Kolose 2 - WEN GBAŊKA

¹ Ni basi ate m weeni sak ni mi ale tom nna yegayega a te nama ale nuru baai mɛ ale bo Laodisia la ale baai meena ale kan seba mi dek la.

² Mi a weeni nya kude a sak ni kama ayen ku deŋsi ba kpa ate ba jam jigi yeŋ ale yaalika. Dila dan nye, wensie miŋ chakka le basi ate ni sum seba nya kude chak nalimnyiini. Nya kude abe dan nye, ba le seba Wen wasusugni ale ka diila. Wasusugni de abe ale Kirisitawa dek.

³ Wala ale saafiik kaai ale baga a lak Wen Yammu ale wa sebchakka ale suk juijui la ate ti a nya.

⁴ M be a weeni ni kama yɔgla ayen, ni kan basi ate waai a baga pai wie ŋaai ale kan daa wensie la a paasi ni. Ŋa dan poom a nye ase wamaŋsa la, ni kan siagi.

⁵ Alege boan nyiŋŋa, m karo ale ni, alege m boro ale ni kama Wen Chiika nyiŋ. M sui be peenti ka nna yegayega ate m nya ni kasim chiib zaani nalimnyiini dii ale ni siaka ale Kirisitawa la.

⁶ Ase ni ale siak a te Yeezu Kirisita ayen wa ka ni Nyɔnɔ la, ni be kasim chim bunyi ale wa.

⁷ Ni basi ate ni nina muni ale wa, ni pai ni nyeboka meena a te wa, abe ni basi ate ni siaka ale wa a pagra ase ba ale jam sak ni diila. Ni abe kasim a te wa jiam mɛ.

⁸ Ni be kpesi nidek ate waai a kan pai nurubiik pimpaasima yam buui ale nyini nuruba jigi ale tɛŋzuk ale wenŋmazuk chichirisa jigi la ate ni chim yɔm. Ni pai yam buui nyiini ale nyini Kirisitawa jigi la.

⁹ Wie ŋaai meena ale ta wari a nye ale Wen la, a bo ka Kirisitawa ale wa ale ka nurubiik la jigi.

¹⁰ Ni be ta nyuvuri kama nalimnyiini ni le chim bunyiwa ale wa la nyiŋ. Wa ta pagrim ka nna yegayega a gaam chichirisa meena ale pagra la.

¹¹ Nama ale Kirisitawa ale ka bunyi la, ku a nye ase nama gebi ni yoaŋa kama la. Daa ayen ka nuru bisa ale a gebi ba yoaŋa diila, alege ka Kirisitawa dek ale gebi ni yoaŋa. Gebika de a sak kama ayen Kirisitawa vari ni a ta nyini biemu de buui ale ka tama dek biem la po a basi.

¹² Boan nyiŋŋa, diipo ate ni tuesi soka la, ku a nye ase ba maa gu nama mɛ ale Yeezu Kirisita kama la. Ku be ŋman a nye ase ni ŋman maa yiti kum po kama ale Yeezu Kirisita la. Be ka ni siaka ale Wen pagrimu ale soa diila ate wa nak wa yiti kum po la.

¹³ Dila powa, ni ale jam kan ta siak la, ku jam a nye ase ni kpi kama la ni wabaataŋa nyiŋ ale ni ale jam kan daa Juuba a ta Moosis Sinsaŋŋa la nyiŋ. Alege yɔgyɔgla de, Wen yaa ta ni jam ka Kirisita jigi a te ni vum. Wen vɔŋ ti meena wabaataŋa a te ti kama.

¹⁴ Ti waba tii meena ale ŋmarisi doa ale ŋa sinsaŋŋa meena la, Kirisitawa ko ŋa meena a basi kama a pai ŋa kpi maŋ Kirisitawa kummu jabarimu nyiŋ.

¹⁵ Jabarimu de zuk ale Kirisitawa basi ate chichirisa pagrim ale kpaga pagrimu a chim kinla nyiŋ, a yaa basi ate waai meena nya ba chivie a sak ase wa ale ta pagrim la.

¹⁶ Dila nyiŋ, ni kan basi ate nuru a te sinsaŋŋa a magsi chaab ale jabuui ate ni le dɛ yaase ni nyu, yaase da ŋaai ale welema ale ŋaai ale kan welema yaase Chi Paalika Tigini yaase wari a magsi chaab ale Vuusum Danni.

¹⁷ Nyaŋa de meena ka chum da dii dai wie yisuŋta. Wensie wieŋa bo ka Kirisitawa jigi.

¹⁸ Ni kan basi ate nuru waai nya ni nueri a weeni ayen wa ta pagrim a baga a nya wie ase gɔdaasima la alege nama kan nya ŋa. Ni kan basi mɛ ate waai ale a velim ayen wa a zaab wadek kama la, ale waai mɛ ale a fɛ ayen nuruba a puusi Wen maarɔma la, ni kan basi ate nuru wala choa a nya ni nueri ale wieŋa de chaaba. Boan nyiŋŋa, nuru wala choa a kasim sueri ale ka kanjanta ale wadek popola.

¹⁹ Wala choa abe pai Kirisitawa waai ale soa nyiŋka meena a nya la a basi kama. Kirisitawa ale soa Kirisita bisaŋa ale a nye ase wa nyiŋka la meena a nya ate ka a chim nalimnyiini ale ka kunaŋa ale kobaŋa ate ŋa a chim ase Wen ale a yaali ayen nyiŋka a chim diila.

²⁰ Nama ale Kirisitawa a maa chaab kpi kama. Dila nyiŋla, chichirik sii meena ale soa tɛŋzuk de ale wenŋmazuk de meena an ŋman soa ni. Be ka boan ale ŋman soa ate ni boka a nye ase baai ate Kirisitawa an soa tɛŋka de zuk la? Ka boa le soa ate ni diem siak a te sinsak ŋaai chaab ale a weeni ayen,

²¹ <> yaase <> yaase <>

²² Sinsaŋŋa de chaab a biisi a magsi chaab ale ka jaabuuri meena wuu ate fi dan ga pai wa tom tuini, wa ŋman ka kiri diila. Ŋala meena ka nurubiik dek ale dueni wa sinsaŋŋa a sak ŋa.

²³ Sinsak ŋala chaab a nye ase ka ba yam buui ate ba tara a fɛ ayen nuruba a puusi Wen maarɔba abe ba a paasi badek ayen ba a zaab ka badek. Sinsaŋ ŋala maari a basi kama ate nuruba a namsi ba nyiŋsa nalimnyiini. Ŋa an baga a nye ate fi a fɛ fi nyiŋka ate fi kan tom wabiowa.