Teerika 32 - WEN GBAŊKA

¹ Wom wenŋmazuk wa, mi a yaa m biisi kama; wom tɛŋŋa, wieŋa m nɔnni po.

² Basi ate m sinsaŋŋa a lo ase ŋmoruk, ale a ni la abe m wieŋa mɛ a siŋ ase maglim, ale a lo diila, ase ŋmoruk ale a ni wuuk paaluk zuk la. Ase ŋmoruk kpioŋ ale a ni ŋan bula zuk la.

³ M le mooli Naawen yuenni, ate wa nuruma a weeni wa zuaka ale ka diila.

⁴ Wa ka piuŋ wa tuimaŋa kaasuŋ a ka du wa suitaŋa a nye cheri. Naawen dii ale ta wensie la, waai ale kan nye wari a kaasi. Wa ka waai ale ta wayɔrisima ale nye a magsi.

⁵ Ba an nye dii ate wa a yaali ayen ba nye la; chivie a yik ba kama dii nyiŋla ba ŋman daa wa bisa. Ba ka wabaata nyam ale nuru baai ale kan ta wensie.

⁶ Ka ku le magsi ni nye Naawen diila ale la? Ni ka betta, nuru baai ale kan ta yammoa. Wa daa nama Ko ale ni Nyeerɔ? Daa wa ale nye ni a basi ate ni boro?

⁷ Ni teeri dila po wieŋa bena ŋaai ale taam la. Ni bek ni nyama ate ba weeni dii ale jam nye la. Ni bek nuru kpagsa ate ba weeni wieŋa a sak ni.

⁸ Wen Dii Ale Bo Wenŋmazuk La ale a te tɛŋsa ba le magsi ba soa juijui la; Wa le poori nuru bisa la, Wa te ba ka bana a magsi Izirali bisaŋa nɔi ale ka diila.

⁹ Naawen nuruma ka wa a le soa, Jekob ŋaaŋbisaŋa ka wadek ale soa.

¹⁰ Wa jam nya ba zuk kama diipo ate ba jam bo gɔnni po a ka jigi la. Wa jam a nya ba zuk kama ale ta jiirim ale ba ase wa le a nya wadek zuk diila.

¹¹ Ase jiiruk ale a sak ku bisa yiri ka dii ale chɔgsi si dii ale ku kinkaŋŋa ate si kan lo tɛŋ diila, Naawen mɛ a nya Izirali demma zuk ka dila ate ba kan lo.

¹² Naawen dek wa nyiini ale dɛ wa nuruma niŋ, wa jam kan yaali bɔgluk chaŋsa maarika.

¹³ Wa jam basi kama ate ni nya pagrim tɛŋsaŋa zuk. Ni tattaŋa mɛ a jam ta ŋandiinta. Olivi tiisaŋa mɛ a jam a chim tɛŋ kaai ale ta tintana la po, alege basi ate siita a bo pinaŋa po ate ni a dɛ.

¹⁴ Ba niiŋa ale ba booŋa a jam a te ba ka biisim nna yegayega; ba jam ta ka pa ŋaai ale bo ŋaai ale naa ŋaai ale chim duŋ maŋsa la. Ba jam maa ta ka za ale daam.

¹⁵ Naawen nuruma a jam jigsi kama alege ta tukpari; ba jam kasim a biik kama ba le ta ŋandiintaŋa la nyiŋ ate dila a nye ate ba baŋ ba Wenni, waai ale nye ba la wari ale zɛri ba Varibasidɔwa, waai ale ka Piuŋ la.

¹⁶ Ba bɔgtaŋa a jam basi kama ate Wen a dɛ nyuri alege ba biemu mɛ a nye ate wa sui a puuri.

¹⁷ Ba jam a kaab a te ka chichirik sii ale kan daa Wen yaa, bɔgluk tii ate badek a zɛ ti, bɔgluk chaŋsa tii ale boro daaŋa dɛ la tii ate ba koma an jam a chali ti yɔgsummoa.

¹⁸ Ba baŋ ba Wen dii ale ka Piuŋ la kama ba varibasidɔ kpioŋku waai ale te ba nyuvuri la.

¹⁹ Ase Naawen ale nya kude la wa sui a yaa puuri ate wa zɛri wa bisaŋa ale wa liema.

²⁰ Mi a kan ŋman a maari ni diipo diipo wa ale weeni diila a ni la m le nya dii ale ku nye tukpari nyama ale nuru baai ale kan ta siaka la.

²¹ Ba basi kama ate mi a dɛ nyuri ale jabuui ale kan daa wen ya. A basi ate m sui a puuri ale bɔgluk kayaata. M le basi ate baai ale kan daa nuruba a nye ate ba a dɛ nyuri. M le basi ate tɛŋ kaai ale kan ta miŋka la a nye ate ba sue a puuri.

²² M suipuurumu ale nye ase bolim la a dɛ jaab meena tɛŋka zuk bu le paari tɛŋka meena a dɛ jaab meena.

²³ M le ta kaasuŋ kuui ale ka maara kpeglim la a jam ba jigi abe m tɔŋ ba ale m peemaŋa.

²⁴ Ba le kpi ale kɔm ale nyiŋtui baata. Ba le kpi ale nyiŋtuila ŋaai ate ŋa wie a pagra la m le basi ate duŋ sii nyeka ale tua la a yik ba abe waapiisa mɛ a dom ba.

²⁵ Kpaliŋ ale ta kum a jam tɛŋka po. Zueba ale jo ni yeeŋa po a vari ni. Nidoabilisa ale nipokbilisa baai ale paala la ale kpi. Bi fiisa ale ŋankpagsa meena ale kpi.

²⁶ M weeni kama ayen m ti waaŋ ba kama ale yeeri ba nurubisa suŋsuŋ,

²⁷ alege mi chali ka dachaasaŋa suiniima nakka, ba kan miŋi a weeni ayen, ba nya ka pagrim, daa Naawen ale nye nnawa meena.

²⁸ Izirali tɛŋka demma ka baai ale kan ta popola; ba bola ka yam ale magadek mɛ la.

²⁹ Ba an miŋi jabuui nyiŋ ate ba nak a yik ba la; ba kan miŋ wa dii ale nye la.

³⁰ Ka boa ale soa ate nuru yeŋ a baga a nya pagrim nuruba tusidi zuwa yaase nuruba tusa ŋaye (2,000) a baga a nya pagrim tusa pi (10,000) zuwa? Ka ba Piuŋku a nin pai ba da, ka Naawen a nin pai ba a te.

³¹ Ba dachaasaŋa a seba kama ayen badek bɔgtaŋa a wobsa kama, ti an pagra ase Izirali Wenni la.

³² Ba dachaasaŋa a bie kama ase Sodom ale Gomora demma la alege a nye ase tiib sii yɔna ale tua ase choŋ la.

³³ Ba a nye ase ka daam ate ba pai waapiik sim a nyoro la.

³⁴ Naawen a teeri dii ate ba dachaasaŋa a nye ba la kama; wa a limisi kama ayen di danni a paari ate wa namsi ba.

³⁵ Ku ka mi wari ate m nye wari tuni baai ale a tom biem tuima la. M be le nye kama. Dai a cheena ate ba kan nya suik a nye ba le a yaali diila; ba ninammu daaŋa a moata kama.

³⁶ Naawen ale bo wa nuruma buusa. Wa le ta jiirim ale ba ase wa nin nya ale ba pagrimu a nueri ya, ate waai an tali ya, baai ale ka yɔm ale baai ale kan daa yɔm la.

³⁷ Ate Naawen a yaa le bek wa nuruma ayen,

³⁸ Ni jam kasim a kaab ti ale ka duŋ sii ale biik a ta kpaam mɛ la ale a te ti daam ate ti a nyu; ni basi ate ti jam maari ni yɔgyɔgla de ni basi ate ti chali a jam vari ni a basi.

³⁹ Mi dek nyiini ale Naawen. Wen yoŋ a ŋman karo a gum mi po. Mi ale a ko ale a te nyuvuri mɛ. Mi ale a te nuruba tuem mɛ abe le ŋmaa tebi ba mɛ ate waai a karo a zɛri dii ate mi a nye la.

⁴⁰ Ase mi ale ka Naawen dii ale vua la, mi zak ka m nisaŋa ale pɛ ayen,

⁴¹ m le saasi ka m gebika kaai ale a nyaksi la a nye dii ale magsi la. Mi ale nye a tuni m dachaasaŋa ale nye diila abe m namsi baai ale kisi mu la.

⁴² Mi peeŋa ale feri ba ziimu po abe m gebika mɛ ko baai meena ale a zɛri mu la, baai ale kɔni la ale baai ate ba yik lik likka diina po meena la ale kpi.

⁴³ Tɛŋsa ku a fɛ kama ayen ni pak Naawen ale wa nuruma. Wa nye tuni wa dachaasaŋa ale nye wa diila kama alege a vɔŋ wa nuruma biemu a te ba.>>

⁴⁴ Moosis ale Josua Nun biika a yaa pilim kariŋ yiini de a sak ba ate Izirali demma a wom di.

⁴⁵ Ase Moosis ale jam sak Naawen nuruma a ga nueri la,

⁴⁶ Wa weeni ayen, <

⁴⁷ Sinsaŋŋa de a daa sinsak koruta; ŋa ka ni nyuvooŋa. Ni va ŋa ate ni goa a beni tɛŋ kaai ate ni le lo Jodan benni jueli a bo ka po la.>>

⁴⁸ Da dila danni dek ate Naawen a weeni Moosis ayen,

⁴⁹ <

⁵⁰ Fi ale kpi ka guuk kula zuk ase fi suoku Aaron ale jam Yor Guuku zuk a kpi la,

⁵¹ dii nyiŋla ni nɔi niyema a jam ka siaka ale mi Izirali demma niŋŋa. Ni le jam Meriba nyaataŋa jigini ate ku moata Kades Zin gɔnni po la, ni an jam a nye mi ase waai ale ta tuilum la.

⁵² Fi le zaani ka niŋ a nya tɛŋka, alege fi kan jo tɛŋ kaai ate mi a yaa m pai te Izirali demma la.>>