Pa Sakka 9 - WEN GBAŊKA

¹ Wen maarɔ waai ale a saari banuwa la, a yaa peeri wa damuniŋka. Ate mi yaa nya chiŋmarik ale ka nyini wenŋmazuk a jam lo tɛŋzuk. Chiŋmarika jam ta ka vɔrup buui ale kan ta kpeglimka la safiika.

² Ka yaa lak vɔrumu nɔnni ate nyuisa yegayega a yaa jam nyini bu po a nyini ase bolim kpiem nyuisa la. Nyuisaŋa a yaa nye ate wenbinni ale vayɔgsummu a sobri nna birim.

³ Ate tintue yaa nyini nyuisaŋa po a nyini. Tintueŋa jam ta pagrim ase ka tɛŋzuk de nuenta ale ta pagrim diila.

⁴ Ba jam weeni ŋa kama ayen ŋa kan dɛ vaata yaase wuuta alege ŋa a dom ka baai ate Maarɔwa an jam ji ba deeŋa nyiŋla.

⁵ Tintueŋa jam ka suik a ko ba, alege ŋa le basi kama ate ba nam chiisa sinu. Ba le ba nam diila a nye se ka nueoŋ ale dom fu ate fi a nam diila.

⁶ Daa ŋala po nuruba le gisi yaali kum, alege ba kan nya bu. Ba le yaali ayen ba kpi alege kum le chali bɛ kama ba jigi.

⁷ Tintueŋa jam a nye se ka wusuma ate ba gomsi magsi ayen ba taŋa cheŋ tugurik po la. Ŋa jam vuk ka zuyua tii ale a nye ase ligmɔniŋ ate ba pai nye la. Ŋa ninaŋa jam a neensi ka nurubiik nina.

⁸ Ŋa zuisaŋa mɛ jam a neensi ka nipooba zuisa, ŋa nyinaŋa mɛ a neensi gbeŋli nyina.

⁹ Ŋa kuusaŋa jam lik ale ka ŋanta nna ase kuta paglaksa la. Ŋa kiŋkaŋŋa ale jam a fuk diila a nye ase ka wusum boari ale a dari torokoba a cheŋ kpaliŋ la.

¹⁰ Ŋa juitaŋa a jam a neensi ka nuenta juita. Ŋa le jam pai ŋa juitaŋa a dom nuruma diila ale jam chim ŋa pagrimu a yaa basi ayen ba nam a paari chiisa sinu.

¹¹ Maarɔma wanyi ale jam bo dula la, ba jam a wi wa ale Juuma biika ayen ka Abadɔn. Ba jam a wi wa mɛ ale Girik demma biika ayen ka Apoliyɔn. Wa jam ka nuentaŋa naab ale maara nya Vɔrup buui ale kan ta kpeglimka jigi la.

¹² Ba yaa weeni mi ayen ninam buui le bu liŋ jam nurubiik jigi la, bula taam kama. Bula dan taam ga nueri, ninam buye le pilim jam gum du.

¹³ Wen maarɔ waai ale jam saari bayuebiwa la a yaa peeri wa damuniŋka ate mi yaa wom lueluk ale ku nyini ligmɔniŋ kuŋkuŋku nyiila ŋanaansiwa ale bo Wen niŋ la a jam.

¹⁴ Lueluku yaa weeni maarɔwa waai ale saari bayuebiwa la ayen, <>

¹⁵ Wa yaa ga foli ba ate ba nyini benni po a nyini maarɔma de jam gomsi badek magsi ka diipo ale dai dii ale chiik kaai po ale bein diipo, ate Wen lueri ba. Ba jam yik maarɔma kama a zaani ayen Wen weeni dai dii danni ate ba le tom ba tuimaŋa la.

¹⁶ Tugurik tɔŋdɔma ale jam do wusumaŋa la a jam ka tusa kobsiye ale paari tusidi (200,000,000). Mi jam wom ba nɔi ale ka diila kama.

¹⁷ Mi jam nya ba ka ase m goa daasim kama la. Ba jam pai ka kuta paglaksa a lik ba kuusa. Kuta paglaksaŋa jam muni kama ase bolim la, ale a nye nna mɛ ase dubuulim la. Wusumaŋa zuimaŋa a jam a neensi ka gbeŋma zuima, nyuisa ale jam a nye se dubuulim ale bolim la nyini ba noaŋa po a nyini.

¹⁸ Nyui sii ale jam a neensi dubuulim ale bolim la, jam nyini wusumaŋa noaŋa po a nyini la, a jam ko ka tɛŋka meena gela butawa po bunyi nuruma ate maarɔma a jam poori a soa se chaab butawa la.

¹⁹ Wusumaŋa juitaŋa a jam ta ka wiiga zuima. Wusumaŋa a jam pai ka ŋa wiiga zuima juitaŋa a nye ate nuruba a nam a gum chaab ale ŋa noaŋa ale jam ko ba diila.

²⁰ Tɛŋka nuru baai ate maarɔma an diem lueri ayen ba ko ba la, an jam basi ba tuimbaataŋa ale va Wen yaa. Ba jam a kaab ka chichirik baata ale pai kuta tɔgatɔga ale tintana ale daata a nye bɔgta tii ale kan baga a nya, yaa se ti a wom wie, yaa se ti a cheŋ, ba jam a kaab ti meena kama.

²¹ Ba nyiem kasim jam a ko ka nuruba ale a tom tuimkperikaliisa tuima ale a yaali nipooba bobi goom ale a zu. Tuimbaataŋa de meena ate ba jam a tom la, ba an jam basi ŋa ale tagri ba popola ayen ba va Wen yaa.