Pa Sakka 8 - WEN GBAŊKA

¹ Ate Pabiika yaa foli bobi kaai ale saari buyopɔiwa la. Wenŋmazuk chiok an choa ya a ta dila a ga paari miita pisita.

² Dila ale ga taam la, ba yaa pai damunsa siyopɔiwa a te Wen maarɔba bayopɔiwa. Ba jam kasim za ka Wen niŋ.

³ Wen maarɔ wa choa ale jam ta chin ate di a nyaksi ase ligmɔniŋ la a yaa jam za kuŋkuŋku tɛŋ. Ŋanta ale jam bo chinni po ate ba nyummu masa ate ba yaa pai te wa ayen wa pai gum Wen nuruma puusaŋa po a ju kuŋkuŋku ale dua naamu zukpaglika niŋ la zuk.

⁴ Jamasika nyuisaŋa ale Wen nuruma puusaŋa a jam nyini ka maarɔwa ale za juijui la a jueli.

⁵ Wa le jam ju jabuui ale jam a nyuŋ nna masik masik a nueri la, wa yaa jam pai bolim a nyo chin dii ale a nyaksi ase ligmɔniŋ la po a yuk ba meena a basi tɛŋzuk. Tɛŋka yaa choa nna yegayega ate wenzuk a nyaksi ale a na nna yegayega.

⁶ Ate maarɔba bayopɔiwa yaa gomsi ayen ba peeri ba damunsaŋa.

⁷ Maarɔma wanyi yaa liŋ peeri wa damuniŋka. Ŋmoruk tana ale bolim a gum chaab ale ziim a yaa deri lo tɛŋka zuk. Wa yaa poori tɛŋka a soa se chaab la buta, ate kaukku kunyi a ju ale bolim ate tiisaŋa ale wuutaŋa meena ale jam bo ku po la a dɛ.

⁸ Wen maarɔ waai ale jam pai saŋ la a peeri wa damuniŋka. Ba yaa jam pai jaab ase guuk kpioŋ la ate bolim jam a dɛ ku la a yuk a basi nyakpiemu po. Nyiamu yaa poori a soa se chaab la buta kaukku kunyi a tagri chim ziim,

⁹ ate ŋantaŋa ale bo nyiamu po la a kpi ate ŋaaruŋ kpientaŋa meena ale jam bo nyiamu po la a kaasi.

¹⁰ Wen maarɔ waai ale jam saari batawa la mɛ yaa peeri wa damuniŋka. Chiŋmarik kpieŋ kaai ale jam a nyaksi nna yegayega la a yaa nyini wenŋmazuk a lo tɛŋka zuk. Maarɔwa yaa poori belaŋa meena ale bulisaŋa meena a soa se chaab la buta ate kaukku kunyi chiŋmarika a kaasi.

¹¹ Chiŋmarika yuei jam le <> Bulisaŋa meena nyiamu a jam toa kama ate nuruba yegayega a jam nyu bu a kpi.

¹² Wen maarɔ waai ale jam saari banaansiwa la, yaa peeri wa damuniŋka. Ba yaa poori wenbinni ale chiika ale chiŋmarisaŋa a soa se chaab la buta a yaa lueri kauk kuui ale a nyaksi la a basi. Ba jam poori yokku ale kantueŋka, a yaa basi ate ku kan nya.

¹³ Mi yaa nya ale jiiruk a jam bo dula niŋniŋ wenŋmazuk a fuk a yiti. Ku yaa weeni ale lueluk kpioŋ ayen, <>