶ Moosis a yaa jam weeni Aruben ayen, Aruben dɔkku a kan kpi meena, ba an soa diiya alege ba le boro.

⁷ Juda dɔkku mɛ wa weeni ayen, Naawen a wom ba kaarika abe wa maari ba; basi ate ba ta nɔiyeŋ ale buura m ŋala. Naawen, kpaliŋ a te ba.

⁸ Wa weeni Livai dɔkku ayen, Fi, Naawen pai dii ate fi a yaali la a sak ba a ta va Urim ale Tummim zuk fi tomteerɔwa waai ale ta siaka ale fu la. Fi jam nye ba kama a nya diipo ate ba jam bo Massaya la ale weeni ba fi wensieŋa Meriba nyiamu jigini.

⁹ Ba jam sak ba yaali kpieŋka ale fu kama a gaam ba nyam ale ba suata ale bisaŋa ate ba ta yaalika ale ba diila. Ba an jam zɛri fi wieŋa. Ba jam ta siaka ale fi nɔiyeŋka kama.

¹⁰ Ba le sak fi nuruma ate ba kan zɛri fi sinsaŋŋa; ba le nye kaabka fi yenni po a te fu.

¹¹ Naawen maari ba buuni po ate ba chim abe ba ta pagrim. Ta suipeentik ale dii meena ate ba a nye la. Ko ba dachaasaŋa meena kan basi ate ba ŋman yiti.

¹² Wa le weeni Benjamin dɔkku mɛ diila ale nna. Dɔkku de ka buui dii ate Naawen a yaali ale a kasi ba la; wa kasim a nya ba zuk ka dila daa meena ale kasim a bo ale ba mɛ.

¹³ Wa weeni Josefi dɔkku mɛ ayen, Naawen a niak ba tɛŋka ale ŋmoruk abe nyiam mɛ a bo tɛŋ a yɔk tɛŋka.

¹⁴ Basi ate kantueŋ a nak ba tɛŋka po ate ba tiisaŋa yɔnaŋa a bɛ. Diipo meena ba kasim a ta yɔn maŋsa.

¹⁵ Ba guutaŋa zuk a kasim a ta ka yɔna ŋaai ate ba a yaali la.

¹⁶ Ba tɛŋka a kasim a sueri ale ka ŋan maŋsa meena ale niaka a nyini Naawen jigi, waai ale jam bo bolimu ale a dɛ gɔnni po a biisi la. Niaka de abe jam Josefi dɔkku jigi dii nyiŋla wala ale niŋdeerɔ wa suataŋa zuk.

¹⁷ Josefi pagrimu a jam a nye ase ka lalik ale a kpa la ate wa pagra ase ka Ɛfraim dɔkku tugurik tɔŋdɔba tusa pi la, alege a nye ase Manasa dɔkku tugurik tɔŋdɔba tusa la.

¹⁸ Wa weeni Zebulun dɔkku ayen, Ni ta suipeentik ase nama ale a nyini peelim alege a weeni Isaka dɔkku ayen nama mɛ ale jigsi ni yeeŋa po.

¹⁹ Ba le wi nuruba ate ba jam guuku zuk ate ba nye kaab maŋ dula jigini. Ba le nya ba ŋanta ka nyakpiemu po ale tintain busuŋ bu po.

²⁰ Gad dɔkku mɛ wa weeni ba ayen, Pak Naawen waai ale nye ate Gad dɔkku a piisi la. Gad a bo dula kama ase gbeŋli la ayen wa kaasi.

²¹ Ba jam lueri ka tɛŋ kaai ale nala la a te badek, Niŋdeerɔma mɛ a jam nya ka tɛŋ maŋ a te ba dɔkku. Ba jam zuli Naawen kama a maari buuri yɔnaŋa.

²² Dan dɔkku mɛ wa weeni ba ayen, Fi ka gbeŋ paali; fi nyini ka Basan.

²³ Nafitali dɔkku wa weeni ba mɛ ayen, Naawen a niak fu kama ale wa jiirim maŋka; Ba tɛŋka paari Galili nyakpiemu kama.

²⁴ Asɛ dɔkku wa weeni ba ayen, Asɛ a nya niaka a gaam buura m ŋala meena kama. Wa nyeka abe masa a te wa suataŋa abe wa tɛŋka po kpaam tiisa a kasim a boro.

²⁵ Wa tɛŋka a nye ase ka kuta tuok ale lik la ate wa le kasim boro ale suiyɔgni.

²⁶ Wen a karo ase Izirali Wenni la, waai ale nyini wenŋmazuk a maari ni la.

²⁷ Wen ale kasim a maari ni; wa nisaŋa a kasim a maari ni kama. Wa ale yiak ni dachaasaŋa a basi, ni ale weeni ayen ni ko ba meena.

²⁸ Dila nyiŋ Jekob ŋaaŋbisa ni boro ale suiyɔgni wari a kan daani ni. Tɛŋka ka za ale damasik ale bo ka po, dula jigini maglim ale nyini chiŋmaaŋa po a lo tɛŋka.

²⁹ Izirali demma nya suipeentik kaai ate ni ta la! Waai a karo a nye ase nama la. Ni ka tɛŋ kaai ate Naawen a vari basi. Wadek ale ni kasidɔ ale ni maarɔ ale ni gebik a nya ni zuk. Ni dachaasaŋa ale jam a saalim ayen ni ta jiirim ale ba ate ni le ko ba.