Joel 2 - WEN GBAŊKA

¹ Peeri damuniŋka Zayon po. Te ate ba choa chioku m tuilum guuku zuk. Basi ate baai meena ale bo tɛŋka zuk la kpaziita a nak ale Naawen danni a cheena. Ku moata kama.

² Di ale chim ka legi ale sui kaasuŋ dai, di ale chim ka chiŋma ale sobluk dai. Tugurik tɔŋdɔba ale piisi a nyini peelim ase varivientidi ale a lik guuta diila. Ate wa dila choa an diem a nye nya ya yaase di choa a poom za di nye a nya.

³ Bolim ale bo ba niŋ a dɛ ate bu choa mɛ a bo ba ŋaaŋ a dɛ. Ba niŋ nyiŋ tɛŋka a nye ase ka Eden kadukka la. Ba ŋaaŋnyiŋ ka gɔi kayiok. Jaab an baga a suk wadek ale ba.

⁴ Ba a nye ase ka wusuma ale laari a tabi ase ŋa a cheŋ kpaliŋ nyeka la.

⁵ Ba va guutaŋa a taam ate ku a nye ase wusuma torokoba ale a taam la ale a nye ase bolim ale a dɛ wuuk diila ale a nye ase tugurik tɔŋdɔba ale yiti a cheŋ kpaliŋ po diila.

⁶ Tɛŋ kpieŋsa a nya kama ate ba kpaziita a nak. Ate waai meena a nya wadek nna fii fiiga.

⁷ Ba gomsi ale a jueli saasa ase ka tugurik tɔŋdɔba la. Ba meena a va ka chaab a gɔk santiri a taam ate waai a kan muriŋ a bɛ.

⁸ Ba kan cheŋ a tusi chaaba. Waai meena a va ka suiku yɔrr a cheŋ wa niŋ nyiŋ. Ba seba baai ale chim kpaga ba zuk la kama a kan nye a kaasi kpaŋta.

⁹ Ba a yeenti kama a cheŋ tɛŋka po. Ba chali va ka siaka zuk. Ba meli kama a jo yieŋa po. Ba va tuokpattaŋa a jo nna se zueba la.

¹⁰ Tɛŋzuk de a choa kama ate wenzukku a choa, ate wenbinni ale chiika a sobri, ate chiŋmarisaŋa a kan ŋman a nyaksi ba niŋŋa.

¹¹ Naawen a na wa tugurik tɔŋdɔma kpagni kama. Wa tugurik tɔŋdɔma a piisi ka nna yegayega ate baai ale a wom wa la a zuak nna yega. Naawen danni a zuak kama ale ŋman pagra. Ka wana ale wa baga a pigi?

¹² Naawen weeni ayen, <

¹³ Ni dari ni suiniimaŋa a cheeri alege daa ni gattaŋa. Ni ŋman pilim cheŋ Naawen ni Wenni jigi, diila wa ka waai ale a yaali teka ale ŋman ta jiirim, ate wa sui a kan kpabi a puuri ale ta ŋmanteka nna yegayega ale a tagri a kan ta biem a jam.

¹⁴ Ka wana ale seba? Da dii dai wa ale cheem a ta ŋmantiik abe wa basi niauŋ ŋaaŋ ale ŋanbie ale nyuka tiirita a te Naawen fi Wenni.

¹⁵ Peeri damuniŋka Zayon po abe fi weeni ate ba nye weleŋsa nɔi bobika, abe nuruma a jam jigi yeŋ.

¹⁶ Tigsi nuruma abe fi gomsi ba. Ta nisɔmma a jam jigi yeŋ, abe fi tigsi bisaŋa ale biluak tii ale diem a ŋoosi la. Basi ate nidoa waai ale diem faari nipok la a basi wa dɔkku.

¹⁷ Basi ate kaabteerɔma ale bo Naawen yenni nansuiŋku ale kuŋkuŋku suŋsuŋ a tom la a kum. Basi ate ba weeni ayen, < >>

¹⁸ Ate Naawen yaa le ta nyuri ale wa tɛŋka a sak jiirim ale wa nuruma.

¹⁹ Naawen yaa le tulisi ba ayen, <

²⁰ M le yiak wiiluk geŋsaŋa tugurik tɔŋdɔma ate ba yalima ale ni. M le tusi ba a basi tɛŋ kosik ale tɛŋ kaai ale kan nye jaab la po. Ate ka niŋka jigini a cheŋ nyakpiemu kori geŋsa. Ate baai ale bo ŋaaŋka la a basi yeniŋ geŋsa. Ate bu nyummu ale kasim a nyuŋ yegayega.>> Chekki wa sum nye wakpiema kama.

²¹ Tɛŋ demma, ni kan yɔksa. Ni sue a peenti abe ni a dɛ masim. Chekki Naawen a nye ka wakpiema.

²² Gɔi duŋsaa, ni kan yɔksa, diila wuuk tii ale bo peelim la a boro a sobri kama. Tiisaŋa a yɔni. Kiŋkaŋka ale ti buui ale a melim la mɛ a yɔni si yɔnaŋa kama.

²³ Zayon demma, ni te ate ni sue a peenti, abe ni dɛ masim ale Naawen ni Wenni, diila wa te ni tɛŋsik ŋmoruk kama wayɔrisima nyiŋ. Wa basi kama ate ŋmoruk a ni nna yegayega yoenni po meena ase dila po wa la.

²⁴ Fɔbika dabaasaŋa ale sueri ale ŋanbie. Samɔnsaŋa ale sueri ale da paalik ale kpaam a waaŋ.

²⁵ <

²⁶ Ni ale ta nna yegayega a magsi dɛka, ate ni yaa le pak Naawen ni Wenni, dii ale tom wakinkagla a te ni la. M nuruma a kan ŋman nya chivie.

²⁷ Ate ni yaa le miŋ ayen m bo Izirali abe ni ŋman miŋ ayen Mi ale Naawen ni Wenni, ate waai a ŋman karo a gum mi po. M nuruma a kan ŋman nya chivie.

²⁸ <

²⁹ Nidoa baai ale nipok baai ale tom a te mu da ŋala po la, m le pai M Chiika a nyo ba mɛ po ate ba biisi chum po wie ase Biisiteerɔba la.

³⁰ M le sak wakinkagla wenŋmazukku ate ziim ale bolim ale nyuisa ale bo tɛŋzuk de.

³¹ Ate Naawen Dakpienni ale da pagrika danni a jam la, wenbinni ale chimka legi ate chiika a chim ziim.

³² Ate waai meena ale a wi Naawen la ale nya varibasika. Diila a nyini Zayon Guuku zuk ale Jerusalem po ate varibasika ale boro ase Naawen ale jam weeni diila ayen, a nyini ŋanvutaŋa la po ate Naawen a wi.