Pa Sakka 15 - WEN GBAŊKA

¹ Ate mi ŋman nya jakperikaliik tanjaŋini wenŋmazuk ate ku cha mi nna yegayega. Maarɔba bayopɔi ale jam ta ninam tɔgatɔga buyopɔi a jam bo dula. Ba le jam basi ate ninammu a yik ka tɛŋzuk nuruma a kpeglim. Dii nyiŋla, Wen sui ale jam a puuri ale nuruba diila ate wa ayen wa te ba waalika la a nueri kama yɔgla.

² Mi yaa nya Naawen nuru baai ale jam kan puusi a te duŋ kperikaliika yaase ka bɔglukku, yaase ka pai ka yuenni ale kobsiyuebi ale pisiyuebi ale bayuebi a ŋmarisi ba nyiŋ. Mi jam, nya ba ale za moata ka nyakpiemu ate bu a nyaksi nna ase nyaasuŋ la. Bolim ale jam bo nyiamu po. Nuruma a jam ta ka ŋanta nna a se kpanta la ate Naawen a jam pai a te ba.

³ Ba yaa jam yi Moosis waai ale jam ka Naawen tomteerɔ la ale Pabiika yiili. Ba jam yi yiini ayen, <

⁴ Naawen yaa, fi nyiini ale nuru weleŋ. Dila ale soa ate ku a magsi ayen nuru meena a te fu zula abe ba a weeni a sak ba suata fi le ka Wen kpienni diila. Tɛŋzuk nuruma meena le jam za fi niŋ a puusi a te fu, dii nyiŋla ba seba ayen fi tuimaŋa meena a daa tuim susuga.>>

⁵ Ba le jam yi yiini a nueri la, mi yaa nya ale Wen yenni nɔnni a lak ate pumpuulima viuku a boro.

⁶ Maarɔba bayopɔiwa ale jam ta ninam tɔgatɔga buyopɔiwa la a yaa nyini dula a nyini. Ba jam jo ka garuk peelita ate ti nala nna yegayega. Ba jam maa ta ka garuk pali fiik sii ale a nyaksi a neensi ligmɔniŋ la yaa bobi gilim ba kuusa.

⁷ Ba yaa cheŋ ga za ŋanvuta tinaansiwa wanyi niŋ. Ŋanvutaŋa a jam za gilim ka Wen naamu zukpaglika. Javuk kuui niŋ ate ba jam za la, a jam pai Wen dii ale kasim boro taam wuu la suipuurumu ale wa le wa te tɛŋzuk nuruma waalika la, a yaa jam pai Wen suipuurumu a nyo china ŋayopɔi po a te maarɔma wanyi wanyi.

⁸ Wen zulaŋa ale wa nalimu ale wa pagrimu yegayega a jam a nye ase ka nyuisa la a yaa sueri wa Yenni. Ase ka maarɔma a nin basi ate ninam tɔgatɔga buyopɔiwa a yik tɛŋzuk nuruma a nueri, nuru an jam baga a jo Wen yenni po.