Maika 7 - WEN GBAŊKA

¹ Niniga nuru ale mi! Mi a nye ase ka waai ale a yiisi yɔna kaduk po wenkarik diila. Yɔn saga a karo ate m le dɛ. Kinkama ŋaai ale kpabi a yɔni ate m ta koarisa ale ŋa la mɛ karo.

² Wensie nuruba a ka tɛŋka zuwa. Wanyi mɛ la an tali ya. Nuru meena kali kama a yaali kpaliŋ a pai ŋmiak a yik wa suok.

³ Ba nisaŋa meena a korisi ale biem nyeka kama. Kpagni a yaali tiirita, ate waai ale a bo buusa la a tuesi ŋan baai ate ba pai a da wa la. Pagrɔma ale a sak ba ale a yaali jabuui la. Ba a nya ka chaab a tom ba tuimaŋa.

⁴ Waai ale nala ba po la a nye ase ka wobi la, ate nuru maŋka ba po a gaam muŋ. Fi limisidɔma danni a paari ya, di danni ate Wen ale jam fi jigi la. Yɔgyɔgla de ale ba butimka dai.

⁵ Kan ta mariŋka ale waai ale kali moata fu. Kan ta sebchakka ale fi doa. Poom le waai ale a duak fi nigoruk po. Be kpesi fi wieŋa a paari abe fi ge a biisi.

⁶ Diila nidoabili a kan zuli wa ko, ate lie ale yiti a ta chaab ale wa ma, ate sampok ale yiti a ta chaab ale wa ŋiak nipok. Nuru dachiak a nyini ka wadek yeri po.

⁷ Alege dan ka mi, m yiilaŋa a bo ka Naawen jigi. Mi a limisi ka Wen m varibasidɔwa. M Wenni ale wom mu.

⁸ M dachiagaa, kan te fi sui a peenti ale m lueta. M dan poom lo, m le ŋman yiti. M dan poom kala legi po, Naawen ale chim m bolim.

⁹ Dii nyiŋla m tom kaasi wa kama, ate ku magsi ayen m tu chaab ale wa suipuurumu, ate ku ga paari diipo ate wa le biisi te mu a ŋman nye mu a magsi la. Wa ale ta mu a nyini peelim ale bolim. M le nya wa wayɔrisimaŋa.

¹⁰ Ate m dachiaka ale nya ate chivie a yik wa, ate waai ale jam weeni mi ayen, <> M ninaŋa ale nya wa lueta. Ba poom ŋaam tabi wa kama ase tantaŋa ale doa suiku po diila.

¹¹ Fi parisaŋa sɛka danni ale paari. Fi tɛŋ banaŋa lagrika danni a cheena.

¹² Dai dila danni nuruba ale nyini Assiria ale Ejipiti tɛŋ ninaŋa a ŋman nyini Ejipiti a ga paari Benni a jam fi jigi a nyini nyakpiem a ga paari nyakpiem, a nyini guuk a ga paari guuk.

¹³ Tɛŋzuk de a doa koruk ka nuruma tuimaŋa nyiŋ.

¹⁴ Pai fi tachekka a kasi fi nuruma. Duŋsaŋa ale fi nitalim ate si dek a bo gɔi tɛŋ maŋka ate wuyɔgsuk a boro la. Basi ate si a dɛ Basan ale Gilead ase dila po wa la.

¹⁵ <>

¹⁶ Tɛŋ kpieŋsa ale nya ate chivie a yik ba, ate ba pagrimu ale yalima ale ba. Ba ale pai ba nisa a vi ba noaŋa zuk ate ba tueŋa ale kpari.

¹⁷ Ba ale leeli tanta ase waab la, abe ba kuuk tɛŋ ase duŋsaŋa la. Ba le nyini ba diinaŋa po ale kpazinagsuk. Ba ale viriŋ cheŋ Naawen ti Wenni jigi ale kpazinagsuk ate ba ale chali fu.

¹⁸ Wen dina ale a nye ase fi la, ate fi a vɔŋ fi nuru baai ale tali boro la wabaata ale ba nye kaasuŋ a te ba? Fi sui a kan puuri gaam a taam, dii nyiŋ la fi kasim a yaali ŋmanteka kama.

¹⁹ Fi ale ŋman ta jiirim ale ti. Fi ale tabi ti wabaataŋa zuk abe fi yuk ti biemu meena a basi nyakpiemu liuŋku po.

²⁰ Fi ale ta wensie ale Jekob, abe fi sak ŋmanteka ale Abrayam ase fi ale jam puulim a te ti koma dipo diila.