Neyemia 3 - WEN GBAŊKA

¹ Kaabteerɔ kpioŋku Eliasib ale wa kaabteerɔ chaama yaa cheŋ ba tom abe ba pilim sɛ Piisa Nansuiŋku. Ba yaa gaari ku a su tuata. Ba jam sɛ parika kama ate ka yalima a paari Kook Yewɔŋku dii ate ba pai nyo Naawen nisa po a yalima a paari Yananel Yewɔŋku la.

² Jeriko demma a sɛ tom du ate Imri nidoabinni Zakkur mɛ a sɛ tom bala jigini.

³ Yassenaa nidoabilisaŋa ale jam pilim sɛ Juma Nansuiŋku. Ba vi chibsa du ale su tuataŋa a pai kuta a kpi maŋ laarisaŋa.

⁴ Yuraya nidoabinni Meremot, Yakkoz ŋaaŋka ale sɛ kauk kunkula. Berekiya nidoabinni Mesullam ate wa kokpieŋka a chim Mesezabel la mɛ ale jam sɛ tom du, ate Baana nidoabinni Zadok a sɛ tom wa ale sɛ a zaani kauk kuui la.

⁵ Kauk kuui ale pai a vi la ka Tekoa demma ale sɛ, alege ba kpaŋŋa jam zɛri tuim ŋaai ate baai ale jam a nya ba zuk la a te ba la kama.

⁶ Jesana Nansuiŋku ka Pasea nidoabinni Joiada ale Besodeiya nidoabinni Mesullam ale jam sɛ, bala ale sɛ a vi ku chibsaŋa du, a su tuata ale a pai kuta a kpi maŋ laarisaŋa.

⁷ A nyini bala jigini, nuruba ale nyini Gibeon ale Mizpa a tom. Bala jam le Melatia ale nyini Gibeon ale Jadon ale nyini Meronot la. Jiŋŋa de ka kpagi dii ale jam a nya tɛŋ kaai ale moata Benni la ale jam a nya ŋa zuk.

⁸ Yaryaiya nidoabinni Uzziel choabiika wanyi ale jam sɛ tom bala jigini. Ate Yanania baai ale a nye kpasaam la wanyi a sɛ tom dula. Bala a jam sɛ ka dila a ta nyini Jerusalem parika a ta ga paari Labisim Parika.

⁹ Yur nidoabinni Arefaiya, waai ale a nya Jerusalem tɛŋ kpieŋka kauk la ale jam sɛ kauk kunkula.

¹⁰ A tom dula, Jedaya ate wa kowa a nye Yarumaf la ale jam sɛ a tuk wa yenni, ate Yasabneya nidoabinni Yattus a sɛ tom.

¹¹ Yarim nidoabinni Malkija ale Payat Moab nidoabinni Yassub mɛ ale sɛ gela ale Boroborok Nyeka Yewɔŋku.

¹² Sallum ate wa kowa a chim Yalloyes waai ale a nya Jerusalem tɛŋka kauk la, wa liema a maari wa ate wa mɛ a sɛ kabta.

¹³ Viaka Nansuiŋku ka Yanun ale baai ale bo Zanoaya la ale sɛ. Ba ŋman sɛ ka kama a su tuata a pai kuta a kpi maŋ laarisaŋa. Ba ŋman sɛ parika kauk ate ka woglimmu a paari anamagib kobsinu a ta ga paari Tampoi Nansuiŋku.

¹⁴ Tampoi Nansuiŋku ka Arekab nidoabinni Malkija waai ale jam a nya Bet Yakkerem tɛŋka la ale sɛ. Wa ŋman sɛ kama ale su tuata a pai kuta a kpi maŋ laarisaŋa.

¹⁵ Bulik Nansuiŋku ka Kol Yoze nidoabinni Sallum waai ale a nya Mizpa tɛŋka zuk la ale jam sɛ. Wa mɛ a sɛ ku kama a pili ku ale su tuata a pai kuta a kpi maŋ laarisaŋa. Wa ŋman sɛ Sɛla Beli Gilini jigini parika ale moata Naawa Talimu la a ta ga paari tiilaŋa ale nyini Deevid tɛŋka a siŋ la.

¹⁶ A nyini wala jigini, ka Azbuk nidoabinni Neyemia waai ale a nya Bet Zur tɛŋka geli la ale sɛ a tuk chaab ale Deevid boosuku ale bo kauk kuui la a ta ga paari mɔgni ale Nuru Pagrisaŋa Yenni.

¹⁷ A nyini wala jigini, ka Livaima ate Bani nidoabinni Areyum a jam a nya ba zuk la ale sɛ. A nyini wa mɛ jigini, Yasabia waai ale jam a nya Keila tɛŋka la ale sɛ a magsi wa tɛŋka demma.

¹⁸ A nyini wala jigini, dula ba suataŋa ate Yenadad nidoabinni Binnui a jam a nya ba zuk la ale sɛ. Wa ale jam a nya Keila tɛŋka kauk.

¹⁹ Jesua nidoabinni Ezer, Mizpa tɛŋka kpagni, mɛ ale jam sɛ tuk chaab ale kpaliŋ kɔlimaŋa ale bo kauk kuui la.

²⁰ Zabbai nidoabinni Baruk a jam sɛ a ta nyini kauk kuui ate ba va a jo kaabteerɔ kpioŋku Eliasib nansuiŋku.

²¹ A ŋman nyini dula, ka Yuraya nidoabinni Meremot ate Yakkoz a chim wa kokpieŋ la ale sɛ dula a ta nyini Eliasib yenni nansuiŋku a ta ga paari ku kpeglimka.

²² A nyini wala jigini, kaabteerɔ baai ale bo tɛŋ sii ale gilim la ale sɛ.

²³ A nyini bala jigini, Benjamin ale Yassub ale gomsi ba yeniŋka geŋsa parika a ta zaani bala jigini mɛ, ka Maaseiya nidoabinni Azariya ate Anania a chim wa kokpieŋ la ale gomsi parika ale bo wa yenni gauŋ la.

²⁴ Yenadad nidoabinni Binnui ale sɛ kabta a ta nyini Azariya yenni gugottaŋa po.

²⁵ Uzai nidoabinni Palal mɛ a sɛ tuk ka Naawa yewɔŋku ale moata limisidɔma dabiaka la. A nyini wala jigini, Paros nidoabinni Pedaiya

²⁶ ale Naawen yenni po tuimtomdisaŋa ale bo Ofel guuku zuk la a sɛ tuk chaab ale Nyiamu Nansuiŋku a tuak kori geŋsa ale yewɔŋku.

²⁷ Tekoa demma a sɛ tom ba ale kpeglim juijui la a nyini yewɔŋku a ga paari Ofel jigini parika la.

²⁸ A nyini Wusuma Nansuiŋku, kaabteerɔma wanyi wanyi meena a sɛ parika wadek yeri niŋ.

²⁹ A nyini bala jigini, Immer nidoabinni Zadok a jam sɛ magsi chaab ale ka wa yenni. A nyini wala jigini, Sekania nidoabinni Sɛmaiya ate wa a nya Kori Nansuiŋku la a sɛ.

³⁰ A nyini wala jigini, Selemia nidoabinni Yanania ale Zalaf nidoabinni Yanun ale saari bayuebiwa la ale sɛ dula. A nyini bala jigini, ka Berekiya nidoabinni Mesullam ale sɛ kabi tii ale tuk wa yenni la.

³¹ A nyini wala jigini, choabiika wanyi ate ba a wi ayen Malkija la ale sɛ a ta nyini baai ale tom Naawen yenni po la yeeŋa a ta ga paari geruŋdɔma yeeŋa ale tuk kpesi Nyaka Nansuiŋku a ta ga paari dɔk kuui ale bo gugoruku ŋmazuk la.

³² A nyini dɔk kuui ale bo gugoruku ŋmazuk la ale Piisa Nansuiŋku suŋsuŋ la choabisaŋa ale geruŋdɔma ale jam sɛ parika.