Nayum 3 - WEN GBAŊKA

¹ Ku le bie te Niineve tɛŋka diila ba ko ka nuruba yega. Ka ka venta nyiini alege zu tɛŋ yonsa ŋanta. Ka kasim a ko kama.

² A wom finsaŋa miirika ale torokoma naŋsaŋa nuemka. Wom wusumaŋa ale yɔk a tabi la ale torokoma ale dari a nuem la.

³ Wusuma nyiŋsa a toariŋ ate gebik woŋsa a nyaksi ate gbatta mɛ a nyaksi. Nuruba yega ale kpi a vi chaab zuk a ka chiina. Ate nuruba a tabi ba zuk a lo a yiti.

⁴ Tɛŋka a nye ka nna ase nipok kaasuŋ la. A yaali porisika ale a nye nuruba ale tiita. A pai ka kaasuŋ nyeka ale sakpaŋni a basi ate tɛŋsa a chim ka yɔm.

⁵ Naawen Dii Ale A Dɛ Tugurik Tɔŋdɔma Niŋ La ale weeni ayen, <

⁶ M le nye ni m kan sak zula abe m lik ni ale daŋta ate nuruba kasim a nya ni.

⁷ Waai meena a dan nya ni ba le yiti a chali abe ba a weeni ayen, Ka wana le wa kum ka nyiŋŋa? Niineve demma, mi ale nya ka wana ate wa nye ate ni sue yɔk.>>

⁸ Ni an zunchoŋ Tebes tɛŋka ale moata Nile benni ate nyiam gilim ka la. Nyiamu, ale jam kasi ka. Nyiamu jam a nye ase ka parik la gilim ka.

⁹ Kus ale Ejipiti a te ba pagrim buui ale kaa nueri. Put ale Libia mɛ a maa maari ka.

¹⁰ Alege ba yik Tebes demma ate ba ga bo tɛŋ yoŋ. Ba bimbaan fiisaŋa ba nak ba ko dueni suitaŋa niŋsa. Ba niŋdeerɔma ba yik ba ale chɔrima a ta cheŋ.

¹¹ Niineve demma ni le nyu daam buk. Ni le suk. Ni le gisi yaali jigi ayen dachaasaŋa kan nya ni.

¹² Ni ŋan kasintaŋa meena a nye ase kinkaŋsa ale ta moota la. Ba dan zaŋ tiimu, yɔnaŋa deri lo dɛɛrɔwa nɔi po.

¹³ Ni nya ni tugurik tɔŋdɔma. Ba meena ka nipooba. Ni tɛŋka tuataŋa a lak kama a magsi ayen dachaasaŋa a jo. Bolim a dɛ ni tuataŋa daataŋa.

¹⁴ Ni ŋari nyiam zuak alege ti kpaliŋ le za ka beni la piilim. Ni basi ate ni ŋan kasintaŋa a pagra. Ni yaali yak a dam ni tanta a nak peela.

¹⁵ Dula jigini bolimu ale dɛ ni. Gebika ale ko ni. Kpaliŋka ale ko ni ka meena ase nanchoŋta ale dɛ ŋanta vaata diila. Ni be piisi yega ase nanchoŋta ale yɔk a cheŋ. Ni piisi yega ase tintue la.

¹⁶ Ni geruŋdɔma a piisi a gaam chiŋmarisaŋa ale bo wenzukku la kama, alege a nye ase tintue la, a dɛ jaab meena ale yiti cheŋ.

¹⁷ Ni limisidɔma a nye ase ka tintue la a bo saasaŋa nyiŋ da di dai ate ku yɔk la. Alege kantueŋka a dan jam ŋa yiti cheŋ ate waai zɛ ŋa le ga juijui la.

¹⁸ Assiria naaba, fi kpaŋŋa kpi kama ate fi nuru baai ale ta zula la a goa takakaka. Fi nuruma a waaŋ bo guutaŋa zuima ate waai karo a ta ba a jam yeri ŋmana.

¹⁹ Ni le kɔni ale nya tueta la tebika karo ate ni a nya nyiŋyɔgsa. Baai meena le wom ni tɛŋka kaasika la a nak ka nichaala a naŋ diila waai meena ku jo wa nyiŋ kama ale ni nyeka tuemu ale kaa nueri la.