Kaabka 21 - WEN GBAŊKA

¹ Naawen a biisi ale Moosis ayen, wa biisi ale kaabteerɔma Aaron nidoabilisaŋa ayen waai a kan taŋ wadek ase fidek nuruma waai a nin kpi.

² Nin ka wadek nuru waai ale ŋmasi moata wa ase wa ma yaase wa ko yaase wa biik yaase wa lie ale wa suok,

³ yaase wadek toa waai ale kan yali ya, ale an soa wadek la, ase wa nin kan ta chorɔ la, wala nyiŋ wa baga a taŋ wadek kama.

⁴ Wa be kan taŋ wa dega a faari nipok a ta nyini wa buuni po.

⁵ Kaabteerɔma a kan chiiri ba zuimaŋa nakpaasaŋa yaase ba chiiri ba teeŋsaŋa nakpaasaŋa yaase ba gebi ba nyiŋsaŋa.

⁶ Ba chim tuilum nuruba a te Wen, abe ba kan kaasi ba Wenni yuei ya. Dii nyiŋla ba ale pai bolimu a nye kaabka tiirita a te Naawen la. Ba Wenni ŋandiinta ale la, ku a magsi ka ba be ta tuilum.

⁷ Ba kan faari nipok waai ale ka nidoa yaalik la yaase ba faari nipok waai ate wa chorɔwa a zɛri wa la. Dii nyiŋla kaabteerɔwa ta tuilum kama a te Wen.

⁸ <>

⁹ Kaabteerɔ mɛ lie a dan pai nidoa yaalik a kaasi wadek wa kaasi ka wa kowa yuei. Ba ju wa ale bolim.

¹⁰ Kaabteerɔ kpieŋ ale bo wa suataŋa po waai ate ba pai bobika kpaamu a kpeeri wa zuk la, waai ate ba bobi ayen wa jo kaabteerɔ gattaŋa la, a kan basi ate wa zuisaŋa a wɔŋa yaase wa cheeri wa gattaŋa.

¹¹ Ku a fɛ ate wa kan jo kauk kuui ate kpio boro la. Ku a fɛ ate wa kan taŋ wa dega wa ko yaase wa ma nyiŋŋa,

¹² yaa wa nyini Wen yenni po a nyini yaase wa kan zuli di. Dii nyiŋla ba lueri wa kama ale bobika kpaam. Ka Mi ale Naawen.

¹³ Nipok waai ate wa faari la a chim waai ale kan seba nidoa la.

¹⁴ Ku a fɛ ate wa kan faari pukɔgi yaase waai ate wa chorɔ a basi wa la yaase nipok waai ale taŋ wadek ale nidoaba yaalika la. Wa faari waai ale kan seba nidoa ale nyini wadek buuni po la.

¹⁵ Dii ale ku basi ate wa kan kaasi wa bisaŋa a basi wadek nuruma po la, ka Mi ale Naawen dii ale nye ate wa a welema la.

¹⁶ Ate Naawen yaa biisi ale Moosis ayen,

¹⁷ <

¹⁸ Nuru waai ale koani la a kan cheŋ moata; ba la ale nna. Yeo yaase gbaniŋ yaase waai nina ale kaasi la yaase waai ale koani la,

¹⁹ yaase nuru waai naŋ yaa wa nisa ale kpi la,

²⁰ yaase nuru waai ale ta kuŋ yaase waai ale ka chichiruk yaase waai nimbie ale kaasi yaase waai ale ta sankpana yaase waai ale ta lauŋta yaase nira yaa waai kola ale gebi la.

²¹ Baai meena ale nyini kaabteerɔwa Aaron dɔkku po ale chim nuru kɔŋta la, a kan magsi ayen ba jam pai bolim nye tiirimu a te Naawen ya. Wa ka nuru kɔŋ. Wa an magsi wa jam moata ayen wa te Wenni ŋandiin weleŋsaŋa.

²² Wa baga a dɛ wa Wenni ŋandiintaŋa tii ale ŋmasi ta tuilum la kama. Ale ŋandiin tii meena ale ta tuilum la.

²³ Wa ale ka nuru kɔŋku la nyiŋ, ku a fɛ ate wa kan cheŋ moata garuk panni yaase kuŋkuŋku a kaasi m yenni. Ka Mi ale Naawen dii ale nye ate ba welema la.

²⁴ Moosis a yaa weeni a te Aaron ale wa nidoabilisaŋa ale Izirali demma meena.