Josua 8 - WEN GBAŊKA

¹ Ate Naawen a yaa weeni Josua ayen, <

² Ku a magsi kama ayen fi nye Ai ale ka naawa ase fi ale nye Jeriko ale ka naawa diila abe ni pai ba ŋantaŋa ale ba duŋsaŋa a tanla. Ni suk a paari ate ni baga a nye dila.>>

³ Ate Josua ale tugurik tommu meena a yaa cheŋ a ga nye kpaliŋ ale Ai tɛŋka demma. Wa jam lueri ka tugurik tɔŋdɔba tusa pisita (30,000) ate ba cheŋ yok,

⁴ ale wa wieŋa de ayen, <

⁵ Mi ale baai meena ale bo dela ale mu la ale dɛ niŋ a jo tɛŋka po ate nuruma a yaa dan jam ba nye kpaliŋ ale ti ase ba le liŋ jam nye diila, ti le yiti chali abe te basi ba, ase ba le nya ale tama a chali la.

⁶ Ba yaa le chali a vi ti ate tama ale ta ba a cheŋ niŋniŋŋa, ba le weeni ayen ba le la yiti a chali.

⁷ Nama mɛ a yaa basi ni le suk a doa kauk kuui la a jo tɛŋka po. Naawen ni Wenni dek ale pai tɛŋka a nyo ni nisima po.

⁸ Ase ni dan tuesi tɛŋka a ga nueri ni ju ka ale bolim. Ni nye dii ate Naawen a weeni la. Ni ŋmasi kpesi a tara m wieŋa.>>

⁹ Ate Josua a yaa basi ate ba cheŋ a ga suk doa Betel ale Ai suŋsuŋka po a limisi, ba jam boka Ai tɛŋka yeniŋ geŋsa alege ate Josua jam bo ale nuruma yokku meena.

¹⁰ Vari ale veenti la saluik yokyokwa, Josua a sak nuruma ate wa ale Izirali niŋdeerɔma a dɛ nuruma niŋ ate ba cheŋ Ai tɛŋka.

¹¹ Tugurik tommu meena ale jam bo ale wa la a yaa jam cheŋ tɛŋka po. Ba jam ga boka Ai wiilukku geŋsa ate viak kpieŋ a bo ba ale tɛŋka suŋsuŋ.

¹² Josua a jam lueri ka nuruba ate ba a paari ase tusa ŋanu (5,000) la ate ba ga suk doa Betel ale Ai suŋsuŋka po Ai yeniŋ geŋsa.

¹³ Tugurik tɔŋdɔma meena jam boka ba le magsi ba bo kauk kuui la. Baai ale jam bo yeri la a bo tɛŋka yeseoku geŋ ale baai ale suk bo gɔnni po la a bo tɛŋka yeniŋ geŋsa. Yok kula Josua a yaa jam cheŋŋi viaka po.

¹⁴ Ase Ai naawa ale jam nya kude la, wa ale wa nuruma meena a yaa nye nwuli a basi ba tɛŋka ale nyini saluik yokyokwa ayen ba ga tu chaab ale Izirali demma nye kpaliŋ kauk kuui ale moata Araba la. Wa jam zɛ ayen nuruba a suk doa ayen ba jo ba tɛŋka po.

¹⁵ Josua ale Izirali demma meena a yaa jam basi badek ate ba a chali ŋmani a jo gɔnni po.

¹⁶ Ba yaa jam wi Ai nuruma meena ate ba nyini a vi ba. Ba jam vi Josua ale wa nuruma a ta nyini tɛŋka po a nyini.

¹⁷ Nuru a jam tali a wari Ai yaase Betel tɛŋsaŋa po an nyini peelim a vi Izirali demma. Ba meena a jam basi ba tɛŋka kama alege a saŋ Izirali demma ŋaaŋ.

¹⁸ Ate Naawen a yaa weeni Josua ayen, <> Josua a yaa pari wa dachoruku a cheŋ Ai tɛŋka.

¹⁹ Ase wa le ga nye dela a ga nueri la, nuru baai ale jam suk doa la a yaa jam nye nwuli a jo tɛŋka po. Ba jam jo ka po kama a tuesi ka ale ju ka ale bolim.

²⁰ Ate Ai demma a yaa cheem nya ba ŋaaŋ ale nyuisa ale kasim nyini tɛŋka po a jueli chiŋmaaŋa po ale ge ba a jam baga a chali va sui yoŋ a bɛ. Dii nyiŋla Izirali demma baai ale chali a jo gɔnni po la a pilim ŋmani kama a tu chaab ale baai ale a vi ba la.

²¹ Ase Josua ale Izirali demma meena ale nya ale baai ale jam suk doa a moata tɛŋka la a nak yik Ai tɛŋka ale ju ka ale bolim ate nyuisaŋ a yiti ka po la, ba yaa viriŋ a nye kpaliŋ ale Ai demma.

²² Baai ale jam suk a doa la me a yaa nyini tɛŋka po a tu ba suik ate ba gilim ba a basi suŋsuŋ. Izirali demma jam ko ba meena kama.

²³ Alege ba jam ta Ai Naawa ka vuta a ga te Josua.

²⁴ Ase Izirali demma ale jam ko Ai nuru baai meena ale nyini ba nye kpaliŋka ale ba gɔnni po la a ga nueri la, ba le togri waai meena la, Izirali demma meena a yaa ŋman jo Ai tɛŋka po a ko nuru baai meena ale tali bo ka po la.

²⁵ Ba jam ko ka nidoaba ale nipooba tusa pi ale ŋaye (12,000) dai dila danni. Ai demma meena ba jam ko ba kama.

²⁶ Josua an jam pai wa gbaluku a dueni tɛŋa a ta ga paari diipo ate wa jam ko baai meena ale jam bo Ai tɛŋka po la.

²⁷ Izirali demma a jam yik ka ba duŋsaŋa ale ba ŋan baai ate ba ta la a tara ase Naawen ale jam weeni ba diila.

²⁸ Josua a jam ju Ai tɛŋka kama ale bolim ate ka chim guuk a ta jam paari jinla danni.

²⁹ Wa jam pai Ai naawa a yik ka tiib nyiŋ ate wa yiga dula jigini a ta ga paari wenbalinni. Wenni ale siŋ la Josua a yaa weeni ate ba pai wa nyiŋka a ta nyini tiimu zuk a ga dueni tɛŋka nansuiŋku nɔi. Ba jam pai ka pina a vi ka zuk ate ku doa a paari jinla danni.

³⁰ Josua yaa jam sɛ kuŋkuŋ Ebal Guuku zuk ate Naawen, Izirali Wenni,

³¹ Ase Naawen tomteerɔwa Moosis ale jam weeni Izirali demma diila. Wa jam sɛ ku kama a ta va chaab ale dii ale ŋmarisi a bo Moosis Sinsaŋŋa gbaŋka po la. Tintana nyini ate ba pai a sɛ ku ba an jam pai kuta a maa nye ya. Ba yaa jam nye juka kaabka a te Naawen a dueni tintana zuk ale nye suiyɔgni tiirita kaabka.

³² Dula jigini Izirali demma niŋ ate Josua yaa ŋmarisi Moosis sinsaŋŋa a dueni tintana zuk.

³³ Izirali demma meena ale nichamma ale ba nisɔmma ale kpaŋŋa ale baai ale a bo buusa la a jam za ka Naawen nɔiyeŋka dakanni gana ate ba ninaŋa a bo kaabteerɔma ale Livaima baai ale ji di la geŋsa. Nuruma gela a jam za kama a pai ba ŋaaŋ te Gerizim Guuku ba gela mɛ za a pai ba ŋaaŋ a te Ebal Guuku, Naawen tomteerɔwa Moosis ale jam weeni ba ayen ba nye dila ase ku nin paari diipo ale magsi ba tuesi niaka la.

³⁴ Dila ŋaaŋnyiŋ ate Josua a kariŋ Sinsaŋŋa wieŋa meena a ta va niaka ale kikaasa ase ku le ŋmarisi dii Sinsaŋŋa gbaŋka po la.

³⁵ Wie ŋaai meena ate Moosis a jam weeni Josua la, wa jam an tali dinyi mɛ la a basi ya. Wa jam kariŋa kama ate Izirali demma tigsuŋku meena. Nipooma ale bisaŋa ale nichamma ale baai meena ale jam gum ba po la a jam wom ŋa kama.