Kumsa 3 - WEN GBAŊKA

¹ Mi ka nuru waai ale nya ninam ale bu nyini Naawen jigi a cheena wa suinni ale a puuri la nyiŋ.

² Wa ta mu jo legi po, daa juijui ale a nya.

³ Wa teeri ka nisa a kasim ta chaab ale mu daa meena.

⁴ Wa basi kama ate m nyiŋka buk ate m koba a nye nna ase ŋa wɛ la.

⁵ Wa wi mu kama ale sui kaasuŋ a ta chaab ale mu ale suipuurum.

⁶ Naawen basi kama ate m kali legi po ase baai ale kpi dipo dipo la.

⁷ Wa lik mu kama tapi ate mi an baga a nyini, ale pai chɔrin kpiema a vi m zuk.

⁸ Ate mi a kaari a saalim a yaali maarika, alege wa zɛri m puusaŋa.

⁹ Wa lik m suiku ale ka tintana parik ate m va suik kuui ale kan magsi la.

¹⁰ Naawen a nye ase ka piuk ale gomsi ku yik mu la, nna ase gbeŋli ale suk doa a limisi mu la.

¹¹ Wa ta mu va ka suik kaasuŋku ate m bɛ ate wa yaa basi mu m ka maarɔ.

¹² Wa gomsi kama ayen wa tɔŋ wa tommu. Wa tuk wa peeŋa ka m nyiŋ.

¹³ Wa yeeri wa peemaŋa ka pakka po a tɔŋ m zuzugtaŋa.

¹⁴ Mi yaa chim laata a te nuruma. Ate ba a yi yiila a nye mu a la daaŋa meena.

¹⁵ Naawen basi kama ate niniga a jo mu. Wa basi kama ate m buk ale ninam.

¹⁶ Wa voori m nyina ale ziŋa ale tabi mu a feri daŋta po.

¹⁷ M ŋman ka suiyɔgni. M baŋ jabuui ate ba a wi ayen suipeentik la kama.

¹⁸ Mi yaa weeni ayen, <>

¹⁹ Mi a teeri m ninammu ale m niniŋŋa ale m suipuurumu ale daanika.

²⁰ Mi a saalim teeri m wie abe fi poli m wie.

²¹ Alege m ta yiila kama ase m nin poli nna.

²² Naawen ŋmanteka kan kpegli, wa jiirimu mɛ kan kpegli.

²³ Ŋa ka wa paala saluik meena. Fi wensieŋa zuak ka yega.

²⁴ Mi yaa weeni m dek ayen, <

²⁵ Naawen a nala te baai yiila ale bo ale wa ale a gisi wa la.

²⁶ Ku nala kama ale fi le nye nna chim a limisi ate Naawen a vari fu basi.

²⁷ Ku nala kama ate nuru a dan diem paala wa a tom nalimnyiini.

²⁸ Wa kali tɛŋ nna chim, Naawen a te wa ka tuim pagra ayen wa tom.

²⁹ Wa koori tɛŋ, da di dai yiila diem boro.

³⁰ Wa basi ate waai a fɔbi wa tapiaka. Wa basi ate chivie yik wa.

³¹ Nyɔnɔwa a kan zɛri wa nuruma taam wuu.

³² Wa dan poom ta suipuurum jam ni jigi, wa ta jiirim ale ŋmanteka kama.

³³ Wa kan yaali nuruba namsika yaase wa nye ate ba sue a kaasi.

³⁴ Wa a nya kama ase tɛŋka zuk ba nin ŋɔriŋ ligrɔ a basi wa naŋsa po.

³⁵ Wa a nya kama ase ba nin kan nye waai a magsi wa Wen Dii Ale Bo Wenŋmazuk La niŋŋa.

³⁶ Nyɔnɔwa a nya kama ase waai a nin ta wensie alege ate ba bo mini wa biisa dɔkku.

³⁷ Nuru karo a biisi ate wari a nye se ka Nyɔnɔwa a nin te suik.

³⁸ Wabaata ale wamaŋsa meena ka Wen Dii Ale Bo Wenŋmazuk La ale te suik ate ŋa a jam.

³⁹ Wa dan namsi waai wa wabaata nyiŋ wa kan fɔbili.

⁴⁰ Ni basi ate ti kpesi nya ti le tom diila abe ti ŋman jam Naawen jigi.

⁴¹ Ni te ti zak nisa wen a puusi a nyini ti suiniima po a te Wen dii ale bo wenŋmazuk la.

⁴² Ti tom ka wabaata ale kisi fu ate fi an vɔŋ a te ti.

⁴³ Fi din lik fidek ale ka suipuurum a vi ti. A ko ti alege an sak jiirim ale ti.

⁴⁴ Fi din lik fidek ale ka chiŋmari ate ti puusa an baga a paari fu.

⁴⁵ Fi nye kama ate tama ŋman ka kiri tɛŋ yonsa po.

⁴⁶ Ti dachaasaŋa meena a lak ba noa a biisi ti a kaasi.

⁴⁷ Yɔgsum yaa le yik ti, kaasuŋ yega a paari ti.

⁴⁸ M ninyaata kasim a siŋ, dii nyiŋla fi kaasi m nuruma kama.

⁴⁹ M ninyaata kasim a siŋ ka daa meena a kan basi,

⁵⁰ se ka Naawen wenŋmazuk po a nin chui nya.

⁵¹ M sui kaasi ka yega m ni nya dii ale nye tɛŋka nipok paalukku la.

⁵² Baai ale ka mi dachaasa alege daa wari nyiŋla a va mu kama ase nuim la.

⁵³ Ba pai mu nyo goluk po a pai tana a lɔnsi m zuk.

⁵⁴ Ate nyiam chali va mi zuk, ti mi yen mi za m kpi kama!

⁵⁵ Naawen yaa, mi kaari wi fu golukku po.

⁵⁶ Fi wom mi le a wi la. Kan lik fi tueŋa abe fi zɛri m kaari wi ka.

⁵⁷ Fi jam moata m le wi la, ate fi yaa weeni ayen, <>

⁵⁸ Nyɔnɔ, fi nya m wanni zuk kama, fi da tuesi m nyuvunni kama.

⁵⁹ Naawen yaa, fi nya ba le nye mu dii a kaasi la kama. Yɔgyɔgla de bo m biika a te mu.

⁶⁰ Fi nya m dachaasaŋa ale zɔk dii dueni a te mu la kama.

⁶¹ Naawen yaa, fi wom ba leetaŋa ale ba le zɔk biem buui a te mu la kama.

⁶² M dachaasaŋa a kasim za ka mi ka zaka ale ba wie ale ba popola.

⁶³ Nya, wari meena ti ba a nye la, ba a yi ka yiila a nye mu a la.

⁶⁴ Biem buui meena ate ba tom la. Naawen yaa, tuni ba.

⁶⁵ Basi ate ba ta tukpari abe fi yaa ka basi ba zuk.

⁶⁶ Naawen yaa, pai fi suipuurumu a vi ba a kaasi ba meena tɛŋzuk de.