Teerika 2 - WEN GBAŊKA

¹ Ate ti yaa ŋmani ŋaaŋ a va gɔnni suiku ale a cheŋ Nyakpiem Mɔnuŋku la, a va Naawen ale dak mu la. Ti kasim cheŋ gilim tɛŋ kaai le bo guutaŋa zuk ti ba a wi ayen Seir la kama.

² Ate Naawen yaa weeni mi ayen,

³ <

⁴ Te nuruma wieŋa de,

⁵ Ni kan daani ba ale kpaliŋ ŋa, mi a kan pai ba tɛŋka kanyi mɛ la a te ni, ni poom kan pai ni naŋ a tabi du. Mi pai guuku zuk tɛŋka Seir a te ka Iisɔ ayen wa tanla.

⁶ Ku magsi kama ayen ni tuni ba kpana a magsi ŋandiintaŋa ate ni dɛ la ale nyiamu ate ni nyu la.> >>

⁷ Naawen dii ale ka ni Wen la a niak ni kama ni nisima tuima meena po. Wa nya ni chelimu zuk kama gɔi kpienni po. Bena pisinaansi wa de Naawen dii ale ka ni Wen la a kasim bo ale ni kama ate ni an jam a yaali jaaboa.

⁸ Ti yaa jam gaam ti suataŋa Iisɔ buuni, baai ale bo Seir tɛŋka la a taamu. Tama viriŋ kama a va Araba suiku, kuui ale nyini Elat ale Ezion Geber a ga va Moab gɔnni po la.

⁹ Ate Naawen a yaa weeni a sak mi ayen, <>

¹⁰ Emi demma a jam bo ka dula, ba jam ka nuru baai ale pagra ale piisi mɛ ale wɔŋa ase Anak demma la.

¹¹ Ase ba ale jam a nye ase Anak demma la, ba jam pai ba chim ka Arefa demma po, alege Moab demma a jam a wi ba ayen ka Emi dem.

¹² Yori demma ale jam bo Seir tɛŋka, alege Iisɔ buuni a jam yiak ba kama ate ba basi dula. Ba jam kaasi Yori demma kama alege kali dula ase Izirali demma ale nye dii tɛŋ kaai po ate Naawen a pai te ba la.

¹³ Ate Naawen a yaa weeni ayen, <> Ate ti yaa lo viak a jueli.

¹⁴ Bena pisita ale naaniŋ ale taam la, a zaani diipo ate ti basi Kades Barnea a jam paari diipo ate ti lo Zered Viaka jueli la, dila po gaŋ sii meena ale jam ka tugurik tɔŋdɔba la a kpi kama ase Naawen ale pɛ ayen wa le nye diila.

¹⁵ Naawen a jam ta ka chaab ale ba ate wa ga yeeri ba meena ba suŋsuŋ.

¹⁶ Ase tugurik tɔŋdɔma de ale jam kpi la,

¹⁷ Naawen a yaa weeni mi ayen,

¹⁸ <

¹⁹ Ase ni dan paari Ammon demma tɛŋka, ni ka m daani ba yaase ni daani ba ale kpaliŋ ŋa, ale mi a kan yaali ayen m pai Ammon tɛŋka jaab a te ni. Mi pai ka a te ka Lɔti ŋaaŋbisaŋa.>>

²⁰ Ba jam a wi dula jigini ayen ka Arefa demma tɛŋ, ba la ale jam bo dula, alege Ammon demma a jam a wi ba ayen ka Zamzum dem.

²¹ Ba jam ka nuru baai ale pagra ale piisi mɛ ale wɔŋa ase Anak demma la. Naawen a jam ko ba kama ate Ammon demma, baai ale jam yiak ba a bo ba boka jigini.

²² Wa a nye ka dila dek mɛ ate Iisɔ ŋaaŋbisaŋa baai ale bo Seir tɛŋka po la ase wa ale jam kaasi Yor demma ba nimbie po diila. Ba jam yiak ba kama alege bo ba tɛŋka po a ta jam paari jinla.

²³ Alege Avvi demma baai ale bo tɛŋ kpaŋsaŋa po a ga paari Gaza tɛŋka la, Kaftor demma a jam nyini ka Kaftor a kaasi ba alege bo ba boka jigini.

²⁴ Naawen a yaa weeni mi ayen, <

²⁵ Jinla danni m le basi ate tɛŋsa meena ale bo tɛŋzuk a chali ni yɔgsum. Ba ale wom le wie ate ba nyiŋsaŋa a gɔk ate ba ale yɔgsa ale ni.>>

²⁶ A nyini Kedemot gɔnni po m jam tom ka nuruba Yesbon Naawa Siyon jigi ale suiyɔgni ayen,

²⁷ <

²⁸ Ni pai ŋandiinta a da a te ti ate ti dɛ abe ni pai nyiam mɛ a te ti ate ti nyu abe ti tuni ni kpana. Ka ni tin basi ate ti cheŋ naŋta a taam.

²⁹ Ase Iisɔ ŋaaŋbisaŋa baai ale bo Seir la ale Moab demma baai ale bo Ar, ale jam nye dii a te ti suik ayen ti ga lo Jodan a jueli a cheŋ tɛŋ kaai ate Naawen dii ale ka ti Wen la a yaali ayen wa pai a te ti la.>>

³⁰ Alege Siyon Yesbon Naawa a zɛri an basi ate tama a taam ya. Dii nyiŋla la Naawen dii ale ka ni Wen la basi kama ate wa ta tukpari ale suinum pagrik ayen wa pai wa a nyo ni nisima po, ase wa ale nye dii yɔgyɔgla de la.

³¹ Naawen a yaa weeni mi ayen, <>

³² Ase Siyon ale wa tugurik tɔŋdɔma meena ale jam nyini ayen ba nye kpaliŋka Jayaz la,

³³ Naawen dii ale ka ti Wen la a pai wa nyo ka ti nisima po ate ti nak lɔnsi wa ale wa bisaŋa ale wa tugurik tɔŋdɔma meena tɛŋ.

³⁴ A nyini dila po ti tuesi ba tɛŋsaŋa kama ale ko nidoama ale nipooma ale ba bisaŋa meena. Ti an jam tali javuk wa.

³⁵ Alege ba duŋsaŋa ale ba ŋanmaŋsaŋa ti jam pai kama ba tɛŋka po a tara.

³⁶ A nyini Aroer ale bo Arnon benni la ale tɛŋ kaai ale bo benni jigini la a ta ga paari Gilead, tɛŋ yeŋ mɛ la a jam karo a pagra. Naawen dii ale ka ti Wen la a pai ba meena a te ti kama.

³⁷ Alege a magsi chaab ale Naawen dii ale ka ti Wen la sinsaŋŋa, ni an gaam a taam Ammon demma tɛŋka, yaase tɛŋ kaai ale bo Jabbok benni la yaase tɛŋ sii ale bo guutaŋa zuima la.