Teerika 11 - WEN GBAŊKA

¹ Yaali Naawen dii ale ka ni Wen la abe ni ta wa ale a yaali diila, ale wa ŋmarisika ale wa buusaŋa ale wa wieŋa diipo meena.

² Ni a teeri jinla danni ayen daa ni bisaŋa ale jam nya Naawen dii ale ka ni Wen la waalika. Wa pagrimu ale wa nisa ale pagra diila, ale wa nisaŋa ale a teeri a tom dii,

³ ale wakperikaliisaŋa ate wa tom ale wie ŋaai ate wa tom Ejipiti po ale wa le nye Faaro Ejipiti naawa ale wa tɛŋka meena dii,

⁴ wa ale nye Ejipiti tugurik tɔŋdɔma ale ba wusumaŋa ale ŋa torokoma diila, wa jam basi ate ba wari beli Nyakpiem Mɔnuŋku po diipo ate ba jam a vi ni la. Ni be nya Naawen ale nye ba diila kama.

⁵ Daa ni biisaŋa ale jam nya dii ate wa nye gɔnni po a te ni alege ate nama a jam paari dela jigini la.

⁶ Ni be teeri wa ale jam nye Datan ale Abiram, Eliab bisaŋa ate wa nyini Aruben dɔkku po bisaŋa diila kama. Tɛŋka a jam na kama a lagri ate ba zi du ate ka lik ba ale ba dɔkdemma ale ba viitaŋa ale ŋanvuta meena a basi du.

⁷ Ka nidek nina po ate Naawen jam basi ate wakpienni de a nye.

⁸ Ni be va sinsak ŋaai meena ate mi a te ni jinla de la dii ale ku te ni pagrim ate ni baga a jo tɛŋ kaai ate ni ale lo Jodan benni a jueli a tuesi la,

⁹ dii ale ku nye ate ni goa beni tɛŋ kaai po ate Naawen a puulim ale ni kokpieŋsaŋa ayen wa pai a te ba ale ba ŋaaŋbisaŋa la. Siita ale biisim ale bo ka po.

¹⁰ Tɛŋ kaai ate ni a jo ni tuesi la a kan nye ase ka Ejipiti la kauk kuui ate ni basi la, juijui ate ni jam bori ale ji nyiam a zaŋti ase jenvaata talim la.

¹¹ Alege tɛŋ kaai ate nama a lo Jodan benni a jueli ayen ni tuesi la ka tɛŋ kaai ale ta guuta ale vaasa ate ŋmoruk nyiam a jo ka po.

¹² Ka ka tɛŋ kaai ate Naawen dii ale ka ni Wen la niŋ a bo ka po. Naawen dii ale ka ni Wen la nina a bo ni zuk kama a ta nyini benni piilimka a ga paari di kpeglimka.

¹³ Ni dan chiib va wa sinsaŋŋa ate mi a te ni jinla de la ale a yaali Naawen dii ale ka ni Wen la abe ni a va wa ale ni suiniima meena ale ni chiisa meena,

¹⁴ wa le basi ate ŋmoruk ale ni ni tɛŋka po wenkarik ale yoei meena ate nama ale nya ŋandiinta ale damasik ale kpaam.

¹⁵ Wa le basi ate wuuk a nyini tɛŋka po ate ni duŋsaŋa a dɛ ate nama dek mɛ a dɛ chak.

¹⁶ Ni be kpesi nidek ate ni kan basi Naawen abe le va bɔgluk yonta a koori tɛŋ a zuli ti.

¹⁷ Ate Naawen sui a puuri ale ni ate wa basi ate ŋmoruk a kan ni ate ni kan nya ŋandiinta tɛŋka po ate ni kpi nwuli abe ni basi tɛŋ naliŋ kaai ate wa ayen wa pai te ni la.

¹⁸ Ni pai mi wieŋa de a nyo ni suiniimaŋa ale ni popolaŋa po, abe ni bobaŋa a maŋ ni nisaŋa nyiŋ, abe ni pai ŋa a bobi maŋ ni deeŋa nyiŋ.

¹⁹ Ni pai ŋa a sak ni bisaŋa, Ni a biisi ŋa wie ase ni nin diem bo yeri, yaase ni nin bo suik po a cheŋ yaase ni nin doa tɛŋ yaase ni nin yiti goom po.

²⁰ Ni ŋmarisiŋa nyo ni yeeŋa tuataŋa nyiŋ ale ni nansuiŋtaŋa meena nyiŋ.

²¹ Dii ale ku basi ate nama ale ni bisaŋa daaŋa a piisi tɛŋ kaai po ate Naawen pɛ ale ni kokpieŋsaŋa ayen wa pai a te ba la. Ni ale kasim boro ka dila ase diipo meena ate ni zak zuk a nya ale chiŋmaaŋa a diem boro la.

²² Ase ni dan chiib a va sinsaŋŋa de meena ate mi a weeni ni la, a yaali Naawen dii ale ka ni Wen la ale a cheŋ wa suitaŋa po ale a va wa nalimnyiini,

²³ Naawen ale yiak tɛŋsaŋa de meena nuruma kama a basi a te ni ate nama ale jo bo tɛŋ sii ale zuak ale ŋman pagra a gaam ni la po.

²⁴ Kauk kuui meena ate nama a pai ni naŋtuok a tabi la ka nama ale soa: Ni tɛŋka ale zuak a ta nyini gɔnni po a ta ga va Lebanon, a ta nyini Yufiretis Benni a ga paari yeniŋ geŋsa nyakpiemu nɔi.

²⁵ Nuru a kan boro a baga a nye kpaliŋ ale ni. Naawen dii ale ka ni Wen la ase wa ale puulim dii ale ni la, yɔgsum ale yik tɛŋsaŋa kauk kuui meena ate nama a cheŋ la.

²⁶ Ni nya de jinla m pai ka niaka ale kikaasa a dueni ni niŋ.

²⁷ Nama ale nya niaka ase nama a nin va Naawen dii ale ka ni Wen la sinsaŋŋa ate mi a pai a te ni jinla dela;

²⁸ Nama abe le nya kikaasa ase nama a nin zɛri Naawen dii ale ka ni Wen la sinsaŋŋa ate mi a weeni ayen ni kan ŋmani va bɔgluk yonta tii ate nama a poom zɛ la.

²⁹ Ase Naawen dii ale ka nama Wen la ale ta ni a jam tɛŋ kaai po ate ni a jo nna, ku a magsi ayen ni zaani ka Gerizim Guuku zuk a biisi niaka wie abe ni zaani Ebal Guuku zuk mɛ a biisi kikaasa wie.

³⁰ Ase nama ale poom seba la, guutaŋa a bo ka Jodan benni ŋmazuk suiku yeniŋ geŋsa kauk kuui ate wenbinni a siŋ la a moata More ti kpieŋsaŋa ale bo Keenan banni la a bo Araba ate ka bo Gilgal po la.

³¹ Nama boro ayen ni lo Jodan benni a jueli kama a taam tɛŋ kaai po ate Naawen dii ale ka ni Wen la ayen wa pai te ni la. Ase ni dan tuesi ka a bo ka po,

³² ni be seba ayen ni va sinsaŋŋa meena ate mi a weeni jinla de la.