Piilimka 7 - WEN GBAŊKA

¹ Naawen yaa weeni Nowa ayen, <

² Lueri duŋ sii buuri ale magsi Wen tiirim teka la siyopɔi, jaduok ale jasari ale sii ale kan magsi Naawen tiirim teka la siye, jaduok ale jasari,

³ ale nuinsa buuni siyopɔi, jaduok ale jasari ate si buuni a vua a bo tɛŋka meena.

⁴ A zaani jinla a ta cheŋ daa ŋayopɔi dai m le basi ate ŋmoruk a jam ni paari da pisinaansi ale yogta pisinaansi ate javuk meena ate m nye la a kpi.>>

⁵ Ate Nowa nye dii meena ti Naawen weeni ayen wa nye la.

⁶ Nowa jam ka bena kobsiyuebi diipo ate ŋmorukku a ni la.

⁷ Nowa ale wa powa ale wa nidoabilisaŋa ale ba pooma yaa jo ŋaaruŋku ayen nyiamu kan paari ba.

⁸ Duŋ naliŋsa ale sii ale daŋ ale nuinsa ale ŋan baai ale duiri tɛŋ a cheŋ la

⁹ ŋanduata ale ŋansaa yaa jam Nowa jigi a jo ŋaaruŋku po ase Wen ale weeni Nowa diila.

¹⁰ Daa ŋayopɔiwa ale taam la nyiamu yaa jam.

¹¹ Ben dii ate Nowa nya bena kobsiyuebi la, chiik kaai ale saari siyewa la, da pi ale ŋayopɔiwa danni tɛŋka ya lagri ate nyiamu a nyini ate wenzukku mɛ lagri.

¹² Ate ŋmoruk a ni da pisinaansi ale yogta pisinaansi.

¹³ Da dila danni dek Nowa ale wa nidoabilisaŋa Sɛm, ale Yɛm ale Jafet ale wa powa le wa nidoabilisa batawa pooma yaa jo ŋaaruŋku po.

¹⁴ Ba jam jo ku po ale ka gɔi duŋsa buuni, ale yeri duŋsa buuni ale ŋan baai ale vuuri a cheŋ ba lɔga zuk la buuni ale nuinsa buuri tɔgatɔga, jaab meena ale ta kiŋkaŋŋa.

¹⁵ Ŋanta buuri meena ale ta nyuvuri la baye baye yaa jam Nowa jigi a jo ŋaaruŋku po.

¹⁶ Duŋ sii ale jam a jo la ka jaduok ale jasari a va ale Wen ale weeni Nowa diila. Naawen yaa lik wa basi du.

¹⁷ Daa pisinaansi meena nyiamu jam a siŋ tɛŋka kama, bu le kasim a gum du la, bu yaa ta ŋaaruŋku a jueli wen.

¹⁸ Nyiamu kasim a jueli nna yegayega tɛŋka meena ate ŋaaruŋku yaa bo nyiamu zuk a dɛ.

¹⁹ Bu jam jueli ka nna yegayega ate guuk kpientaŋa meena ale bo tɛŋka zuk la a lik.

²⁰ Bu jam jueli kama a lik guutaŋa meena. A zaani guutaŋa zuk a jueli ku limisa ase ka naŋtuok magsika pisiye la.

²¹ Javuk meena ale bo tɛŋka zuk yaa kpi. Nuinsa ale gɔi duŋsa ale yeri duŋsa ale ŋan yirinta ale nurubiik meena a jam kpi kama.

²² Jaab meena le bo tɛŋzuk a ta nyueri a vuusi a kpi kama.

²³ Javuk meena ale jam bo tɛŋka zuk la ŋman ka. Nurubisa ale duŋsa ale ŋan baai meena ale bo tɛŋzuk a cheŋ ale wenzuk nuinsa ŋman jam ka tɛŋka zuwa. Ka Nowa nyiini ale baai ale bo ŋaaruŋku po ale wa la.

²⁴ Nyiamu jam lik tɛŋka ka daa kook ale pisinu.