Teerika 10 - WEN GBAŊKA

¹ Dila po Naawen a yaa weeni mi ayen, <

² M le ŋmarisi tintain paglaksaŋa zuk wie ŋaai ate mi a liŋ ŋmarisi ate fi a mobi ŋa la ate fi a yaa pai ŋa a nyo dakanni po.

³ Ate mi yaa pai siik daata a nye dakari ale peesi tintain paglaksaŋa siyewa ate ŋa a nye ase ŋaai ate mi a poom liŋ jam ta la, a yaa ta ŋa noa ŋayewa m nisimaŋa po a jueli guuku zuk.

⁴ Naawen a yaa jam ŋmarisi tintain paglaksaŋa de siyewa zuk dii ate wa liŋ jam ŋmarisi la. Sinsaga piika ate wa jam pai te ni guuku zuk la a ta nyini bolimu po la, da dii danni ate ni meena a jam tigsi chaab ate Naawen a pai ŋa a te mu la.

⁵ Mi yaa jam nyini guuku zuk a siŋ tɛŋ a pai tintain paglaksaŋa a nyo dakanni ate m nye la po, ase Naawen ale weeni mu diila, ŋa diem bo ka dula nna.

⁶ Izirali demma a yaa jam basi viliŋa ate Jaakan demma a jam soa ate ŋa bo Mosera la. Dula jigini ate Aaron kpi ate ba gu wa, alege ate wa biika Eleaza a yaa jam chim kaabteerɔ.

⁷ A nyini dula ba yaa jam cheŋ Gudgoda ale Jotbata tɛŋsaŋa kauk kuui ate nyiam a boro la.

⁸ Dila po Naawen a lueri ka Livaima dɔkku po ayen ba ji Naawen nɔiyeŋka dakanni, a zaani wa niŋ a tom abe ba mooli niaka wa yuenni nyiŋ ase ba le diem a nye dii jinla de la.

⁹ Dila ale soa ate Livaima a ka badek tɛŋ ba suataŋa ale bo kauk kuui la. Naawen ale ba ŋantaŋa ase Naawen dii ale ka ni Wen la ale weeni ba diila.

¹⁰ Mi bo guuku zuk a paari ka daa pisinaansi ale yɔkta pisinaansi, ase mi ale liŋ jam nye diila ate Naawen a jam wom dila po ŋmana. Ku jam daa wa yaalika ayen wa kaasi ni.

¹¹ Naawen a weeni mi ayen m cheŋ, <

12 Yɔgyɔgla de, Izirali demma, ka boa ate Naawen dii ale ka ni Wen la a yaali nama jigi ya? Ka nama a chali Naawen dii ale ka ni Wen la yɔgsum ale a va wa suitaŋa meena ale a yaali wa abe le a va wa ale ni suiniima meena ale ni chiisa meena,

¹³ abe ni a kpesi a zuli Naawen wieŋa ale wa ŋmarisika ate mi a te ni jinla de la dii ale nala a te ni la.

¹⁴ Ka Naawen dii ale ka nama Naawen la ale soa wenŋmazukku ale tɛŋzuk de meena ale jaabuuri meena ale bo ka po la.

¹⁵ Alege Naawen a diem sak wa yaalika ale ni kokpieŋsaŋa ale lueri ni ate ni buuni po ale gaam tɛŋsa meena ase ku ale ka dii jinla de la.

¹⁶ Ni nye ni suiniimaŋa cheri abe ni basi tukpari tuima.

¹⁷ Ale Naawen dii ale ka ni Wen la ka wena meena Wen ale nyama meena Nyɔnɔ, Wen kpien dii ale zuak ate ba a chali wa mɛ. Waai ale ka a lugi wa be kan tuesi nuru jaaboa ale nye wari a te wa.

¹⁸ Wa ale a maari baai ale kan ta koba la ale pukɔga ale a yaali nicham ale a te ba ŋandiinta ale kɔlima.

¹⁹ Nama mɛ magsi kama ayen ni a yaali nichamma dii nyiŋla nama dek a jam ka nicham Ejipiti tɛŋka po.

²⁰ Ni a chali Naawen dii ale ka ni Wen la abe ni a va wa. Ni kpesi a yik wa nalimnyiini abe ni a puulim wa yuenni nyiŋ.

²¹ Ni a pak wa, wa ka ni Wen. Ni nya kama ale dek nina wakperikaliik sii ale wakinkagla ŋaai ate wa nye la.

²² Ni kokpieŋsaŋa baai ale jam jo Ejipiti po la ba meena jam ka pisiyopɔi, alege Naawen dii ale ka ni Wen la a basi kama ate ni piisi ase chiŋmarisaŋa ale bo wenŋmazukku po la.