Teerika 26 - WEN GBAŊKA

¹ Ni dan jo tɛŋ kaai ate Naawen dii ale ka ni Wen la a yaa wa pai te ni la po a ga kali nueri,

² ni pai ni ale kpa ŋan baai tɛŋ kaai po ate Naawen dii ale ka ni Wen la ayen wa te ni la, ŋan baai ale dɛ niŋ a bɛ la ni ta ba cheŋ juijui ate Naawen dii ale ka ni Wen la a lueri ayen ni a puusi wa la ale busisa a ga nye wa jiam.

³ Abe ni weeni kaabteerɔma ayen,

⁴ Ate kaabteerɔwa a yaa le tuesi busika fi nisimaŋa po a pai ka a zaani kuŋkuŋ kuui ate ba nye kaabka a te Naawen dii ale ka ni Wen la tɛŋ.

⁵ Ate ni yaa le weeni Naawen fi Wenni ayen,

⁶ Alege Ejipiti demma a jam ta ka gaasa ale ti a basi ate ti a nam ale basi ate ti a tom tuim pagra.

⁷ Ate tama a yaa jam kaari a te ti koma Naawen dii ale ka ti kokpieŋsaŋa Naawen la, ate Naawen a wom ti luelutaŋa ale nya tama ale a namu diila.

⁸ Naawen a yaa ta ti a nyini Ejipiti po a nyini ale wadek pagrim. Wa sui ale jam puuri ate wa nye wakperikaliisa ale wakinkagla ale kpazinagsuk wie.

⁹ Wa ta ti a jam ka dela a pai tɛŋka de a te ti. Tɛŋ kaai ate biisim ale siita a kasim bo ka po a chali.

¹⁰ Ate m yaa ta ŋan baai ate mi a kpa tɛŋka po ate fi te mu ate ba dɛ niŋ a bɛ la a jam ayen m te fi Naawen.> Pai busika a zaani Naawen dii ale ka ni Wen la niŋ, a koori tɛŋ wa niŋ a puusi wa.

¹¹ Nama ale Livaima ale nichamma yaa le ta suipeentik ale wamaŋ sii meena ate Naawen dii ale ka ni Wen la a nye te ni ale ni yeeŋa demma la nyiŋ.

¹² Bena ŋata po meena tuni fi kpanni ŋantaŋa piika po a te Livaima ale nichamma ale kpiŋsaŋa ale pukɔŋŋa ate dila ale basi ate jigi meena baai ale kan ta ŋanta a dɛ ŋandiinta a chak. Ase ni dan nye dila,

¹³ ni yaa weeni Naawen dii ale ka ni Wen la ayen,

¹⁴ Mi an dɛ ŋan baai ate m yeeri a magsi fi la diipo ate mi a kum la, mi abe m pai wanyi mɛ la diipo ate mi daŋ la. Mi abe m pai jaab a te kpio. Mi a wom fi nɔi kama Naawen dii ale ka mi Wen la, m nye dii meena ate fi a weeni ayen m nye la kama.

¹⁵ Nya ti a nyini wenŋmazuk fi tuilum jigini ate fi boro la abe fi basi ate niaka a nyini wenŋmazuk a jam fi nuruma Izirali demma jigi. Ase fi ale puulim dii ale ti koma ayen fi le te ba tɛŋ kaai ate biisim ale siita a bo ka po la.

¹⁶ Naawen dii ale ka ni Wen la a weeni ni kama jinla de ayen sinsaŋŋa de: Ni kpesi a va ŋa ale ni suiniima meena ale ni chiisa meena.

¹⁷ Nama a weeni kama jinla de ayen Naawen dii ale ka ni Wen la ale va wa suitaŋa kama abe ni va wa wieŋa ale wa sinsaŋŋa abe ni a wom wa le a weeni diila.

¹⁸ Naawen a weeni kama jinla dɛ ayen ni ka wa nuruba ale wa tuilum ŋanta ase wa le puulim dii ale ni la ale weeni ayen ni va wa wieŋa la.

¹⁹ Wa le basi ate ni gaam tɛŋsa meena ate wa nye la, ate ni nya yuei ale zula. Ni le chim ka nuru weleŋsa a te Naawen dii ale ka ni Wen la ase wa le puulim diila.