Pa Sakka 19 - WEN GBAŊKA

¹ Kude ŋaaŋnyiŋ mi yaa wom nuemka nna ase nuru boari la wenŋmazuk a weeni ayen, <

² Wa ka wensie nyɔnɔ ale a bo wensie buusa. Wen a bo mini nidoa yaalika wa ale kaasi tɛŋka ale wa kaboŋsa tuimaŋa la kama. Wen a namsi wa kama dii nyiŋla wa ale ko wa tomteerɔma la.>>

³ Ba yaa ŋman pilim kaari a weeni ayen, <>

⁴ Nisɔm pisiye ale banaansiwa ale ŋanvuta tinaansiwa ale jam za gilim wenŋmazuk zukpaglika la, a jam a duak ka tɛŋ ale a yiti wenzuk a puusi Wen ale a weeni ayen, <>

⁵ Ate mi yaa wom ale lueluk a ŋman nyini wenŋmazuk zukpaglika jigini a yaa a weeni ayen, <>

⁶ Mi yaa ŋman wom nuru boari luelita ate ti jam a nye wai nna yegayega ase nyaata ale a chali la. Luelutaŋa mɛ a jam a na ase ka nanpansa ale a na la. Luelutaŋa a jam a weeni ayen, <

⁷ Wa zuak a gaam ŋanta meena kama. Dila ale soa ate ku a fɛ ayen ti a pak wa ale suipeentik. Di danni a paari kama ayen Pabiika a faari nipok waai ale gomsi wadek a limisi wa la.

⁸ Ba te wa powa ka suik ayen wa jo garuk tii ale nala ale a nyaksi la.>> Garuk naliŋtaŋa de ka tuim naliŋ sii ate Wen nuruma a jam nye la.

⁹ Wen maarɔ wanyi a yaa jam weeni mi ayen, <<Ŋmarisi dii ate mi a weeni la a dueni. Baai ate ba le wi ba ayen ba jam maa dɛ ŋandiinta Pabiika nipowa faarika la, ba sue ale peenti.>> Wa le ga weeni nna a nueri la, wa ŋman pilim weeni maga a gum du ayen, <>

¹⁰ Mi yaa kpi duna wa niŋ ayen m puusi wa, alege wa jam weeni mi ayen, <> Wensieŋa ate Yeezu a pai sak la ale a basi ate biisiteerɔma a biisi.

¹¹ Ate mi yaa nya ale wenŋmazuk lak ate wusum peeluk a yaa jam za du. Ba jam a wi waai ale jam do bu la ayen ka, <> Wa yuei mɛ jam ale, <> Daa meena wa kasim jam a cheŋ ka kpaliŋ po, ale a bo wa dachaasaŋa buusa ŋaai ale jam magsi wa boka la.

¹² Wa ninaŋa a jam muni ase ka bolim la. Wa mɛ jam vuk ka zutɔk boari. Ba jam ŋmarisi ka yuei dii ate nuru a jam zɛ di kiri la a dueni wa nyiŋ. Wadek wa nyiini ale jam seba yuenni kiri.

¹³ Wa jam jo ka kasaauk ate ziim a jam muni ku meena. Wa yuei jam ale <>

¹⁴ Tugurik tɔŋdɔba yegayega baai ale jam bo wenŋmazuk la a jam jo ka garuk naliŋta ale do wusum peeta a yaa jam a vi wa ŋaaŋ.

¹⁵ Waai ale do wusum peelukku la a jam ta ka gebik ate ka ta noa ŋaye a yaa jam nyini wa nɔi po a nyini. Wa jam weeni ayen wa le pai kama a nye kpaliŋ ale tɛŋzuk nuruma a nak ba dɛ. Wa le soa ba ale pagrim nalimnyiini abe wa ŋmiak yɔnaŋa daamu. Dula jigini ale a sak Wen suipuurumu.

¹⁶ Ba jam ŋmarisi ka yuei a dueni tugurik tɔŋdɔma kpagni kasaauku ale wa naŋsaŋa kanyi nyiŋ. Yuenni jam ale, <>

¹⁷ Mi yaa nya maarɔ ale wa za wenbinni zuk. Wa yaa jam kaari ale lueluk pagrik yegayega a weeni nuin sii meena ale jam bo wenŋmazuk a yiri la ayen, <

¹⁸ Wa le pai nalima ale tugurik tɔŋdɔba ale ba kpaga, ale wusuma ale baai ale do ŋa la, ale baai ale ka nuru kpienta ale baai ale kan daa nuru kpienta, baai ale ka yɔm, ale baai ale kan daa yɔm, bala meena ate Wen ale pai a te ate ni dɛ.>>

¹⁹ Ate mi yaa nya duŋ kperikaliik kaai ale jam nyini nyakpiemu po a nyini la ale tɛŋzuk nalimaŋa ale ba tugurik tɔŋdɔma ale ba maa chaab a cheŋ ayen ba ga nye kpaliŋ ale nuru waai ale jam do wusum peelukku la ale wa tugurik tɔŋdɔma.

²⁰ Wenŋmazuk tugurik tɔŋdɔma a yaa jam nak yiak tɛŋzuk nuruma tugurik tɔŋdɔma ale ge yaa yik duŋ kperikaliika ale venta biisiteerɔwa. Biisiteerɔwa de a kasim jam a nye ka wakperikaliisa duŋ kperikaliika niŋ ayen ka paasi nuru baai ate duŋ kperikaliika a jam ŋmarisi ba nyiŋ ayen ba jam a kaab ka bɔglukku la. Wenŋmazuk tugurik tɔŋdɔma a yaa yik duŋ kperikaliika ale biisiteerɔwa a ta cheŋ ga yuk basi nyakpiemu po, juijui ate bolimu a kasim a dɛ la.

²¹ Wenŋmazuk tugurik tɔŋdɔma kpagni waai ale jam do wusum peelukku la, a yaa yeeri gebik woŋ kaai ale jam ta noa ŋayewa la wa nɔnni po a yaa ko tɛŋzuk tugurik tɔŋdɔma baai ale jam tali la. Nuinsaŋa a yaa basi wenŋmazuk ale siŋ a dɛ ba chak ale tali.