Juud 1 - WEN GBAŊKA

¹ Mi Juud, ka waai ale ka Yeezu Kirisita tomteerɔ ale Jeemsi suok la. Mi ale a ŋmarisi gbaŋka de a te ni. Ti Kowa Wen ale lueri ni ale a yaali ni, ate Yeezu Kirisita a nya ni zuk.

² Wen le ta jiirim ale ni abe wa ta yaalika ale ni, abe wa basi ate ni boro ale suiyɔgni nna yegayega.

³ M dek doaba, m daam poom a yaali ayen m ŋmarisi a weeni sak ni ka Wen ale vari nama ale tama ti tuimbaata po a basi dii ale ayen ti a va wa la. Yɔgyɔgla ku a fɛ kama ayen m ŋmarisi a te ni nyiŋbiiri ayen ni kpaliŋ a ta siaka nalimnyiini ale wamaŋsaŋa ate Wen a pai ŋa te ni bunyi dekki la.

⁴ Ni ta siaka nalimnyiini ale ŋa dii nyiŋla, nuruba gela ale kaa a va Wen la, a suk kama a jam gum ti po. Ba tagri Wen wamaŋsaŋa de ŋaai ale a sak ti Wen wie ale a maari ti mɛ diila kama. Ba be zɛri Yeezu Kirisita waai nyiini ale ka ti Nyɔnɔ la kama mɛ. Ba a nye nna ayen ka ba baga a tom kaboŋsa tuima. Wen wieŋa a poom weeni sak ti kama dila po, ayen Wen a jam bo ba buusa kama a nya ba kaasuŋku.

⁵ Ni poom seba wieŋa de ka nalimnyiini. Alege mi a yaali ayen m teeri ni ka diipo ate Wen jam yeeri Izirali demma a ta nyini Ejipiti tɛŋka po la. Wa le ga nye dila a nueri la, ku ŋaaŋnyiŋ, ate wa yaa ko baai ale jam kan ta siaka ale wa la.

⁶ Ni be ŋman a teeri Wen maarɔma ale jam pai ba pagrimu a chim paanueka a zɛri ba boka jigini la. Wen a yik ba kama ale wa pagrimu a bobi ba a zaani legi jigi ayen ba za dula ate da kpien dii ate wa le bo ba buusa la a jam paari ate wa bo mini ba.

⁷ Ni a teeri Sodom ale Gomora tɛŋsaŋa ale tɛŋ sii mɛ ale jam kali moata si la, tɛŋ sila meena a jam nye ase ka Wen maarɔma ale jam nye diila. Si nuruma jam a tom ka kaboŋsa tuima. Nidoaba dek mɛ a jam a yaali ayen ba goa ale ba nidoa chaab. Wen yaa jam pai ba a nyo bolim buui ale kan ta kpeglimka la po ate bu waali ba nna yegayega. Nna a sak ti kama ayen ku a fɛ kama ayen ti kan a tom ba le jam a tom diila.

⁸ Nuruma de mɛ a jam a nya ka wie nna ase gɔdaasima la. Wieŋa de abe jam basi kama ate ba pai ba nyiŋsaŋa a tom tuimbaata. Ba a nye Wen pagrimu a la kama ale a le Wen maarɔma ale bo wenŋmazuk la.

⁹ Wen maarɔma kpagi kpienni Maakil dek an nye dila. Wa ale jabioku ale jam nak nampaŋŋa ale chaab ayen ba zɛ ba waai le wa soa Moosis nyiŋka la, Maakil an lɛ jabioku, wa goanti weeni wa kama ayen, <>

¹⁰ Alege wie ŋaai ate nuruma de zɛ ŋa kie la, ba a lɛ ŋa kama. Wie ŋaai ate ba seba ayen ŋa le kaasi ba la, duŋsa seba gaam dila kama, wa ŋala chaab dekdega le jam kaasi ba kama.

¹¹ Ku le jam toa ka nna yegayega te ba. Ba tom ase ka ti kokpieŋka Keen la. Ligra nyiŋ ate ba pai badek a te wakaasima ŋaai ate Balaam jam a tom la. Nuru ale jam boro ate ba a wi wa ayen Koora. Ba a nye ase ka wa ale jam nye diila. Ba be ale jam tomsi wa la, Wen jam ko ba kama.

¹² Nuruma de ka nuru baata a bo nuruma suŋsuŋ ase ba a nin boro a dɛ ŋandiinta. Ba goanti a nya ka badek zuk nyiini. Ba a nye ase ka ŋmoruk viok chiŋma la, ŋa ka nyiam. Buye po ba a nye se ka tiib sii ale kan ta yɔna la. Ba a nye ase ka tiib sii ate nuruma tu gebi si tɛŋ naŋsaŋa ale ge ate si kpi la.

¹³ Ba a nye ase ka nya kpiem nyamiisa la. Ase nyamiisaŋa puuku ale kan suk la, ba tuimbaataŋa mɛ a nyini ka peelim ase nya puutaŋa la. Ba a nye ase ka chiŋmarisaŋa ate Wen pai si nyo legi po ate si kasim bo dula taam wuu la.

¹⁴ Ɛnok jam ka Adam ŋaaŋbisaŋa po wanyi. Wala ale jam saari Adam ŋaaŋbisaŋa po buyopɔi. Wa jam biisi nuruma de wie dila po, a weeni ayen, <

¹⁵ wa le bo ka nuru meena buusa. Baai meena ale tom tuimbaata ale biisi Wen a kaasi la, wa le waali ba kama wieŋa de nyiŋ.>>

¹⁶ Nuruma de a kasim a ŋuuni ale a fɔbili kama ale a toariŋ ba vaanchaab wie nyiŋ. Ba kasim a va ka badek wabaata yaalika tuima nyiini ale a nak kuusa badek nyiŋ, ale a pak nuruba ale ba noa nyiini ayen ba va ba abe ba a te ba ligra.

¹⁷ Alege m dek doaba, ni teeri dii ate ti Nyɔnɔwa Yeezu Kirisita tomteerɔma a liŋ jam sak ni dila po la,

¹⁸ ayen diipo ate tɛŋka a moata kpeglimka la, dan paari, baai ale a va badek tuim kaasima yaalika la, le jam a la ni kama, ni ale a va Wen suiku la nyiŋ.

¹⁹ Nuruma de chaab a nye kama ate nuruba a waaŋ chaab. Bala chaab a va ka badek ŋanyaalik wie nyiini. Ba be ka Wen Chiika ba suiniima po.

²⁰ Alege, m dek doaba, ni va Wen nalimnyiini, ate ni siaka a pagra. Ni basi ate wa chiika a maari ni ate ni a puusi a te Wen.

²¹ Abe ni basi ate Wen yaalika lik ni ase ni ale a limisi ayen ti Nyɔnɔwa Yeezu Kirisita a va wa jiirimu nyiŋ a te ni nyuvuri dii ale kan ta kpeglimka la.

²² Ni ta jiirim ale baai ale ta chichama la,

²³ abe ni vari baai ale bo bolimu po la a basi. Ni ta jiirim abe ni a chali yɔgsum ale ba gela mɛ, alege, baai mɛ kaboŋsa tuimaŋa ale basi ate ba gattaŋa daŋ la, ni kan tiri gattaŋa.

²⁴ Wen dii ale baga a yik ni ate ni kan tagri ni popola a pai ŋaaŋ a te wa la, ale baga mɛ a nye ate ni a zaani wa zula Nyɔnɔwa niŋ ale ge ka kaasuŋ alege ta popeentik nyiini la,

²⁵ Wen dii ale ka wadek wa nyiini, a chim ti Varibasidɔ Yeezu Kirisita ti Nyɔnɔwa yuenni nyiŋla, ta ka zula ale pagrim yegayega a gaam jaabuuri meena a ta nyini ku piilimka po a jam paari jinla ale ta dila taam wuu. Ku be nye dila.