Teerika 24 - WEN GBAŊKA

¹ Ase nidoa a dan faari nipok ate ku ŋaaŋnyiŋ wa an ŋma a yaali wa dii nyiŋla wa nya ka wari wa jigi, ate wa yaa ŋmarisi gbaŋ a nyo wa nisa po a zɛri wa ayen wa nyini yenni po a nyini,

² wa dan ga basi yenni a ga nueri wa ŋma a chim ka nidoa yoŋ pok,

³ ate wa chorɔ waai ale saari bayewa la mɛ a dan ŋman ŋmarisi gbaŋ ayen ba basi chaab ale weeni wa ayen wa nyini yenni po a nyini yaase nidoawa a kpi.

⁴ Nidoa waai ale liŋ a zɛri nipowa la a ka suik a ŋma a faari wa dii nyiŋla nidoa yoŋ ale goa ale wa la nyiŋ. Dila ka kisuk Naawen nimbie po. Ni kan ta biem a jam tɛŋ kaai ate Naawen dii ale ni Wen la a yaa wa te ni la po.

⁵ Ase nidoa a dan piilim faari nipok ku kan magsi ayen wa cheŋ kpaliŋ po yaase ba tom wa jigiya. Ku a magsi wa wari ka yeri a nye ate nipowa waai ate wa faari la sui a yɔk.

⁶ Ase fi dan peem fi ligra a te nuru fi baga a tuesi wa jaab kama a ta dii ale ku nye ate wa tuni ligni a te fu abe wa tuesi wa jaamu la. Alege kan fi tuesi niri yaase ba nie ŋaye wa meena ni dan nye dila ba le kpi ale kɔm. Ba ta nieŋa a num ka zom a nye ŋandiinta.

⁷ Ase ni dan nya nuru ale wa yik wadek suok Izirali demma wanyi a nye wa ase yɔma la ni ko wa. Ni yeeri biem a ta nyini ni po a nyini.

⁸ Gama tuem a dan boro ni kpesi nidek a nye dii ate kaabteerɔma baai ale ka Livaima a weeni ni la. Ku a magsi kama ayen ni va mi ale weeni diila.

⁹ Ni a teeri dii ate Naawen dii ale ka ni Wen la a jam nye Miriam la diipo ate ni jam nyini Ejipiti po a nyini la.

¹⁰ Ase nama a dan peem jaab a te ni mabiik, ni kan cheŋ wa yenni a ga tuesi jabuui ate wa a yaali wa pai a te a puulim la.

¹¹ Limisi ate nuru waai ale dɛ fi pamini la dek a jam te fu.

¹² Ase nuruwa a dan ka jajak kan ga goa ale wa le puulim jaabuui la a tara.

¹³ Pai wa garukku a te wa, alege ate wen siŋ ate wa goa ku zuk ate wa te fi jiam ate ku nye ase wa maŋ la Naawen dii ale ka ni Wen la nina po.

¹⁴ Ni kaa vari ŋanjaksaŋa yaase baai ate ni pai ate ba a tom. Ku nyɔnɔwa a dan poom ka Izirali denɔ yaa wa ka nichaanɔ a bo ni tɛŋsaŋa kanyi po ni kan vari wa.

¹⁵ Ni tuni wa danni tutunaŋa ku le magsi ni tuni wa diila abe le ge ate wenni a siŋ. Wa ka jajak wa boro ka ŋanta bala nyiŋ. Kan daa di wa le kaari a te Naawen ate wa namsi ni biem bula nyiŋ.

¹⁶ Ko a kan kpi a te biiga biik mɛ abe ka suik a kpi ko nyiŋŋa. Waai meena a kpi ka wadek biem nyiŋ.

¹⁷ Ni be kan kasi nichamma ale kpiŋsaŋa ayen ba ka a nye ba yaalika, abe ni kan tuesi pukɔgi garuk a ta ayen wa dɛ pami nyiŋŋa.

¹⁸ Ni a teeri ayen ni daam ka yɔm Ejipiti tɛŋka po ate Naawen dii ale ka ni Wen la da tuesi ni a basi. Dila ale soa ate mi a weeni ayen ni a nye kude la.

¹⁹ Ase ni dan boro a che ni tattaŋa ŋantaŋa, ŋan baai ate ni gaam a basi la ni kan ŋman a cheŋ ba po. Ni basi bala ate nichamma ale kpiŋsaŋa ale pukɔŋŋa ate Naawen dii ale ka ni Wen la a niak ni nisima tuimaŋa meena.

²⁰ Ase ni dan zaŋ kpaam tiisaŋa yɔnaŋa ŋaai ale a wari naŋsaŋa nyiŋla ni basi ba a te nichamma ale kpiŋsaŋa ale pukɔŋŋa.

²¹ Ni dan gbesi ni kaduksaŋa yɔnaŋa, ŋaai ate ni gaam a taam la, ni kan ŋman cheŋ ŋa po. Ni basi ŋala ate nichamma ale kpiŋsaŋa ale pukɔŋŋa.

²² Ni be kan baŋ ni a le jam ka yɔm Ejipiti tɛŋka po la. Dila ale soa ate mi a weeni kude la.