Pa Sakka 16 - WEN GBAŊKA

¹ Ate mi yaa wom ale lueluk kpioŋ a nyini Wen yenni a yaa weeni Maarɔba bayopɔiwa ayen, <>

² Maarɔma wanyi a yaa dɛ niŋ nyini ga kpiiri suipuurumu wa chinni po a basi tɛŋka zuk, ate niri kperikaliisa a yaa nye nuru baai ate duŋ kperikaliika a ŋmarisi ba nyiŋsa ate ba jam a kaab ka bɔglukku la ate ba jam a nam nna yegayega.

³ Wen maarɔ waai ale jam saari bayewa la jam kpiiri suipuurumu wa chinni po a basi nyakpiemu po. Nyiamu a yaa jam muni nna ase kpio ziim la ate jaabuuri ale jam bo bu po la a yaa kpi.

⁴ Wen maarɔ waai ale jam saari batawa la mɛ yaa kpiiri suipuurumu wa chinni po a basi belaŋa ale bulisaŋa po ate nyaataŋa a chim ziim.

⁵ Mi yaa wom ale maarɔwa a weeni ayen, <

⁶ Ba jam ko fi nuruma ale biisiteerɔma ate ba ziimu a yaa nyini tɛŋ. Ku magsi kama ale fi ale pai ziimu ayen ba nyu yɔgyɔgla la.>>

⁷ Ate mi yaa wom ale lueluk a nyini kuŋkuŋku jigini a yaa weeni ayen, <>

⁸ Wen maarɔ waai ale jam saari banaansiwa la yaa kpiiri suipuurumu wa chinni po a basi wenbinni zuk ate di kantueŋka a yaa nya suik a dɛ nuruma.

⁹ Kantueŋka ale jam dɛ ba la, ba yaa ka a te Wen, dii nyiŋ la, wa le basi ate ninammu a yik ba la. Alege ba an jam basi ba tuimbaataŋa tomka alege tagri ba popola a te Wen zula.

¹⁰ Wen maarɔ waai ale jam saari banuwa la a yaa kpiiri suipuurumu wa chinni po a basi duŋ kperikaliika naamu jigini. Wa jigini ate wa jam boro la a yaa jam sobri ate wa ŋaaŋviirɔma sue a jam a puuri ate ba jam a dom ba giŋgeluŋta.

¹¹ Ba yaa jam ka a te Wen dii ale bo wenŋmazuk la ba niraŋa ale ninammu nyiŋ, alege ba an jam basi ba tuimbaataŋa tomka.

¹² Wen maarɔ waai ale jam saari bayuebiwa la yaa jam kpiiri suipuurumu wa chinni po a basi beli kpienni Yufiretis po. Nyiamu a yaa jam kpeeri alege ate nalima ŋaai ale nyini kori nummu po a cheena la a nya suik a taam jam.

¹³ Ate mi yaa nya chichirik baata tita ale ti a neensi buntua. Chichirik baataŋa de a jam nyini ka jaab waai ale a neensi waamu a jam yiak nipowa ale duŋ kperikaliik kaai ale jam nyini nyakpiemu po a nyini la ale venta biisiteerɔwa nɔi po a nyini.

¹⁴ Chichirik baataŋa a jam ta ka pagrim a tom wakperikaliisa yegayega. Ba jam nyiem kama a yaa tigsi tɛŋzuk nuruma meena nalimaŋa ale ba nuruma a nyo jigi yeŋ ayen Wen Kpienni dai kpienni danni ate wa le jam a bo buusa la a dan paari, ba le tu chaab ale wa a nye kpaliŋ.

¹⁵ Ni wom ti Nyɔnɔwa Yeezu Kirisita ale a weeni ayen, <>

¹⁶ Ate chichirik baataŋa a dɛ nalimaŋa niŋ, a ta ba jam jigi ate ba a wi dula ale Juuma biika ayen Amagedon.

¹⁷ Ate maarɔ waai ale saari bayopɔiwa la a jam kpiiri suipuurumu wa chinni po a basi wenŋmazuk. Mi yaa wom ale lueluk kpioŋ nyini wenŋmazuk naamu zukpaglika jigini Wen yenni po a siŋ a weeni ayen, <>

¹⁸ Chiŋmaaŋa yaa nyaksi ale na ate tɛŋka a choa nna yegayega. Diipo ate Wen a nye nuruba ate ku ta dila a jam paari jinla, tɛŋka an diem choa nna la.

¹⁹ Tɛŋ kpieŋka a jam poori ka buta ate tɛŋzuk tɛŋ kpieŋsaŋa a kaasi meena. Wen yaa teeri Babilon wari a yaa basi ate ka nuruma a nyu wa suipuurumu wa beerika po ase daam la.

²⁰ Guuk kpientaŋa meena a yaa muriŋ bɛ ate tɛŋsaŋa meena ale nya tii ale jam doa gilim tɛŋ sii meena la mɛ a muriŋ bɛ.

²¹ Ŋmoruk tana a yaa jam nyini wenŋmazuk a lo nuruma zuima. Ŋmoruk tanaŋa dinyi a jam dobra a se ka za boorik geli la. Nuruma yaa jam ka a te Wen dii nyiŋla, wa le jam basi ate ŋmoruk tanaŋa a dobra la.