Josua 18 - WEN GBAŊKA

¹ Izirali tigsuŋku meena a jam tigsi Siilo tɛŋka a ti Tuka Viuku dula. Izirali demma a jam nya pagrim tɛŋka zuk kama

² alege Izirali buuni diina buyopɔi ale jam tali an diem nya charukwa.

³ Dila Josua yaa weeni Izirali demma ayen, <

⁴ Ni lueri nuruba bata a ta nyini dɔk meena po. Mi ale tom ba ate ba cheŋ ga kpesi nya tɛŋka abe ba ŋmarisi a magsi ka wie ale ka diila, a ta va waai meena charuk ale ka diila. Ba le ŋman pilim jam mi jigi.

⁵ Nama ale labi tɛŋka ka buyopɔi. Juda ale wari ka wa tɛŋka yeseoku geŋsa abe Josefi yenni demma a bo ba tɛŋka wiilukku geŋsa.

⁶ Ase ni dan ŋmarisi a magsi tɛŋka labika buyopɔiwa dɛ wie, dila ŋaaŋnyiŋ, ni ta ba a jam te mu ate m nak gbaŋ a te Naawen ti Wenni niŋ.

⁷ Livaima a kan nya jigiya a nyini ni po, dii nyiŋla kaabteka tuini ate ba tom a te Naawen la ale ba charuku. Gad ale Aruben ale Manasa dɔkku geli a poom nya ba charuku ka Jodan benni kori geŋsa. Ka Moosis Naawen tomteerɔwa ale te ba.>>

⁸ Ase nuruma ale piilim a bo ba suiku po ayen ba kpesi nya tɛŋka la, Josua a jam sak ba kama ayen, <>

⁹ Dila nuruma a yaa basi dula ale cheŋ tɛŋka meena. Ba jam ŋmarisi ka wie a basi ka gbaŋ po, tɛŋ kpieŋ meena wie ba jam ŋmarisi a paari ka buyopɔi ale ŋmani pilim cheŋ Josua jigi Siilo.

¹⁰ Josua yaa nak gbaŋ Naawen niŋ, dula jigini wa yaa chari tɛŋka a te Izirali diinaŋa labka ale ka diila.

¹¹ Gbaŋka yaa jam lo Benjamin dɔkku, yezuk yezuk meena zuk. Ba charuku tɛŋka banni a jam bo ka Juda ale Josefi diinaŋa suŋsuŋka po.

¹² A nyini wiilukku geŋ tɛŋka banni a piilim nyini ka Jodan benni a churinti va Jeriko wiilukku geŋsa a ga va tɛŋ kaai ate guuta a bo ka po la yeniŋ geŋsa a ga paari Bet Aven gɔnni po.

¹³ A nyini dula di jam va ka Luz a cheŋ Betel a ga va Atarot Addar guuku zuk yeseok geŋ a siŋ Bet Yoron.

¹⁴ A nyini guuku ale tuk Bet Yoron la yeseoku geŋ tɛŋ banni a tulim va ka yeseok a cheŋ yeniŋ geŋ a ga vuri nyini Kiriat Baal yaase Kiriat Jearim. Ka de ka Juda demma tɛŋ. Kude a jam ka yeniŋ geŋsa.

¹⁵ Yeseoku geŋsaŋa a piilim nyini ka Kiriat Jearim nakpiaka yeniŋ geŋ, ate tɛŋ banni a jam nyini bulik sii ale bo Neftoa tɛŋka la.

¹⁶ Tɛŋ banni a va ka guuku zuk a tuk Bet Yinnom Viaka, Arefaim Viaka wiiluk geŋ. Di zaan dula a va ka Yinnom Viaka yeseok geŋsa Jebus tɛŋ kpieŋka a ga paari En Arogel.

¹⁷ Di ŋman tulim wiilukku geŋ a va ka En Sɛmes a tom du a cheŋ Gelilot ale tuk Adummim la, a ga va Boyan Piuŋku jigini la. Boyan jam ka Aruben nidoabili.

¹⁸ Di ga va ka wiilukku geŋ Bet Araba churinti a cheŋ Araba.

¹⁹ Di jam ga va ka Bet Yogla wiilukku geŋsa churintika a jam nyini Yesa Nyakpiemu wiiluk geŋ, a ga kpeglim Jodan benni nɔi yeseoku geŋ. Kude a jam le yeseoku geŋsa tɛŋ banni.

²⁰ Jodan benni ale jam chim kori geŋsa tɛŋ banni. Ŋade a jam le tɛŋ banaŋa a labi Benjamin yezuimaŋa kabitaŋa meena la.

²¹ Benjamin dɔkku yezuk yezuk ale jam soa tɛŋ sii la ale nna. Jeriko ale Bet Yogla ale Emek Keziz,

²² ale Bet Araba ale Zemaraim ale Betel ale

²³ Avvim ale Para ale Ofra ale

²⁴ Kefar Ammoni ale Ofni ale Geba. Si jam ka tɛŋsa pi ale siye ale si tɛŋ kpaŋsa.

²⁵ Gibeon ale Arama ale Beerot ale

²⁶ Mizpa ale Kefira ale Mozaya ale

²⁷ Arekem ale Irpeel ale Tarala ale

²⁸ Zela ale Ya Elef ale Jebus demma tɛŋka Jerusalem ale Gibea ale Kiriat Jearim. Tɛŋsa pi ale sinaansi ale si tɛŋ kpaŋsa ale kala gilim ba. Si de a jam le Benjamin charuku a te wa yezuimaŋa.