Teerika 17 - WEN GBAŊKA

¹ Ni kan nye kaabka a te Naawen dii ale ka ni Wen la ale naab buui yaase posuk kuui ale kɔni ya. Naawen a kisi dila kama.

² Ase nidoa yaase nipok a dan bo ni tɛŋsaŋa kanyi po, sii ate Naawen dii ale ka ni Wen la a yaa wa te ni la po ate ni dan nya ale wa nye biem Naawen dii ale ka ni Wen la nimbie po a zɛri nɔiyeŋka,

³ ale nye dii ale kan va m sinsaŋŋa la ale kaab bɔgta, a koori tɛŋ a puusi wenbinni yaase chiika yaase chiŋmarisaŋa,

⁴ ate ni dan ga miŋ dila, ni ŋmasi a gisi di po a nya dan ka wensie ayen kisukku de choa a sum nye kama Izirali tɛŋka po,

⁵ ni ta nidoawa de yaase nipowa de waai ale nye biemu de la a cheŋ tɛŋka nansuiŋku nɔi peelim a yuk ku nyɔnɔwa ale tintana a ko.

⁶ Nuruba dan paari baye yaa bata a weeni ayen wanni ka wensie ku a magsi kama ayen ba ko nuru wala, alege ku an magsi ni ko waai ya ase nin ka nuru yeŋ nyiini ale weeni ayen wanni ka wensie.

⁷ Baai ale weeni ayen wanni ka wensie la ale magsi ba dɛ niŋ a yuk nuruwa ale tintana abe ba ge suik ate waai meena a yuk wa a ko. Ku a magsi kama ayen ni basi ate biemu de a nyini ni po a nyini.

⁸ Ase ba dan ta biik a jam buusa boka yenni ate ka pagra ate nama a bo biika buusa. Ase ba dan ko nuru a yaase tɛŋ nyiŋ ate ba ta chaab yaase ba kpaliŋ chaab ni ta ba a cheŋ juijui ate Naawen dii ale ka ni Wen la a lueri ayen ni a puusi wa la.

⁹ Ni cheŋ kaabteerɔma jigi baai ale ka Livaima la jigi ate boteerɔwa waai ale bo dɔkku po la a yaa nya biika zuk.

¹⁰ Ku a fɛ kama ate ni nye a ta va chaab ale ba ale zɔk dii a weeni ayen Naawen ale lueri juijui ayen ni a puusi wa la.

¹¹ Ni nye a ta va chaab ale sinsaŋŋa ate ba sagni la ale ba ale a poli diila.

¹² Nuru waai ale a zɛri boteerɔ waai yaase kaabteerɔ waai ale za a tom a te Naawen dii ale ka ni Wen la a magsi ba ko wa kama. Dila ale ku basi ate ni yeeri biem Izirali tɛŋka po a basi.

¹³ Nuruma meena ale wom ate ba a chali yɔgsum, ate waai a kan ŋman nye wa dila choa.

¹⁴ Ase ni yaa dan jo tɛŋ kaai ate Naawen dii ale ka ni Wen la a yaa wa pai te ni la a tuesi nueri a yaa kala ka po, ate ni yaa weeni ayen, <>

¹⁵ Ni be lueri naab waai ate Naawen dii ale ka ni Wen la a lueri la. Wa magsi wa nyini ka nidek suataŋa po. Ni kan basi ate nichaanɔ a nya ni zuwa.

¹⁶ Naawa an magsi ayen wa yaali naa wusum boari a te wa tugurik tɔŋdɔma, wa be kan tom nuruba mɛ ate ba cheŋ Ejipiti tɛŋka a da naa wusuma. Dii nyiŋla Naawen a weeni kama ayen wa nuruma a kan ŋman cheŋ Ejipiti tɛŋka.

¹⁷ Wa be kan faari nipok boari ya. Wa dan nye dila wa suinummu a kan ŋman bo ale Naawen yaa. Wa be kan tuesi kpana ale ligmɔniŋ yegayega mɛ.

¹⁸ Ase wa yaa a dan chim naab a ga nueri, ku magsi kama ayen wa ta Naawen sinsaŋŋa gbaŋka kanyi piilimka po sinsaŋŋa ate kaabteerɔma baai ale ka Livaima a ŋmarisi la.

¹⁹ Ku a magsi ka kasim a bo ale wa kama ate wa kasim a kariŋ ka diipo meena ate wa diem vua la dii ale ku nye ate wa a zuli Naawen dii ale ka wa Wen la abe wa a va wa wieŋa nalimnyiini la,

²⁰ abe wa kan wa a nya wadek ase wa zunchoŋŋa ka waai la abe wa kan viriŋ wa gala yaase wa juga ate wa ale wa buuni po ale kasim a dɛ naam Izirali tɛŋka po ate ku beni.