Neyemia 12 - WEN GBAŊKA

¹ Kaabteerɔma ale Livaima baai ale jam va Sealtiel nidoabinni Zerubabel ale Jesua a ŋmani la ale nna: Seraiya ale Jeremaya ale Ezra

² ale Amariya ale Malluk ale Yattus

³ ale Sekania ale Areyum ale Meremot

⁴ ale Iddo ale Ginneton ale Abaija

⁵ ale Mijamin ale Moadia ale Bilga

⁶ ale Sɛmaiya ale Joiarib ale Jedaya

⁷ ale Sallu ale Amok ale Yilkia ale Jedaya. Ba de ale jam chim kaabteerɔma ale ba ŋaaŋviirɔma niŋdeerɔba Jesua daaŋa po.

⁸ Livaima ale nna: Jesua ale Binnui ale Kadmiel ale Serebia ale Juda ale Mattania waai ale wa ŋaaŋviirɔma ale jam a dɛ jiam teka yiilaŋa niŋ.

⁹ Bakbukia ale Unni ale baai ale a vi ba ŋaaŋ la a zaani a tuk ba tama tuka po.

¹⁰ Jesua ale jam biak Joiakim ate Joiakim a jam biak Eliasib ate Eliasib a jam biak Joiada

¹¹ ate Joiada a jam biak Jonatan ate Jonatan mɛ a jam biak Jaddua.

¹² Joiakim daaŋa po ate baai a jam dɛ kaabteerɔma dɔkdemma niŋ la ale nna: Seraiya dɔkdemma po jam ka Meraia. Jeremaya dɔkdemma po jam ka Yanania.

¹³ Ezra dɔkdemma po jam ka Mesullam. Amariya dɔkdemma po jam ka Jeyoyanan.

¹⁴ Malluk dɔkdemma po jam ka Jonatan. Sebania dɔkdemma po jam ka Josefi.

¹⁵ Yarim dɔkdemma po jam ka Adna. Meraiot dɔkdemma po jam ka Yelkai.

¹⁶ Iddo dɔkdemma po jam ka Zakaria. Ginneton dɔkdemma po jam ka Mesullam.

¹⁷ Abaija dɔkdemma po jam ka Zikri. Miniamin ale Moadia dɔkdemma po jam ka Piltai.

¹⁸ Bilga dɔkdemma po jam ka Sammua. Sɛmaiya dɔkdemma po jam ka Jeyonatan.

¹⁹ Joiarib dɔkdemma po jam ka Mattenai. Jedaya dɔkdemma po jam ka Uzzi.

²⁰ Sallu dɔkdemma po jam ka Kallai. Amok dɔkdemma po jam ka Eber.

²¹ Yilkia dɔkdemma po jam ka Yasabia. Jedaya dɔkdemma po jam ka Netanel.

²² Eliasib ale Joiada ale Joyanan ale Jaddua ale kaabteerɔma daaŋa po, Livaima dɔkdemma yie nyama a jam ŋmarisi kama Persia naawa Darius daaŋa po.

²³ Yieŋa nyama niŋdeerɔma ale jam bo Livaima ŋaaŋbisaŋa po la a ga paari Eliasib nidoabinni Joyanan daaŋa po la a jam ŋmarisi doa wie gbaŋka po kama.

²⁴ Livaima niŋdeerɔma jam le Yasabia ale Serebia ale Kadmiel nidoabinni Jesua ale ba ŋaaŋviirɔma, baai ale jam za a tuk ba ayen ba, te pimpauk ale jiam, kauk kunyi ale jam a tulisi m kula ase Deevid Naawen nuruwa ale jam biisi diila.

²⁵ Mattania ale Bakbukia ale Obadia ale Mesullam ale Talmon ale Akkub jam le nansuiŋ limisidɔ baai ale jam a limisi ŋanta duenika diinaŋa ale bo nansuiŋtaŋa.

²⁶ Ba jam tom ka Jesua nidoabinni Joiakim ate wa kokpieŋ a nye Jozadak la daaŋa po ale kpagni Neyemia ale kaabteerɔwa ale ŋmarisidoawa Ezra daaŋa po kama.

²⁷ Ba le jam pai Jerusalem parika a nyo Wen nisa po la, ba jam wi Livaima kama a nyini juijui ate ba boro la a ta jam Jerusalem po ayen ba dɛ masim ale yiila ale jiam teka ale sinyaara ale kpanta ale bagansa.

²⁸ Ba jam ta yilendisaŋa a nyini ka tɛŋ kpaŋsaŋa ale gilim Jerusalem la. Tɛŋ kpaŋsaŋa ate ba jam nyini la ale Netofat

²⁹ ale Bet Gilgal ale Geba ale Azmavet diila yilendisaŋa a jam sɛ ka tɛŋ kpaŋsa a te badek a gilim Jerusalem.

³⁰ Ase kaabteerɔma ale Livaima ale jam gomsi badek nna cheri ase ba ale magsi ba nye diila, ba jam maa nye ate nuruma a nye ka cheri ale nansuiŋtaŋa ale parika.

³¹ Mi jam basi ate Juda niŋdeerɔma a jueli ka parika zuk. Mi jam lueri ka yilendɔ boari buye ayen ba te jiam. Yilendisaŋa bunyi ale jam bo parika zuk juga geŋsa a tuk Tamponni Nansuiŋku

³² Yosaya ale Juda niŋdeerɔma geli ale jam va ba a gum chaab ale

³³ Azariya ale Ezra ale Mesullam ale

³⁴ Juda ale Benjamin ale Sɛmaiya ale Jeremaya ale

³⁵ kaabteerɔma gela a ta damunsa ale Jonatan nidoabinni Zakaria mɛ. Jonatan jam ka Sɛmaiya nidoabili. Sɛmaiya waai kowa a jam le Mattania ate wa mɛ ko a nye Mikaiya ate wa mɛ ko a nye Zakkur ate wa mɛ ko a nye Asaf

³⁶ ale wa ŋaaŋviirɔma Sɛmaiya ale Azarel ale Milalai ale Gilalai ale Maai ale Netanel ale Juda ale Yanani ale ŋannaginta tii ate Wen nuruwa Deevid a jam magsi sak ba la. Ŋmarisidoawa Ezra ale jam de ba niŋ.

³⁷ Bulik Nansuiŋku ba jam tom du kama a va Deevid Tɛŋka tiilaŋa a jueli parika jigini a gaam Deevid yenni taam cheŋ Nyiamu Nansuiŋku kori geŋsa.

³⁸ Yilendisa buyewa po a jam tuk kauk yoŋ. Mi jam va ba kama a jueli parika zuk a gum chaab ale nuruma geli, a ga gaam Boroborok Sɛka Yewɔŋku la a taam paari Parik Labsuku

³⁹ a va Ɛfraim Nansuiŋku ŋmazuk ale Jesana Nansuiŋku ale Juma Nansuiŋku ale Yananel Yewɔŋku ale Kook Yewɔŋku a ta ga paari Piisa Nansuiŋku. Limisidɔma Nansuiŋku ate ba yaa ga zaani.

⁴⁰ Yilendisa buyewa ale jam lenni a te jiamu la yaa zaani ba jiŋŋa Wen yenni po, dila a te mi mɛ a jam nye a gum chaab ale kpaŋŋa geli ale

⁴¹ kaabteerɔma de Eliakim ale Maaseiya ale Miniamin ale Mikaiya ale Elioenai ale Zakaria ale Yanania ale ba damunsa, a maa gum ba po jam ka

⁴² Maaseiya ale Sɛmaiya ale Eleaza ale Uzzi ale Jeyoyanan ale Malkija ale Iilam ale Ezer. Yilendisaŋa ka Jezrayia ale jam a nya ba zuk.

⁴³ Dai dila danni ba jam nye ka kaab kpieŋ, a dɛ masim dii nyiŋla Wen a te ba ka suipeentik nna yegayega. Nipooma ale bimbaansaŋa mɛ a jam dɛ ka masim. Masimu dɛka nuemka Jerusalem po a jam cheŋ ka nna niŋniŋŋa.

⁴⁴ Dila powa ba jam lueri ka nidoaba ayen ba a nya ŋanta duenika diina zuk ate ba cheesika ŋantaŋa ale ŋandiin tii ale dɛ niŋ a bɛ la ale ba piika a duak du la. A nyini tattaŋa ale gilim ba tɛŋsaŋa la po, ba a magsi ba ta jam ŋanta duenika diinaŋa po ka Sinsaŋŋa ale weeni ayen ba te kaabteerɔma ale Livaima ale a tom la. Diila Juda sui a jam peenti ale kaabteerɔma ale Livaima tuimaŋa kama.

⁴⁵ Ba jam a tom ba Wenni tuimaŋa kama ale a tom cheri nyeka tuimaŋa ase yilendisaŋa ale nansuiŋ limisidɔma ale jam a nye dii a ta va Deevid ale wa nidoabinni Solomon ale jam weeni diila.

⁴⁶ Dipowa, Deevid ale Asaf daaŋa po, niŋdeerɔba ale jam boro a nya yilendisaŋa ale Wen pimpauk ale jiam teka zuk.

⁴⁷ Dila Zerubabel ale Neyemia daaŋa po, Izirali demma meena a jam a cheesi ba danni po cheesuŋku kama a te yilendisaŋa ale nansuiŋ limisidɔma. Ba jam pai cheesuŋku kauk mɛ kama a magsi Livaima ate Livaima mɛ a pai dii ale magsi ku cheŋ Aaron ŋaaŋbisaŋa jigi la a te ba.