Pa Sakka 20 - WEN GBAŊKA

¹ Ate mi yaa nya maarɔ wanyi ale wa basi wenŋmazuk ale ge siŋ tɛŋzuk. Wa jam ta ka chɔrin dobdi wa nisa po. Wa jam maa ta ka Vɔrup buui ale kan ka kpeglimka la nɔnni safiika wa nisa po.

² Maarɔwa a yaa jam yik jaab waai ale a neensi waamu a jam yiak nipowa la, a yaa bobi wa ale chɔrin dobni ayen ku paari bena tusidi. Jaamu de ka jabiok yaase Sitaana ate wa boro a ta nyini dila po la.

³ Maarɔwa yaa yik wa a yuk basi Vɔrup buui ale kan ka kpeglimka la po, a yaa pai wa saafiika a kpari vɔrumu nɔnni. Wa nye dila ayen ka wa kan ŋman baga a paasi tɛŋzuk nuruma. Wa le bo ka vɔrumu po ate bena tusini a ga nueri. Di danni a dan ga paari, ba le lak vɔrumu ate wa nyini boro maga.

⁴ Ate mi yaa ŋman nya ale zukpaglik si chaab a za dula. Ba yaa jam pai pagrim a te baai ale jam kali si zuk la ayen ba bo buusa. Mi yaa jam nya baai ate tɛŋzuk nuruma a jam ko ba ayen dii nyiŋla ba jam a sak wensieŋa ate Yeezu a pai sak la ale Wen wanni. Ba an jam puusi a te duŋ kperikaliika yaase ba kaabi ka bɔglukku. Ba an jam basi mɛ ate ka ŋmarisi ka yuenni a dueni ba dee ale ba nisa nyiŋsa. Yeezu Kirisita a jam yeeri ba kama a ta nyini kum po a nyini ayen ba ale wa a maa chaab a chim nalima a soa tɛŋka ate ku ga paari bena tusini.

⁵ Bala ate wa liŋ jam nak yiti kum po. Bena tusini a jam nueri kama ale ge ate wa yeeri baai ale jam liŋ kpi la kum po a ta nyini.

⁶ Baai ate Kirisita a liŋ lueri a nye ate ba yiti kum po la, ba sue ale peenti kama. Ba le chim ka Wen ale Kirisita kaabteerɔba. Ba ale wa ale ba soa tɛŋka ate ku ga paari bena tusini la. Kum buui ale a saari buyewa la a kan nya pagrim ba zuwa.

⁷ Bena tusini a dan ga nueri, ba le basi ate Sitaana nyini Vɔrumu po a nyini.

⁸ Wa le nyiem a cheŋ kama a paasi tɛŋzuk nuruma, abe wa a tigsi ba a gum chaab ale Gɔg ale Megɔg ate ba maa chaab a tu Wen nuruma a nye kpaliŋ. Sitaana ale wa nuruma de ale piisi kama nna yegayega ase beli tintain busuŋ la ate nuru an baga a le chiini ba.

⁹ Ba le nyini ka jigi meena a jam gilim Wen nuruma baai ale jam bo dula la. Wa mariŋ ba boka jigi ka yegayega. Wen ale basi ate bolim nyini wenŋmazuk a siŋ jam dɛ baai meena ale za gilim la.

¹⁰ Ba yaa le yik jabioku waai ale jam a nyiem a paasi nuruma la a yuk wa a gum duŋ kperikaliika ale venta biisiteerɔwa po ate bolim buui ale kasim jam a dɛ nyakpiemu po la a dɛ ba meena. Dula, wala ale duŋ kperikaliika ale venta biisiteerɔwa ale kasim a nam ka nna yegayega taam wuu.

¹¹ Ate mi yaa ŋman nya zukpaglika wenŋmazuk. Ka jam ka zukpaglik kpieŋ peeluk ate nuru a jam kali ka zuk. Tɛŋka ale wenŋmazuk a jam muriŋ bɛ wa niŋ, jigi mɛ abe jam karo ayen ba sugi.

¹² Mi yaa nya tɛŋzuk nuruma baai ale jam ka nuru kpienta ale baai ale jam kan daa nuru kpienta ate Wen yaa nak ba yiti kum po la. Ba jam za ka wa zulaŋa zukpaglika niŋ. Ba yaa jam lak nyuvuri gbaŋka ale gbaŋsa si chaab. Wa jam bo ba buusa a magsi chaab ale ka dii ate ba nye la ale dii ale jam ŋmarisi a nyo gbaŋsaŋa po la.

¹³ Baai ale jam kpi ate ba gu ba tɛŋka ale nyakpientaŋa po la, ale baai ale jam bo kpiluŋ tɛŋ la, nuruma de meena a jam za ka dula. Wen a jam bo ba buusa a magsi chaab ale ka tuim ŋaai ate ba jam tom la.

¹⁴ Ba jam pai ka kum ale Kpiluŋ Tɛŋ a yuk basi nyakpiemu po ate bolimu a kasim jam a dɛ la ayen bu dɛ ba a kaasi. Kude ka kum buui ale a saari buye la.

¹⁵ Baai ate ba an ŋmarisi ba yueŋa a nyo nyuvuri gbaŋka po la, ba jam maa pai ba a yuk basi ka dula.