Kumsa 5 - WEN GBAŊKA

¹ Naawen yaa, teeri dii meena ale nye ti la abe fi nya chivie ŋaai ale a dɛ ti la.

² Ti tɛŋka nicham yaa le soa, ti yeeŋa mɛ nicham yaa le tuesi.

³ Ti a nye ase ka kpiŋsa la a ka koba. Ti mama a nye ase pukɔga la.

⁴ Nya buui ate ti a nyu la se ti da, abe ti da daata mɛ.

⁵ Baai ale a vi la a yaali ayen ba yik ka ti ŋeeŋa. Ti jiak kama yɔgla a kan nya vuusum.

⁶ Ti nye ka nɔiyeŋ ale Ejipiti ale Assiria ayen ti nya ŋandiinta jɔk vuuk.

⁷ Ti kokpieŋsaŋa a tom kaasi fu kama, alege ba ŋman ka. Yɔgyɔgla de tama a nam ka ba wabaataŋa nyiŋ.

⁸ Yɔm yaa le chim tama kpaga, nuru be karo a vari ti ba nisa po a basi.

⁹ Ti bola nya ka kum ale a jo bu po a gisi ŋandiinta. Ti kasim a tu ka kum gɔnni po.

¹⁰ Ti nyiŋ gbaŋsaŋa yaa toliŋ kama ase boroborok seka dɔk la kom le a ko ti.

¹¹ Dachaasaŋa yik Zayon nipooma ale nipokbilisaŋa ale bo Juda tɛŋsaŋa po la.

¹² Ba bobi nabisa nisima a yik ate nisɔm kan ŋmaa nya zula.

¹³ Ba yik nidoa paalukku ate ba a num zueta alege ate nidoabilisa ji da dobrita a cheŋ a ja.

¹⁴ Nisɔmma an ŋmaa kali nansuiŋtaŋa noa, nidoa paalukku mɛ an ŋmaa yi yiila.

¹⁵ Ti ŋman ka suipeentiga. Ti gɔgtaŋa yaa tulim chim ka kumsa.

¹⁶ Naam zutɔgsaŋa yaa lak ti zuimaŋa po. Ku yaa bie ti jigi ka nna yegayega ti le tom kaasi la nyiŋ.

¹⁷ Kude nyiŋ ti ka yiila. Ti nina kan ŋmaa nya.

¹⁸ Zayon Guuku yaa doa ka koruk ate gɔi baasa yaa boro nyiem cheŋ a gilim.

¹⁹ Naawen yaa, a dɛ naam taam wuu. Fi le chim ti naab yɔgyɔgla de a cheŋ.

²⁰ Ka boa ate fi baŋ ti wie ate ku beni nna? Fi basi ti kama?

²¹ Naawen yaa, ta ti ŋman, ti ŋman jam. Basi ate ti daaŋa ŋmaa nye ase ŋa le jam ka diila,

²² yaa fi din chiib zɛri ti kama? Fi sui ale daa puuri ale ti?