Teerika 14 - WEN GBAŊKA

¹ Nama ka Naawen dii ale ka ni Wen la bisa. Ni kan chiiri ni tɛŋsaŋa yaase ni che ni zuimaŋa kpieba nyiŋŋa,

² ale nama ka nuru weleŋsa a te Naawen dii ale ka ni Wen la. A ta nyini nuruba meena po tɛŋka de zuk, Naawen a lueri ka nama ayen ni chim wa nuruba.

³ Ni kan dɛ jabuui ate Naawen a weeni ayen wa an welema la.

⁴ Duŋsaŋa de ale magsi ayen ni a ŋɔbi, naab ale posuk ale buuk

⁵ ale sebik ale walik ale yisik ale nɔŋ ale kab.

⁶ Ni baga a ŋɔbi duŋ sii meena ale ta naŋsaba ŋaai ale poori alege a ŋɔbi a guli la kama.

⁷ Ni kan ni ŋɔbi duŋ yonsa. Ni a ŋɔbi sii ale ta naŋsaba ate ŋa poori ale a ŋɔbi a guli la nyiini. Ni kaa ŋɔbi laalaakomi ale suem ale siseri ya. Duŋsaŋa de a ŋɔbi a guli kama alege si ka naŋsaba; si ka duŋ daŋtisa a te ni.

⁸ Deri mɛ daŋ kama; di ta naŋsaba ate ŋa poori alege di kan ŋɔbi a guli. Ni kaa ŋɔbi di lammu yaase ni tiri deri dii ale kpi la.

⁹ Ŋan baai meena ale bo nyiam po a ta pie ale pagta la ni baga a ŋɔbi kama.

¹⁰ Alege jabuui ale kan ta pie ale pagta la ni kan ŋɔbi ba ale ba ka ŋan baai ale daŋ la.

¹¹ Ni baga a ŋɔbi ja yirim buui ale nala la kama.

¹² Alege ŋantaŋa de ni kan ŋɔbi, jiiruk ale duiŋ ale duiŋ sobluk ale

¹³ duiŋ ale kpaliŋchiak mɔnuŋ buuri meena ale

¹⁴ tagaaruk buuri meena ale

¹⁵ poinaab ale viuk kuui ale a nye ase ku ta nyiila la ale jumyigrik ale kpaliŋ buuri meena,

¹⁶ ale viuk fiik ale viuk kpioŋ ale viuk peeluk ale

¹⁷ gɔi viuk ale takaribayauk ale amaavak ale

¹⁸ jumbaliiruk ale jumyigrik ale chiintain ale jinjaanuŋ.

¹⁹ Ŋan yirin tii ale a nye ase nanjuŋsa la daŋ kama ni kan ŋɔbi ba.

²⁰ Alege jabuui meena ale ta kinkaŋŋa ale nala la ni a ŋɔbi.

²¹ Ni kan ŋɔbi ja kpiuwa. Ni baga a pai ja kpiuku a te nichamma ale bo ni tɛŋsaŋa po la kama ate bala a ŋɔbi yaase nama baga a pai ja kpiuku kama a da a te nichamma. Nama ka nuru weleŋsa Naawen dii ale ka ni Wen la jigi. Ni be kan dik buli ale ku ma biisimɔ.

²² Ni teeri ate ni poori benni po ate ni kpa nya ŋan baai ni talitaŋa po la piika a zaani nakpiak.

²³ Ni dɛ ni kpanni ŋantaŋa piika po, da paalimu ale kpaamu ale ni duŋsaŋa ale dɛ niŋ a biak biik sii la Naawen dii ale ka ni Wen la niŋ kauk kuui ate wa lueri a te ni ayen ni boro wa yuenni nyiŋla. Dila ale ku basi ate ni a va Naawen dii ale ka ni Wen la nalimnyiini.

²⁴ Alege dula jigini a dan yalima, ase Naawen dii ale ka ni Wen la ale niak ni la, ni dan kan baga a ji ni piika a ta a cheŋ dula dii nyiŋla Naawen dii ale ka ni Wen la ale a yaali wa lueri juijui la ale yalima la nyiŋ,

²⁵ ni be pai ni ŋantaŋa da a ta ligraŋa a cheŋ kauk kuui ate Naawen dii ale ka ni Wen la ale te ni la.

²⁶ Ni pai ligraŋa a da jabuui ate ni a yaali la: ni da ase ka niiga, piisa ale daam ale da buui ale kum la ale ŋan baai ate nama a yaali la. Nama ale ni yeeŋa demma a dɛ Naawen dii ale ka ni Wen la niŋ ale suipeentik.

²⁷ Ni be kan baŋ Livaima ale bo ni tɛŋka po la wari ya, ale ba ka badek tɛŋa yaase jaaboa.

²⁸ Bena ŋata meena kpeglim ka po, ni piisaŋa meena ate ni kpa nya la ni ta jam dueni ni tɛŋsaŋa po,

²⁹ dii ale ku basi ate Livaima (baai ale kan ta badek tɛŋ yaase badek jaab la) ale nichamma ale kpiŋsaŋa ale pukɔŋŋa baai ale bo ni tɛŋsaŋa po la a jam dɛ chak ate Naawen dii ale ka ni Wen la a niak ni nisima tuima meena.