Josua 11 - WEN GBAŊKA

¹ Ase Yazor naawa Jabin ale ga wom kude la wa yaa tom weeni Madon naawa Jobab ale Simron naawa ale Aksap naawa

² ale nalima ŋaai ale bo wiilukku geŋsa guutaŋa zuima la ale Araba ate ka bo Kinneret yeniŋ geŋsa la ale yeniŋ tɛŋsaŋa meena

³ ale Keenan demma ale bo kori ale yeniŋ geŋsa la a ta ga paari Amori demma ale Yit demma ale Perizzi demma ale Jebus demma tɛŋsaŋa ale bo guutaŋa zuima la ale Yivi demma ale bo Yermon ate ka bo Mizpa tɛŋka po la.

⁴ Ba jam nyini ka meena ale ba tugurik tommu ale wusuma ale torokoba a piisi nna ase beli tintain busuŋ la.

⁵ Nalimaŋa de meena a jam tigsi ka chaab Merom Benni geŋsa ayen ba nye kpaliŋ ale Izirali demma.

⁶ Naawen a yaa weeni Josua ayen, <>

⁷ Josua ale wa tugurik tommu meena a yaa jam Merom Benni a nye kpaliŋ ale ba,

⁸ ate Naawen a yaa pai ba a nyo Izirali demma nisima po. Ba jam vi ba ka dila a ga nya pagrim ba meena zuk Saidon ale Misrefot ale Maim tɛŋsaŋa ale viak kaai ale bo Mizpa tɛŋka kori geŋsa la. Ba an jam tali nuru ate wa vua.

⁹ Josua a yaa nye ba ase Naawen ale weeni wa nye dii a. Ba jam wɛ wusuma naŋsaŋa kama ale a ju torokoma ale bolim.

¹⁰ Va ŋala po mɛ Josua a ŋmani ŋaaŋ a nye kpaliŋ ale Yazor tɛŋka a ko ka naawa, Yazor ale jam chim tɛŋsaŋa de meena tɛŋ kpieŋ.

¹¹ Ba jam tɔgri nuru meena kama. Ba dim bola jam kaasi ba kama. Jaabuui meena ale a vuusi la ba jam ko kama alege ju Yazor tɛŋka ale bolim.

¹² Josua a jam yik tɛŋsaŋa de nalimaŋa meena a tɔgri ba ase Naawen tomteerɔwa Moosis ale weeni diila.

¹³ Izirali demma an jam ju tɛŋ sii ale bo guutaŋa zuk la ka Yazor nyiini ate Josua a jam ju.

¹⁴ Izirali demma a yaa jam pai ŋan baai meena ate ba ta la ale ba duŋsaŋa meena tɛŋka po a tara, alege a tɔgri nuruma meena, ba an jam tali waai ate wa vua.

¹⁵ Ase Naawen ale weeni wa tomteerɔwa Moosis la, Moosis mɛ a jam weeni Josua ka dila ate Josua a nye di; wa an jam tali dii meena ate Naawen a weeni Moosis la a basi ya.

¹⁶ Josua a jam tuesi tɛŋka de meena kama, tɛŋ kaai ale bo guuku zuk la ale Negev meena ale Gosen tɛŋka meena ale tɛŋ sii ale bo yeniŋ la ale Araba ale Izirali guutaŋa zuima meena,

¹⁷ A nyini Yalak Guuku kauk kuui ale moata Seir a bo Baal Gad, Lebanon Viaka po Yermon Guuku chiak. Wa jam nak yik ba nalimaŋa meena kama a ko ba.

¹⁸ Josua a jam nyeka kpaliŋ ale nalimaŋa de meena kama ate ku beni.

¹⁹ Ka Yivi demma ale jam bo Gibeon la, ale jam nye suiyɔgni nɔiyeŋ ale Izirali demma, baai ale jam diiri ba kpaliŋka po la.

²⁰ Ka Naawen dek ale basi ate ba suiniima a pagra ate ba nye kpaliŋ ale Izirali demma dii le ku nye ate wa ko ba meena ase Naawen ale weeni Moosis diila.

²¹ A nyini va ŋala po Josua a jam ga kaasi Anak tɛŋka ale bo guuku zuk la; a nyini Yebron ale Debir ale Anab a ta nyini tɛŋ sii meena ale bo guuku zuk Izirali ale Juda tɛŋsaŋa po la. Josua a jam kaasi ba kama ale ba tɛŋsaŋa meena

²² Anak demma waai an jam tali bo Izirali tɛŋsaŋa po ka Gaza nyiini, Gat ale Asdod demma wanyi mɛ la an jam vua.

²³ Josua a yaa jam tuesi tɛŋka meena ase Naawen ale jam weeni Moosis diila. Wa jam pai ka kama ate Izirali demma ate ba tara a magsi chaab ale ba buuni ale ka diila ate tɛŋka a yaa vuusi ale kpaliŋ.