Pa Sakka 12 - WEN GBAŊKA

¹ Ate wakperikaliik kpien yaa jam nye wenŋmazuk. Nipok ate wenbinni a lik wa, ate chiika a bo wa naŋtaata po ate chiŋmarisa pi ale siye zutok a vuk wa zuk.

² Wa jam ta ka puuk a boro a yaali ayen wa biak, wa yaa jam a kaari ale nyiŋ wula.

³ Wakperikaliik ka choa a yaa ŋman nye wenŋmazuk. Jakpioŋ ale jam a neensi waab mɔnuŋ la jam bo du. Wa jam ta ka zuima ŋayopɔi ale nyiila pi ale zutɔgsa siyopɔi wa zuimaŋa meena.

⁴ Jaamu de jam labi chiŋmarisaŋa a soa se ka chaab la buta, a yaa lueri kaukku kunyi a yaa pai wa juiku a dari chiŋmarisaŋa meena a lɔnsi tɛŋ. Wa yaa nye dila alege za nipok waai ale a yaa wa biak la niŋ, ayen wa dan biak nueri abe wa nɛ biika.

⁵ Nipowa yaa jam biak nidoabili waai le wa chim a soa tɛŋka meena nuruma ale pagrim la. Jaab yaa jam chiak biika wa jigi a pai te Wen dii ale jam kali wenŋmazuk wa naamu zukpaglika zuk la.

⁶ Nipowa yaa chali ga jo sagi po. Wen ale jam gomsi jigi magsi te wa. Wa ale bo ka dula ate Wen a nya wa nalimnyiini ate ku ga paari daa tusidi ale kobsiye ale pisiyuebi (1,260).

⁷ Ate Wen maarɔma ale ba kpagni Maakil, a yaa tigsi chaab ayen ba nye kpaliŋ ale jakpioŋku ale a neensi waamu la ale wa maarɔma wenŋmazukku po.

⁸ Wen maarɔma yaa jam nak jaamu ale wa nuruma yiak, ale zɛri ayen ba kan ŋman bo dula.

⁹ Wen maarɔma yaa yiak ba ayen ba siŋ tɛŋzuk a bo dula. Jaab kpioŋku de ale a neensi waamu la yuei jam le jabiok yaase Sitaana. Wala ale jam paasi tɛŋzuk de nuru meena la.

¹⁰ Ate mi yaa wom lueluk kpioŋ ale ku nyini wenŋmazuk a weeni ayen, <

¹¹ Kirisita ka Wen nidoabinni waai ale kpi la. Ka wala ate ti suataŋa a jam sak nuruba wa wie alege a jam gomsi badek mɛ ayen ba kpi wa nyiŋla. Wieŋa de meena ale jam soa ate ba nak yiak Sitaana.

¹² Nama baai meena ale bo wenŋmazuk la basi ate ni sue a peenti. Alege ku le toa kama tɛŋzuk demma meena jigi, diila jabioku a siŋ jam ka nama jigi. Wa abe ta ka suipuurum dii nyiŋla wa daaŋa an soa dii ya.>>

¹³ Jakpioŋku ale nya ale ba yiak wa a basi tɛŋzuk la, wa yaa daani nipok waai ale jam biak nidoabinni la nna yegayega.

¹⁴ Ba yaa pai jiiruk kiŋkaŋŋi kpiema ŋaye a te nipowa ayen wa yiti cheŋ sagni po, ale ba le nya wa zuk a ga paari bena ŋata ale chiisa siyuebi ate jakpioŋku a kan nye wa wariya.

¹⁵ Jakpioŋku yaa basi ate nyiam nna yegayega a nyini ka nɔnni po a nyini ase beli la, ayen nyiamu ji nipowa a ta cheŋ bɛ.

¹⁶ Alege tɛŋka a jam nyu nyiamu meena ate bu an paari nipowa.

¹⁷ Alege jakpioŋku ale jam nya dii ale nye la, ate ka sui yaa ŋman kaasi nna yegayega ale nipowa. Ka yaa ŋman pilim cheŋ ayen ka tu chaab a nye kpaliŋ ale baai meena ale a siak a te Wen sinsaŋŋa ale a weeni nuruba ayen Yeezu ale soa ba la. Bala chaama ka nipowa bisa.