Neyemia 13 - WEN GBAŊKA

¹ Dai dila danni ba jam kariŋ Moosis gbaŋka kama ate ku jueli ate nuruma a wom, dula jigini ba jam nya kama ale ku ŋmarisi ayen Ammon denɔ yaase Moab denɔ an magsi wa bo Wen tigsuŋku po,

² dii nyiŋla ba an jam te Izirali demma ŋandiinta ale nyiamoa alege daa Balaam ayen wa ka te ba. Ti Wen yaa tulim kikaasaŋa ate si chim niauŋ.

³ Ase nuruma ale jam wom sinsaŋŋa de la, ba yaa yeeri nuru baai meena ale ka nicham la Izirali buuni po a basi.

⁴ Alege ate kude nye la, kaabteerɔwa Eliasib ale jam a nya ŋanta duenika jigini zuk Wen yenni po. Ka Tobiya ale jam chim wa ŋaaŋviirɔ,

⁵ Eliasib jam te wa ka dɔk kpioŋ, kuui ate ba jam pai ŋandiinta tiirita ale ŋan baai nyum ale masa la a dueni ku po ale Wen yenni ŋanta ba jam maa pa ka ŋanbieŋa ate ba lab pi a pai bunyi a te Wen la ale dapaalimu ale kpaamu piika ate ba jam magsi sak Livaima ale yilendisaŋa ale nansuiŋ limisidɔma la ale cheesuŋku ale magsi kaabteerɔma la.

⁶ Alege kude meena ale jam a nye la, mi jam ka Jerusalem po, mi jam ŋmani cheŋ ka Babilon naawa Artasaset jigi diipo ate wade wa naamu a paari bena pisita ale ŋayewa la. Daa maga ale taam la mi jam bek wa ate wa te mu suik

⁷ ate m ŋman jam Jerusalem po. Dila mi jam miŋ biem buui ate Eliasib a nye a pai dɔk te Tobiya Wen yenni dabiaka po la.

⁸ Mi sui a jam puuri ka nna yegayega ate mi kɔlim Tobiya yenni meena kɔlimaŋa dɔkku po a yuk basi peelim.

⁹ Mi yaa te suik ayen ba nye ate diinaŋa a welema, dila ŋaaŋnyiŋ mi yaa ŋman pai Wen yenni ŋantaŋa a zaani du ale ŋandiinta tiiritaŋa ale ŋan baai nyum ale masa la.

¹⁰ Mi jam miŋ kama mɛ ayen ŋandiin tii ale magsi Livaima la an jo ba nisa ate Livaima meena ale yilendisaŋa ale magsi ba tom tuini la yaa ŋman cheŋ badek kaduksaŋa po.

¹¹ Dila mi yaa toariŋ kpaŋŋa a bek ba ayen, <> Mi yaa wi ba jigi yeŋ ate ba cheŋ ba le magsi ba bo juijui la.

¹² Juda demma meena yaa ta ba ŋan bieŋa piika ale dapaalimu piika ale kpaamu piika a jam ŋanta duenika jigini diinaŋa po.

¹³ Mi basi ate ka kaabteerɔwa Selemia ale gbaŋ ŋmarisidoawa Zadok ale Livai denɔ wa yuei jam le Pedaiya ate bala a nya ŋandiinta duenika diinaŋa ale basi ate Yanan ate wa ko a jam nye Zakkur ate wa kokpieŋ mɛ a jam nye Mattania la ale chim ba ŋaaŋviirɔ. Mi nye dila ka ba wensieŋa nyiŋ. Ba ale jam a chari ŋanta a te ba suataŋa.

¹⁴ Teeri mu kude nyiŋ m Wen yaa, abe fi kan duisi dii ate mi a nye ale wensie a te m Wen yenni ale di tuimaŋa la a basi.

¹⁵ Da ŋala po mi jam nya Juda nidoaba ale ba bo daam ŋmiaka jigini a tom Vuusum Danni ale ta ŋandiinta jam bobi a ji bonsa a gum chaab ale daam ale yɔna ale kinkama ale ŋan yonta buuri meena. Ba jam ta bade meena a cheen ka Jerusalem Vuusum Danni. Dila nyiŋ mi yaa kaam ayen ba kan pai ŋandiinta a da dai dila danni.

¹⁶ Nuruba ale nyini Taaya tɛŋka a jam bo Jerusalem po la a jam ta ka juma ale geruŋ ŋanta buuri meena bo Jerusalem po a da Vuusumu Danni a te Juda nuruma.

¹⁷ Mi yaa toariŋ Juda kpaŋŋa ale weeni ba ayen, <

¹⁸ Ni kokpieŋsaŋa an jam nye daa wieŋa de dek ate ti Wenni a ta kaasuŋku jam tama ale tɛŋka de zuwa? Yɔgyɔgla de nama a nye ate ka suipuurum yega a jam Izirali zuk a ta va nama ale a valiŋ Vuusum Danni la.>>

¹⁹ Ase junɔi yisuŋta ale jam tulim bo Jerusalem nansuiŋtaŋa ale ge ate Vuusum Danni a jam la, mi jam weeni kama ayen ba lik tuataŋa abe ba kan lak ti ate Vuusum Danni a ga taam. Mi jam basi ate ka mi dek nidoama gela a za nansuiŋtaŋa ate dila ale basi ate waai kan ji ŋanta a ta jam Vuusum Danni.

²⁰ Bunyi yaase buye daarɔma ale geruŋdɔma ale ta jaab meena la a nyiem jam goa ka Jerusalem peelim yokku.

²¹ Alege mi jam kaam ba kama ayen ka boa ate nama a goa parika kiri yokku? Ni dan ŋman nye dila m le yik ni.>> A nyini dai dila danni ba an ŋman jam vuusum danni.

²² Mi yaa weeni Livaima ayen ba gomsi badek a nye cheri a ga limisi nansuiŋtaŋa a gaari Vuusum Danni. Be teeri mu kude mɛ nyiŋ m Wen yaa, a sak jiirim ale mu a ta va fi ŋmanteka.

²³ Da ŋala po mi jam nya ale Juda nidoaba a faari Asdod ale Ammon ale Moab tɛŋsaŋa lieba.

²⁴ Ba bisaŋa geli ale jam a biisi Asdod tɛŋka biika yaase nuru mbala biisaŋa ale zɛ ba ale ba nye dii a biisi Juda biika la.

²⁵ Mi yaa jam toariŋ ale ka kikaasa a te ba. Mi jam nak nidoama gela kama ale dari ba zuisaŋa a vɔssi. Mi jam basi kama ate ba nye pɛka Wen yuenni nyiŋ ayen, <

²⁶ Ku jam daa faarika de choa ate Izirali naawa Solomon a jam va nye biemu la? Tɛŋ boanni po naab a jam karo a nye ase wa la. Wen a jam a yaali wa kama ate Wen nye wa naab Izirali meena zuk alege dila meena tɛŋ yonsa liema ate wa jam faari la a ta wa jo ka biem po.

²⁷ Tama a kan wom yɔgyɔgla de ayen nama mɛ a nye gaasaŋa de meena a ka wensie ale ti Wenni a faari tɛŋ yonsa lieba!>>

²⁸ Kaabteerɔ kpioŋku Eliasib nidoabinni Joiada nidoabilisaŋa wanyi jam ka Yoron denɔwa Sanballat chicham biik. Mi jam yiak wa kama m jigi.

²⁹ Teeri ba wari m Wen yaa, dii nyiŋla ba taŋ kaabteerɔ tuini ale kaabteerɔma ale Livaima nɔiyeŋka kama.

³⁰ Dila mi yaa nye ate kaabteerɔma ale Livaima a nye cheri a nyini dii meena ale ka wachaŋ la po ale te ba tuima waai meena ale wa le magsi wa nye dii.

³¹ Mi jam maa basi ate Izirali demma cheesi ka daata mɛ daaŋa gela a magsi yɔn ŋaai ale dɛ niŋ a bɛ la. Teeri mu ale ŋmanteka m Wen yaa.