Kolose 3 - WEN GBAŊKA

¹ Ni yiti kum po kama ale Yeezu Kirisita. Dila nyiŋ, ni basi ate ni popola bo ale ŋan baai nyiini ale bo wenŋmazuk la. Dula jigini ale Kirisitawa kala Wen jigi juga geŋ.

² Dila nyiŋ ku a fɛ kama ayen ni pai ni popola meena a basi dula jigini, ni kan pai ŋa a basi tɛŋzuk de.

³ Dii nyiŋla, nama ale Kirisitawa a maa ka chaab a kpi ate ni nyuvooŋa a yaa bo wa jigi Wen jigi.

⁴ Ni vummu dek abe ale Kirisitawa. Wa be dan pilim ŋman jam, nama mɛ le pilim ŋman jam kama ale wa a maa nya zula ŋaai ate wa me le nya la.

⁵ Yɔgyɔgla de, ku be a fɛ kama ayen ni basi ate tɛŋzuk de wie ŋaai ale bo ni nyiŋsaŋa po a soa ni la, a kpi. Wie ŋala chaama ate mi a weeni la, ale nipok yonta bobi goom ale daŋta tuima ale nipok yaalik ale wabaata yaalika nyeka wie ale butuem. Butuem nyam a nye ase ka bɔgta kaabka la ase ba nin yaali ba ŋantaŋa a gaam Wen.

⁶ Wieŋa de chaab nyiŋ ate Wen le ta suipuurum ale baai meena ale kan a zuli wa nɔi la.

⁷ Dila powa, nama dek kasim jam va ka nyaŋa de chaab a ate ŋa jam soa ni.

⁸ Alege yɔgyɔgla de, ku a fɛ kama ayen ni pai ŋa meena a basi. Wie ŋala chaab ase, suipuurum ale chaab kisika venta biisa ale bibuloarisa meena wuu a kan nyini ni nɔi po a nyini.

⁹ Ni kan a velim a te chaaba dii nyiŋla, ni yuk ni nye kpakka ale ka biem nyeelaŋa a basi la

¹⁰ alege yaa pai nye paalik a tara ale a nye ale sebika ate ka kasim paala a neesi ka nyeerɔwa.

¹¹ Dila nyiŋla, waai ale kan daa Juu ale waai me ale ka Juu, ku daa tɔgatɔga, waai ale gebi wa yoari ale waai ale kan gebiya, ba ka bunyi, nicham ale baai ale bo gɔi po ale yɔm, ale baai ale kan daa yɔm, bala meena Kirisitawa soa kama. Wa be bo ale ba meena kama.

¹² Ni ka Wen nuruba. Wa ta yaalika ale ni kama a yaa lueri ni a te wadek. Dila nyiŋ, ku a fɛ kama ayen ni pai jiirim ale zula ale zaab m dek ale ŋmam ŋmam nyeka ale chichiiba ase gatta la a jo.

¹³ Ni ta jiirim ale suduŋni ale vɔŋteka ale chaab diipo meena wuu ase ni wanyi a nin nye wari a kaasi wa choa. Ku a fɛ kama ayen ni a vɔŋ a te chaab ase Naawen ale vɔŋ a te ni diila.

¹⁴ Nyaŋa de meena zuk, ni pai yaalika a vi du. Dii nyiŋla, yaalika ale a yik wie meena a niak chaab.

¹⁵ Suiyɔgni dii ate Kirisitawa a te ni la, dila ale di maari ni ale wie ŋaai meena ate ni ta a poli ayen ni nye la. Boan nyiŋŋa, ka suiyɔgni de choawa ate Wen wi ni a pai nyo jigi yeŋ ayen ni a nye ase ni ka nyiŋ yeŋ la. Abe ni a nye Wen jiam.

¹⁶ Ku a fɛ kama ayen Kirisitawa tomtomika ale ka masimu meena a bo ni suiniima po. Ni pai yam a sak chaab abe ni a kaam chaab. Ni pai Wen wanni a yi yiila, ni a yi yi ŋaai ale a pak Yeezu la ale yi ŋaai ate Wen Chiika a te ni ale ni suiniima a nye Wen jiam.

¹⁷ Wie meena ate ni a nye yaase ni a biisi, ni pai Nyɔnɔwa Yeezu Kirisita yuenni a nye ase ni ale pai wa yuenni a nye Wen ti Kowa jiam diila.

¹⁸ Pooba, ku a fɛ kama ayen, ase Kirisita bisa la, ni a te ni chorɔma zula nalimnyiini.

¹⁹ Chorɔba, nama mɛ ku a fɛ kama ayen ni a yaali ni pooma abe ni kan biisi ba a kaasi.

²⁰ Bisa, ku ka Kirisita bisa tuini ate ni kasim a zuli ni nyama, dii nyiŋla, dila a te Naawen ka popeentik.

²¹ Nyama, ni kan a nye ate ni bisaŋa sue a puuri. Ni dan a nye dila ba a jɔk ka nyiŋbiiri wie nyeka po.

²² Yɔmma, nama mɛ a te baai ale soa ni la zula wie meena po. Ku daa ka ba ale a nya ni ase ni nin boro a tom tuini ayen ba ale a nya ni la abe ni tom ate ba yaali ni, alege ni a tom ale ni suiniima meena dii nyiŋla, ni ale a te Naawen zula la nyiŋ.

²³ Dii meena ate ni a tom la, ni a tom ale ni suiniima meena ase ni a tom a te ka Naawen la alege daa nuruba.

²⁴ Ni a teeri Naawen ale wa pai tutuna ŋaai a te wa nuruma la, ŋala dekdega ate wa le pai te nama mɛ. Dii nyiŋla, Kirisitawa sum ale Naawen ate ni tom a te.

²⁵ Wakaasima nyeerɔ meena, le nya wa tutuna kama a magsi chaab ale wie ŋaai meena ate wa nye la. Dii nyiŋla, Wen pai ka buusa yena a bo waai meena.