Kolose 1 - WEN GBAŊKA

¹ Mi Pɔɔl waai ale ka Yeezu Kirisita tuimtomdɔ Wen yaalika nyiŋ la ale ŋmarisi gbaŋka de, ate mi ale ti suoku Timoti

² a puusi ti suataŋa ale welema ale ta siaka ale Kirisita a bo Kolose la. Wen ti Kowa ŋmanteka ale wa suiyɔgni a bo le ni.

³ Daa meena ate ti nyiem a puusi Wen la ti a nye ti Nyɔnɔwa Yeezu Kirisita Kowa Wen jiam kama. Ti nyiem dan boro a puusi Wen, ti maari a puusi a te nama mɛ kama.

⁴ Ti wom ni siaka ale Yeezu Kirisita ale soa diila kama ale ni yaalika ale Wen nuruma meena ale soa dii mɛ la kama.

⁵ Wen tomtomiŋ maŋka ale liŋ jan jam ni jigi diipo la ni jam wom yiila ŋaai ate ŋa jam pai te ni la kama. Dila nyiŋla ka ni siaka nyiŋ ale soa ate ni a limisi jabuui ate ni le nya la. Jabula abe bo ka wenŋmazuk. Jaab jaab abe kan kaasi wa.

⁶ Ase diipo ate ni liŋ wom Wen ŋmanteka wie ate ni sum seba ayen ku sum ka wensie la, a zaani dipo a jam paari jinla, Wen tomtomiŋ maŋka a kasim ta ka wamaŋsa nyiini a jam tɛŋzuk de meena ase tomtomiŋ maŋka ale kasim a nye dii a te nama a ta nyini da dii danni ate ni liŋ wom ka la.

⁷ Ni be wom Wen niauŋku wie kama ti tomteerɔ choawa jigi. Wa ka waai abe ale sum ka Kirisitawa tomteerɔ maŋ a yaa tagri tama zuk a tom la.

⁸ Wa be weeni a sak ti mɛ Wen Chiika ale basi ate ni ta yaalika ale chaab diila.

⁹ Dila nyiŋla, diipo ate tama wom ni wie la, tama kasim a puusi Wen a te ni ka dila. Ti a juisi Wen kama ayen wa le basi ate ni sum ta miŋ chakka ale wadek yaalika ale ka diila. Abe wa sueri ni ale yam buui ale miŋchak kaai ate Wen Chiika a te ni la.

¹⁰ Dila abe dan nye, ni le baga a boro a kasim a nye dii meena ate Naawen a yaali ate ku a te wa popeentik la. Ni nyeboka po, ni le kasim a nye ka wamaŋsa nna yegayega tɔgatɔga ate ni a chim abe ni seba ayen ni sum seba Wen kama.

¹¹ Ti a saalim wa kama ayen wa le pai wa pagrim kpiemu a te ni ate ni baga zaani wie meena po ale chichiiba nalimnyiini.

¹² Abe ni kasim a te Wen ti Kowa jiam ale popeentik dii nyiŋla, ka wala ale basi ayen ni nya suik a maa nya ŋan baai ate Wen nuruma le nya la. Nuruma de abe bo ka Wen naamu po juijui ate legi karo la.

¹³ Wen vari ti kama a ta nyini legini po a ta ti nalimnyiini a ga jo wa naam buui ate wadek nidoabinni a soa la.

¹⁴ Nidoabilika de nyiŋ abe le soa ate wa da tuesi ti ale vɔŋ ti wabaataŋa a te ti.

¹⁵ Yeezu Kirisita waai ate ti a nya ale ti nina la alege an baga a nya Wen ale ti nina la, a neensi ka Wen dek waai ate ti an baga a nya wa la. Ka wala ate Wen a te wa kpaŋta jaabuuri meena po, ate wa zuak gaam ba meena.

¹⁶ Dii nyiŋla, Wen va ka wala nyiŋ a nye jaab meena tɛŋzuk de ale wenŋmazuk, ŋan baai ate ti baga a nya ale ŋan baai ate ti an baga nya. Nyaba de meena gum chaab ale ka chichirik pagrisaŋa ale pagrita tɔgatɔga. Wen va ka Yeezu Kirisita a nye wieŋa de meena. Wa be nye ba te ka wala.

¹⁷ Kirisitawa de a liŋ boro kama alege ate Wen nye jaab meena. Jaab meena abe nye ka nɔiyeŋ ale wa a yaa boro tɔgatɔga.

¹⁸ Kirisita bisaŋa ale a tu chaab la ale Yeezu Kirisita nyiŋka ate wadek yaa chim ba kpagi a yaa ta ba vummu. Wala ale a nye ase Wen bikpagi la ate wa nak wa a yiti kum po la. Wa nye dila kama ayen wa dɛ jaabuuri meena niŋ.

¹⁹ Ku be jam ka Wen dek popola ayen wa biika a yaa ta wadek Wen nyeka ale ka dii meena la.

²⁰ Biika de nyiŋ abe ale soa ate Wen yaa poli mɛ a ta tɛŋka meena wadek. Wen va ka biika de kummu nyiŋ jabarimu zuk, a basi ate nyemagsika ale nurubiik a yaa boro. Wa va ka wa kummu mɛ nyiŋ a ŋman pilim soa jaabuuri meena tɛŋzuk de ale wenŋmazuk.

²¹ Dila powa, ni an jam moata Wen ya ate dila jam basi ate ni chim Wen dachaasa dii nyiŋla, ni jam a tom ka wabaata ale ta popola baata mɛ.

²² Alege yɔgyɔgla de, wa biika kummu nyiŋ ate Wen yaa dɛ doata ale ni ayen ku basi ate ni chim nuru weleŋsa wa niŋ.

²³ Ni dan nye dila, ku a fɛ kama ayen, ni ŋmasi yik ni siaka nalimnyiini a zaani abe ni ta yiila ŋaai ate ni tara a ta nyini diipo ate ni wom Wen tomtomika la. Ku be ka Wen tomtomiŋ maŋka de nyiŋ ale soa ate mi Pɔɔl yaa chim tomteerɔ. Tɛŋka meena abe ale doa a ga saari la, a wom tomtomiŋ maŋka de kama.

²⁴ Yɔgyɔgla de, mi poi peenti ka nna yegayega ale ninam buui ate mi a nam a te ni la. Ka mi ninammu nyiŋ ale bu basi ate ni baga nueri Kirisita ninam buui ate wa nam te Kirisita bisaŋa ale a tu chaab la.

²⁵ Be ka Wen abe ale basi ate mi chim Kirisita bisaŋa ale a tu chaab la tomteerɔ ayen mi tom tuini de ate di ta wamaŋsa jam te ni. Tuini de ate mi ayen m tom la abe ale m mooli meena a sak nuruba Wen tomtomika ale ka diila.

²⁶ Tuntomiŋ maŋka de abe jam chim ka wasusugi dila po, ate wa nye nurubiik jigi. Alege yɔgyɔgla de, wa yaa be basi kama ate di nyini peelim a sak wa nuruma.

²⁷ Ba jigi Wen poli kama ayen wa basi ate baai ale kan daa Juuba la a seba wasusugni jigsika zulaŋa, ŋaai ale ka Kirisitawa a bo ni po la, zula ŋaai ate ni a yiili la.

²⁸ Dila nyiŋ ti be a sak waai meena ka Kirisitawa wie. Yam buui meena wuu ate tama ta la, ti pai ka bula a kaam ale a sak ba ayen ti dan baga abe ti ta ba wanyi wanyi ate ba chim baai siaka ale pagra ate ba chim bunyi ale Kirisitawa la a jam Wen jigi.

²⁹ M le nye dii ate m baga nye nya kude la ale m kasim a tom kama ale a nam a pai pagrim kpiem buui ate Kirisitawa a te mu la a tom.