Teerika 22 - WEN GBAŊKA

¹ Fi dan nya fi suok naab yaase wa posuk a cheŋ bɛ a jam fi jigi kan deri ta, ta cheŋ ga te waai ale soa jaamu la.

² Alege ku nyɔnɔwa a dan yalima ale fu yaase fi zɛ ku nyɔnɔwa, ta duŋka a kuli fi yenni ate ku nyɔnɔwa a dan jam abe fi te wa.

³ Nye dila dekdega a te fi suok kuui boniŋ yaase wa garuk ale bɛ la mɛ yaase jabuui meena ale bɛ jam fi jigi la. Kan fi peri jaamu.

⁴ Ase fi dan nya fi suok boniŋ yaase naab ale bu lo suik po kan gaam duŋka a taamu maari wa ate ni yik ka ate ka yiti zaani.

⁵ Nipok an magsi wa a jo nidoa kɔlima yaase nidoa a jo nipok kɔlima, dii nyiŋla Naawen dii ale ka ni Wen la a kisa dila kama.

⁶ Ase fi dan nya nuim tuk tiib zuk yaase ku doa tɛŋka ate jaamu a dan pobi wa bisaŋa ta doa yaase jaamu a doa jena zuk, kan yik jaamu ale wa bisaŋa meena.

⁷ Ni baga a yik bisaŋa kama alege basi ate ba mawa a cheŋ. Dila ale ku basi ate wie a nye a cheŋ nalimnyiini abe ni goa a beni.

⁸ Ase ni dan se dɔk paaluk, ni se parik a gilim gboŋku ate waai a dan nyini ku zuk a lo abe wari a kan daani ni.

⁹ Ni kan pai ŋanta baye a bori kaduk yeŋ po; ni dan nye dila daa jabuui ate fi a vuk fi kadukka po la nyiini ale a kaasi yɔnaŋa mɛ a kaasi kama.

¹⁰ Ni kan yik naab ale boniŋ a maŋ chaab a kpa.

¹¹ Ni kan pai ba le pai duŋsa kɔbta ale garuk miisa a gum chaab yɔk kɔlima ŋaai la a jo.

¹² Ni dan baali garuk ni basi ate ku ta zuesa ku noaŋa bunaansiwa.

¹³ Ase nuru a dan faari nipok a goa ale wa ku ŋaaŋnyiŋ a kan ŋma a yaali wa,

¹⁴ a yaa kisi wa ale te wa yue kaasuŋ, a weeni ayen, <>

¹⁵ Nipokbinni kowa ale wa mawa a yaa le weeni ayen wa jam ka waai ale kan seba nidoa a nya ya ate tɛŋka niŋdeerɔma a seba ku nɔi po.

¹⁶ Nipokbinni kowa ale weeni niŋdeerɔma ayen, <

¹⁷ Wa weeni ayen fi liewa ka waai ale poom seba nidoa la. Ate wa kowa yaa ale weeni ayen dii ale a sak ayen m liewa ka waai ale kan seba nidoa la ale nna. Liewa nyama yaa le lati garuk kuui ate wa duek ku zuk a goa la.>>

¹⁸ Ate niŋdeerɔma ale yik nuruwa de a namsi wa.

¹⁹ Ba le basi ate wa tuni ligra nna yegayega a te nipokbinni kowa, dii nyiŋla nuruwa a de a yaali ka yue kaasuŋ a te Izirali nipokbili dii ale kan seba nidoa la. Nipokbinni ale diem chim ka wa pok. Ase ba le ta nyuvuri a diem boro la wa ka suik a baga a zɛri wa.

²⁰ Ase nidoawa ale weeni diila a dan sum ka wensie ayen nipokbinni a seba nidoa a nya kama, alege wari a karo a sak ayen wa zɛ nidoa.

²¹ Ba ta wa a nyini wa kowa nansuiŋku nɔi ate tɛŋka nuruma a yuk wa ale tana a ko. Dii nyiŋla wa ta ka chivie a jam Izirali tɛŋka po. Wa jam diem boka wa kowa yenni po ale deri a goa ale nidoaba. Ni yeeri biemu de ni po a basi.

²² Ase ni dan yik nuru ale wa boro a goa ale nuru pok nidoawa ale nipowa baai ale goa ale chaab la ni ko ba meena. Ni yeeri biemu de Izirali tɛŋka po a basi.

²³ Ni be dan nya nuru ale wa zik nipokbili tɛŋka po waai ale a gomsi wa yali a goa ale wa,

²⁴ ku a magsi kama ayen ni ta ba nɔi bayema nyini peelim a yuk ale tana a ko. Ni ko nidoawa mɛ dii nyiŋla wa kaasi ka a waai pok. Ni yeeri biemu de ni po a basi.

²⁵ Alege nuru a dan zik nipokbili dii ale gomsi magsi ayen wa yali la gɔi po a fɛ a goa ale wa, nuru waai ale nye dila la ba ko wa.

²⁶ Ni kan nye nipokbinni wari ya, dii nyiŋla wa an nye biem a magsi ni ko wa. Kude a nye ase ka nuru ale nye kpaliŋ ale wa vaanchoa a ko wa diila.

²⁷ Nuruwa a nya nipokbinni ka gɔnni po, nipokbinni a kaari kama alege waai an moata ayen wa vari wa a basi.

²⁸ Ase nuru a dan zik nipokbili dii ale kan seba nidoa ale ka waai a gomsi ayen wa yali mɛ la a goa ale wa ate ni nya,

²⁹ ku a magsi nidoawa a tuni ka ligra a te nipokbinni kowa abe wa faari nipokbinni dii nyiŋla wa kaasi wa kama. Wa ka suik a zɛri wa diipo diipo.

³⁰ Nuru an magsi wa faari wa ko powa. Ku an magsi wa goa ale wa ko powa.