Pa Sakka 21 - WEN GBAŊKA

¹ Ate mi yaa ŋman nya ale wenŋmazuk ale tɛŋzuk ale nyakpiemu a deri bɛ mi nina po. Wen yaa ŋman nye wenŋmazuk paalik ale tɛŋzuk paalik.

² Mi yaa nya Wen tɛŋ kpieŋ kaai ate wa jam lueri a te wadek la a yaa basi wenŋmazuk a siŋ tɛŋzuk. Tɛŋ kpieŋ kala ale Jerusalem paalika. Ku jam a nye se ka nipok ale kasim jam a gomsi wadek ayen wa yali wa chora la.

³ Mi yaa wom ale lueluk kpioŋ a nyini wenŋmazuk zukpaglika jigini a yaa a weeni ayen, <

⁴ Wa le duisi ba ninyaata a basi. Kum ale ninam ale nyiŋdomma a kan ŋman boro. Ku le liŋ jam ka diila, ku kan ŋman nye dila diipo diipo.>>

⁵ Waai ale jam kali Wen zulaŋa zukpaglika zuk la a yaa weeni ayen, <> Wa ŋman pilim weeni mi ayen, <<Ŋmarisi dii ate m le weeni fu a dueni, dii nyiŋla m wieŋa ka wensie wie ale magsi mɛ.

⁶ M tuimaŋa a nueri kama. M ka Piilimka, m be kasim boro kama taam wuu. M nyuvuri paalik kaai ate m pai a te nuruba la, a nye se ka nyiam la. Nyanyuila ale ta waai meena la, m le basi ate ba nyu bu ka tiirim.

⁷ Waai ale ta pagrim wie meena zuk la ale wa tuesi ŋantaŋa de meena, mi ale chim wa Wen ate wa mɛ ale chim m nidoabili.

⁸ Alege baai ale yɔgsa la, bumbobrɔma ale baai ale daŋ badek ale wabaata la ale nuru koorisa ale kaboŋ nyeerisa ale sampoporinni tuima ale baai ale a kaab bɔgta ale velimvendisaŋa, a za ba jo ka mɔgi diipo ate bolim a dɛ taam wuu. Ku la a nye ase ba a kpi a saari ka buye la.>>

⁹ Wen maarɔ baai bayopɔiwa ale jam ta china ŋayopɔiwa ate ninammu a bo ŋa po la, wanyi a yaa weeni mi ayen, jam de ate m dak Pabiika powa a sak fu.

¹⁰ Wen Chiika yaa sak mi ate mi nya ale maarɔ a ji mi a ta jueli guuk zuk. Wa yaa sak mi Tɛŋ Weleŋka Jerusalem ale ka nyini wenŋmazuk Wen jigi a cheena ale

¹¹ a nyaksi ale Wen zulaŋa. Tɛŋka a kasim a nyaksi kama ase tintain mɔnta la, a nya nna cheri ase nyaasuŋ la.

¹² Ka jam ta ka parik kpieŋ nna woŋwoŋŋoa ale nansuiŋta pi ale tiye, ate maarɔba pi ale baye a limisi nansuiŋtaŋa. Nansuiŋtaŋa nɔi ba ŋmarisi ka Izirali bisaŋa pi ale bayewa yue a dueni du.

¹³ Nansuiŋta tita ale jam bo kauk kunyi meena. Tita ale jam bo kori geŋ. Tita ale jam bo yeseoku geŋ. Tita ale jam bo wiilukku geŋ. Tita mɛ ale jam bo yeniŋ geŋ.

¹⁴ Ba pai ka tintana pi ale ŋaye a dueni nyubini ase parika ale ŋmarisi Pabiika tuimtomdɔma pi ale bayewa wie a dueni ŋa nyiŋ la.

¹⁵ Wen maarɔ waai ale biisi ale mi la, a jam ta ka tachek ate ba pai ligmɔniŋ a nye ka ayen wa magsi tɛŋka, ale nansuiŋtaŋa ale parisaŋa.

¹⁶ Tɛŋka labsimu ale ka woglimmu a jam soa ase ka chaab la. Maarɔwa a jam pai ka wa tachekka a magsi. Ka woglimmu jam ka mɛɛla tusidi ale kobsinu (1,500). Ka labsimu ale ka juelika a jam soa ase ka dila la.

¹⁷ Maarɔwa jam magsi ka parika ate ka biglimu a chim ka anamagib kobsiye ale pinaanuŋ ale naaniŋ, a va chaab ale nurubiik magsika.

¹⁸ Tɛŋka parika ba jam pai ka tintain mɔnta a nye ka alege tɛŋka po dek ligmɔniŋ a nye nna ase nyaasuŋ la.

¹⁹ Ba pai ka tintain naliŋsa tɔgatɔga a ŋmirisi nyubini. Ba ale liŋ pai ka tintain mɔnta a dueni nyubini, buyewa po ka tintain sobta, butawa po ka tintain paasa, bunaansiwa po ka tintain ŋaai ale a nye ase gunungoona la,

²⁰ bunuwa po ka tintain ŋaai ale a nye ase mɔnuŋ ale peeluk a gum chaab la, buyuebiwa po, ka tintain ŋaai ale a nye ase kpabunyiam la, buyopɔiwa po ka tintain salima, naaniŋka po ka tintain paata, neokku po ka tintain ŋaai ale a nye ase dubuulim la, piwa po ka tintain ŋaai ale a nye ase gunungoona ale peela la, pi ale bunyiwa po ka tintain bibituk, pi ale buyewa po ka tintain ŋaai ale a nye ase busumbooŋ la.

²¹ Ba yaa jam pai ka ŋanta pi ale baye wa ate ba a nyaksi ase tintana la, a nye parika nansuiŋta pi ale tiyewa meena. Ba jam maa pai ka ligmɔniŋ mɛ a se nyaasuŋ la a piisi suik kpioŋku.

²² Mi an jam nya Wen yenni tɛŋka po dii nyiŋla Yenni ale Naawen dii ale ka Wen Kpienni la dek ale wa Pabiika ka Yenni.

²³ Baai ale jam bo dula la, an jam a yaali wenbiri yaase chiika. Wen ale wa nalimu ale a nyaksi ate ba a nya. Pabiika mɛ ale ba bolim ate ba a nya.

²⁴ Tɛŋzuk nuruma le ba nya bolimu dɛ a cheŋ. Ba nalimaŋa mɛ le pai ba zulaŋa a jam gum du.

²⁵ Ba kan lik siaka noaŋa. Ŋa le kasim a lak kama daa meena. Dii nyiŋla yok a kan bo du.

²⁶ Tɛŋzuk nuruma mɛ le ba zula yegayega a jam gum tɛŋka po.

²⁷ Tuim baata nyama ale baai ale a nye kaboŋsa ale maara velim la, ba kan baga a maa jo dula. Baai ate ba ŋmarisi ba yueŋa a nyo Pabiika nyuvuri paalika gbaŋka po la, bala nyiini ale ba jo du.