Maika 1 - WEN GBAŊKA

¹ Naawen wa dii ale jan jam Maika ale nyini Moreset la jigi. Di jam ka va ŋaai po ate Jotam dɛ naam ate Ayazi a jam dɛ ate Azekaya mɛ a jam dɛ Juda la. Wa le jam nya wa dii a magsi chaab ale Samaria ale Jerusalem la ale nna:

² Nuruba, ni wom, ni meena abe wom, tɛŋzuk de ale baai meena ale bo ka po la, ayen Nyɔnɔwa Naawen a nya ni ale nye dii a kaasi la kama. Nyɔnɔwa a nyini ka wa yenni po.

³ Nya! Naawen a nyini ka wa bo ka jigini a cheena. Wa siŋ cheen kama ayen wa tabi tɛŋzuk de guutaŋa zuk.

⁴ Guutaŋa a nyaliŋ kama wa naŋtaata po, ate vaasaŋa a lab ase bolim ale paari zirima diila ase nyiam ale va churintika jigi a siŋ diila.

⁵ Nya kude meena ka Jekob nye kaasuŋku ale Izirali wabaataŋa nyiŋ. Ka boa ale Jekob nye kaasuŋku? Ku daa Samaria? Ka boa ale Juda puusika jigini? Daa Jerusalem?

⁶ <

⁷ Ka bɔgtaŋa meena ale ŋɔriŋ nna bunabuna. Ka yenni tiiritaŋa meena ale dɛ bolim. M le kaasi ka ŋanmɛɛntaŋa meena. Ka ale toalim a tigsi ka tiiritaŋa a nyini ka taabuksa tutuna jigi la, ase taabuksa tutuna la ate ba ale ŋman pai ŋa a tom.>>

⁸ Nya kude nyiŋ m le kum abe m wooli. M le cheŋ naŋta bie ale chaboala. M le wooli ase gɔi biak la, abe m siŋti ase viuk la.

⁹ Diila wa niraŋa a kan nueri. Ku cheŋ paarika Juda. Ku paarika m nuruma Jerusalem dek nansuiŋku nɔi.

¹⁰ Kan weeni ku Gat po. Kan poom kum. Bilim fidek Bet Ofra paasuku po.

¹¹ Nama baai ale bo Safir po la, ni cheŋ chaboala ale chivie. Baai ale bo Zaanan po la a kan nyini peelim. Bet Ezel a bo ka kumsa po. Ba pai jabuui ale a nya ba zuk la kama ta cheŋ.

¹² Baai ale bo Marot la a viriŋ ale ka nyiŋdomma a limisi nyiŋyɔgsa, dii nyiŋla kaasuŋ a nyini ka Naawen jigi a jam, a poom ga paari Jerusalem nansuiŋku nɔi.

¹³ Nama baai ale bo Lachis la, ni bobi wusumaŋa a maŋ torokowa. Nama ale piilim a nye Zayon Liewa biem. Dii nyiŋla ba nya Izirali wabaataŋa ka fi po.

¹⁴ Dila nyiŋ ni ale te Moreset Gat basika tiirita. Akzib tɛŋka ale paasi Izirali nalimaŋa.

¹⁵ M le basi ate nakdeerɔ a jam nama baai ale bo Maresa po la zuk. Waai ale ka Izirali zula la ale jam Adullam.

¹⁶ Ni poni ni zuimaŋa abe ni a kum ni bisaŋa ate ni ta suipeentik ba nyiŋla. Ni nye ate ni zuimaŋa a kpa ase duiŋ la, diila bisaŋa ale nyini ni jigi kama a cheŋ tɛŋ yoŋ po.