Teerika 28 - WEN GBAŊKA

¹ <

² Niaka de meena ale jam ni jigi ase nama a nin wom Naawen dii ale ka ni Wen la nɔi.

³ Ni le nya niaka ni tɛŋ fiisaŋa po abe ni nya niaka tɛŋ kpieŋka dek po mɛ.

⁴ Ni le nya niaka ni bisaŋa zuk ale ni kpanni ŋantaŋa ale ni duŋsaŋa, naabisa ale pabisa.

⁵ Ni le nya niaka ni busisaŋa ale ni ŋandiintaŋa zuk.

⁶ Ni le nya niaka ni le a jo ale a nyini.

⁷ Naawen ale te suik ate ni nak yik ni dachaasaŋa meena. Ba le va ka suik yeoŋ a jam ni jigi alege ni le vi ba ate ba va suik boari a chali.

⁸ Naawen ale niak ni booŋa ale wa dii meena ate ni pai ni nisima a nye la. Naawen dii ale ka ni Wen la dek ale niak ni tɛŋ kaai po ate wa ayen wa te ni la.

⁹ Naawen ale nye ni ase wadek nuru weleŋsa la, ase wa le puulim ayen ni dan ta Naawen dii ale ka ni Wen la wieŋa ale a va wa suitaŋa mɛ la.

¹⁰ Ate nuruma meena tɛŋzuk de ale nya ayen ka Naawen ale wi ni ate dila ale basi ate ba a chali ni yɔgsum.

¹¹ Naawen ale niak ni ale bisa. Ni duŋsaŋa mɛ ale piisi abe ni ta ŋandiinta tɛŋka po ase wa le puulim dii ale ni kokpieŋsaŋa ayen wa te ni la.

¹² Naawen ale lagri wenŋmazukku ŋantaŋa ale bo dɔk kuui po la a basi ate ŋmoruk a ni ni tɛŋka po abe wa niak ni nisa tuima meena. Nama ale te tɛŋsa yegayega ŋanta alege a kan tuesi jaab tɛŋ sila jigi ya.

¹³ Naawen ale basi ate ni chim zuima ni kan chim juita. Ase nama a dan wom Naawen dii ale ka ni Wen la wieŋa nalimnyiini ŋaai ate mi a te ni jinla de la, nama ale kasim boka ŋmai ni kan siŋ tɛŋa.

¹⁴ Ni kan basi wie ŋaai ate mi a te ni jinla de la ŋaaŋ a ŋmani juga yaase gala a va bɔgluk yonta.

¹⁵ Alege, ni dan kan wom Naawen dii ale ka ni Wen la alege zɛri an va wa wieŋa ale wa ŋmarisika ate mi a te jinla de la nalimnyiini, kikaasaŋa de meena a cheen ka ni jigi.

¹⁶ Naawen ale ka te ni tɛŋ fiisaŋa po ale tɛŋ kpieŋsaŋa po.

¹⁷ Naawen ale ka te ni tattaŋa ale ŋandiin tii meena ate ni a nya la.

¹⁸ Naawen ale ka te ni ate ni kan biak bisa a soa dii ya, ni kan nya ŋandiinta ale niiga ale piisa a soa dii ya.

¹⁹ Ni dan bo dɔk Naawen ale ka te ni, ni dan nyini peelim wa le ka a te ni mɛ.

²⁰ Naawen ale basi ate kikaasa a jam ni jigi, butimka ale toariŋka ale jam ni jigi ni ale pai ni nisaŋa a tiri jabuui meena la a ta ga paari diipo ate wa le ko ni nama ale nye dii ale zɛri wa la nyiŋ.

²¹ Naawen ale basi ate nyiŋtuila a yik ni a ta ga paari diipo ate wa a yaali wa kaasi ni tɛŋ kaai po ate ni a boro la.

²² Naawen ale basi ate nyiŋtuila tɔgatɔga a yik ni. Nyiŋtuilaŋa ka nyiŋ toliŋka, ale piak, ale tuiluk, ale tɛŋ kosik, ale jenvaata tuem ale ŋanta kɔlika. Wieŋa de ale jam ni zuk ate ni kpi.

²³ Wenzukku ale chim kutuk mɔnuŋ a bo ni zuk abe tɛŋka a chim kutuk a bo ni naŋsa po.

²⁴ Ase wenni a dan ko ayen di ni, Naawen ale basi ate ku fuuri a ta nyuŋ a jam ni tɛŋka po. Ku le nyini ka chiŋmaaŋa po a jam alege ate ni kpi.

²⁵ Naawen ale ka te ni ate ni dachaasaŋa a nya pagrim ni zuk. Ni le va ka suik yeoŋ a jam ba jigi alege ni le va ka suik boari a chali, ate jigi meena tɛŋzuk a yaa le chali yɔgsum dii ale nye ni la.

²⁶ Ni nyiŋ lantaŋa ale chim ka ŋandiinta a te ŋan yirinta meena ale duŋsaŋa meena tɛŋzuk de ate waai a kan kpaliŋ ayen si ka a dɛ ni nyiŋsaŋa.

²⁷ Naawen ale basi ate nirisa a moari ni ase wa le jam nye Ejipiti demma diila. Wa le basi ate nira a nye ni nyiŋsaŋa meena abe wa nye ate ni nyiŋsaŋa a ŋarisi abe si a zak ate ni a ŋomisi alege ni kan nya nyiŋyɔgsa.

²⁸ Naawen ale basi ate ni chim yesiŋsa abe ni chim yeeba ate ni popolaŋa a ka tom tuima.

²⁹ Ni le tigsi chaab jigi yeŋ kantueŋ ase yeeba la ate ni kan nya suiku a cheŋŋi. Ni kan nya niaka ale dii meena ate ni a nye la. Ni le kasim a tu ka ninam abe ba a vari ni alege waai a kan maari ni.

³⁰ Ni le puulim kama a yaali ayen ni faari nipok alege ate nuru yoŋ a va kauk a goa le wa. Ni le sɛ yie alege kan goa ŋa po mɛ. Ni le kpa tatta alege ni kan dɛ ti yɔnaŋa.

³¹ Ba le togri ni niiŋa nidek nimbie po alege ni kan ŋɔbi ŋa. Ba le tuesi ni bonsaŋa ale fifiok ba kan ŋman pai si a te ni diipo diipo. Ni dachaasaŋa ale tuesi ni piisaŋa alege waai a kan tuesi ŋa a te ni.

³² Ba le pai ni nidoabilisaŋa ale ni liema a te tɛŋ yoŋ ate ni le yeeri ni ninaŋa a nya a yiili ayen ni le nya ba daa meena ni ale wobsa la nyiŋ ni kan nye wari ya.

³³ Nuru baai ate ni zɛ ba la ale ba dɛ ŋan baai ate ni namu nya ba ni tɛŋka po la ni kan ta jaaboa ka ninam nyiini daaŋa meena.

³⁴ Ninam buui ale bu jam ni jigi la ale basi kama ate ni a yesim.

³⁵ Naawen ale basi ate nirisa a moari ni dunaŋa ale ni naŋsaŋa ate ni nyiŋsaŋa a dom si kan maa nueri. Si le moari ka ni naŋsaŋa a ta jueli paari ni zuimaŋa.

³⁶ Naawen ale ta ni ale ni naawa a cheŋ ka tɛŋ kaai ate nama yaase ni koma a zɛ ka wie la po. Dula jigini nama ale kaabka bɔgluk yonta, tii ate ba pai daata ale tana a nye ti la.

³⁷ Tɛŋ sii po ate Naawen a yaali wa basi ate ni waaŋ si po la, ku le cha nuruma dii ale nye ni la nyiŋ abe ba nye ni a la.

³⁸ Ni le bori ka bie yega alege che maga, dii nyiŋla tintue ale dɛ ni ŋantaŋa.

³⁹ Ni le kpa tatta a che alege ni kan pai yɔnaŋa a nye damasik a nyu yaa ni tigsi yɔnaŋa, dii nyiŋla nanzue ale ŋa dɛ ŋa.

⁴⁰ Ni le ta kpaam tiisa ni tɛŋka meena po alege ni kan pai kpaamu a tom tuini, dii nyiŋla ŋa ni wiiri kama.

⁴¹ Ni le ta bisa ale lieba alege ni kan bo ale ba dii nyiŋla ba le cheŋ ka yɔntidi po.

⁴² Tintue ale piisi a jam dɛ tiisaŋa ale ni kpari ŋantaŋa meena ni tɛŋka po.

⁴³ Nichamma ale bo ni tɛŋka po ale ni la ale nya pagrim a gaam ni alege ate nama a jɔk ni pagrimu.

⁴⁴ Bala ale ta ligra a te ni alege nama a kan ta ligra a te ba. Bala ale chim zuk alege ate nama a chim juik.

⁴⁵ Kikaasaŋa de meena ale jam ni jigi. Ba le vi ni a kaasi ni, dii nyiŋla ni le kaa wom Naawen dii ale ka ni Wen la nɔi alege an va wa wieŋa ale wa ŋmarisika ate wa te ni la nyiŋ.

⁴⁶ Wieŋa de ale chim sakka ale wakinkagla a te nama ale ni ŋaaŋbisaŋa taam wuu.

⁴⁷ Ni le kan va Naawen dii ale ka ni Wen ale mariŋka ale suipeentik da ŋaai po ate ni nya niaka la nyiŋ,

⁴⁸ Dila nyiŋ nama ale ga tom a te ka dacha sii ate Naawen ayen wa pai ni a nyo ba nisa po la. Kɔm ale nyanyuila ale kasim ta ni, ni le nya jaŋsa nna yegayega ale chaboala mɛ. Ba le namsi ni ka nna yegayega a ta ga paari diipo ate wa le kaasi ni la.

⁴⁹ Naawen ale basi ate tɛŋ a nyini niŋniŋa a jam nye kpaliŋ ale ni, ba le nye ka nna nwuli ase jiiruk la ni kan miŋ tɛŋ kala biika mɛ,

⁵⁰ tɛŋ kaai ate ni dan nya ka nuruma abe yɔgsum a yik ni la, ba kan zuli ŋankpagsaŋa yaase ba ta jiirim ale bi paalukku.

⁵¹ Ba le ŋɔbi ni duŋsaŋa abe ba dɛ ni ŋandiintaŋa meena ate ni viiri a kpi. Ba kan tali zaa yaase damasik yaase kpaam yaase niiga ale piisa a te ni ate dila ale basi ate ni kpi.

⁵² Ba le nye kpaliŋ ale tɛŋ sii meena ale bo ni tɛŋka po la a ta ga paari diipo ate parik kaai ate ni ta sebchakka la a lo tɛŋ. Ba le tuesi tɛŋka meena ate Naawen dii ale ka ni Wen la a yaa wa pai te ni la.

⁵³ Ninammu ate ni dachaasaŋa a basi ate ni a namu la nyiŋ kɔm ale yik ni ate nama ale yik ni bisaŋa ate Naawen dii ale ka ni Wen la a te ni la a ŋɔbi.

⁵⁴ Waai ale a yik wadek ale ta yam a bo ni po la a kan poom ta jiirim ale wadek suok yaase wa pok waai ate wa a yaali nna yegayega la yaase wa bisaŋa,

⁵⁵ wa poom kan nye bisaŋa lammu ate wa bi sii ale diem tali a boro la kude meena ale nye kama dii nyiŋla ni dachaasaŋa ale basi ate ninammu de a jam ni jigi.

⁵⁶ Nipok waai ale a zuli wadek ale ta yam ni po la ale kan yaali wa poom pai naŋtuok a tabi tɛŋ la ale cheem ta chaab ale wa chorɔ waai ate wa a yaali la, ale bisaŋa ale wa liema.

⁵⁷ Wa le a biak waai ŋaaŋnyiŋ la ale zanni wa le suk a ŋɔbi dii nyiŋla, wa le kan ta jaab a dɛ la, ale ninam buui ate ni dachaasaŋa ale ta jam ni jigi ni tɛŋsaŋa po la.

⁵⁸ Ni dan kan kpesi a va sinsaŋŋa wieŋa meena, ŋaai ale ŋmarisi gbaŋka de po la, ale zɛri a kan zuli Naawen dii ale ka ni Wen la yuenni,

⁵⁹ Naawen ale basi ate kpazinagsuk wie a jam nama ale ŋaaŋbisaŋa zuk. Wa le basi ate kaasuŋ ale nyiŋtui pagrisa a jam ni jigi ate ku beni.

⁶⁰ Wa le basi ate nyiŋtuila ŋaai ale jam yik ni Ejipiti tɛŋka po la a jam ni jigi. Ŋa le bo ni jigi ka dila taam wuu.

⁶¹ Naawen ale basi ate nyiŋtuila ale tueta tɔgatɔga a yik ni, ŋaai ale kan maa ŋmarisi a bo sinsaŋŋa gbaŋka de po la a ta ga paari diipo ate ni le kpi la.

⁶² Nama baai ale piisi ase chiŋmarisaŋa ale bo chiŋmaaŋa po la ni magadega ale tali dii nyiŋla ni ale zɛri an va Naawen dii ale ka ni Wen la yaalika la nyiŋ.

⁶³ Ase ku le yɔk Naawen sui ate wa niak ni ale basi ate ni piisi a gum du la, ku le yɔk wa suinni ka dila dekdega ase wa nin kaasi ni. Ba le voori ni kama a ta nyini tɛŋ kaai po ate ni a jo ni tuesi la po.

⁶⁴ Ate Naawen ale basi ate ni waaŋ a bo tɛŋsaŋa meena po a nyini tɛŋka kpeglimka a ta ga paari kauk kunkula. Dula jigini ni yaa le kaab bɔgluk yonta, tii ate ba pai daata ale tana a nye ti la. Tii ate nama yaa ni koma a zɛ ti wie la.

⁶⁵ Tɛŋ sila po ni kan nya suiyɔgni, ni be kan ta jigi a vuusi. Naawen le basi ate ku a daani ni abe ni jɔk yiila ate ni sueŋa mɛ a kaasi.

⁶⁶ Ni le kasim ta ka yiila ni nyuvooŋa nyiŋ yok ale kantueŋ meena ni le kasim a tu ka daanika, ate ni le yɔgsa ba ni a yaali ba ko ni la nyiŋ.

⁶⁷ Ni kpaziim ale kasim a nak ate ni le kasim a chali yɔgsum ale wa dii meena ate ni a nya la. Saluik meena ni le kasim a yaali kama ayen ku chim junɔi abe junɔi meena ni kasim a yaali ayen ku chim saluik.

⁶⁸ Naawen ale ta ni ŋman cheŋ Ejipiti ale ŋaaruŋta. Wa le ta ni va suik kuui ate mi a weeni ayen ni kan ŋman nya ku. Ni le yaali ni pai nidek da te ni dachaasaŋa ase yɔm la alege waai a kan da ni.