Joel 1 - WEN GBAŊKA

¹ Naawen wanni ale jan jam Petuel nidoabinni Joel jigi la.

² Nama nisɔmma, ni abe wom nya kude. Baai meena ale bo tɛŋka po la abe wom. Wanni de choa a diem nye ni daaŋa po a nya, yaase ni kokpieŋsaŋa daaŋa po?

³ Weeni sak ni nidoabilisaŋa, ate ni nidoabilisaŋa a weeni sak ba mɛ nidoabilisaŋa, ate ba mɛ nidoabilisaŋa a weeni sak ŋaaŋnyiŋ gaŋka.

⁴ Tintueŋa ale tali ŋan baai la, tintue kpiemaŋa a dɛ kama. Tintue kpiemaŋa ale tali ŋan baai la, tintue fiisaŋa a dɛ kama. Tintue fiisaŋa ale tali ŋan baai la, tintue ŋa chaab a dɛ ŋa kama.

⁵ Nama danyuirisa, ni yiti zaani a kum! Nama danyuirisa meena ni kum. Ni kum dapaalika nyiŋ, dii nyiŋla ba chiak bu a nyini ni nɔngbanvaataŋa po kama.

⁶ Tɛŋ ale jam vari jo m tɛŋka po, ka be pagra kama ale piisi. Ka ta ka gbeŋli nyina ale gbeŋ nubi nyina.

⁷ Ka nye kama ate kadukka a doa kinla ale kaasi m kinkaŋsaŋa. Ka lati si paktaŋa kama a yuk basi ale ge peeluk.

⁸ Kum ase nipok kaliak ale jo boorisa garuk a kum wa chorɔ paalik nyiŋla.

⁹ Ŋanbie tiirita ale nyuka tiirita a ŋman ka Naawen yenni po. Kaabteerɔ baai ale tom a te Naawen la a kum kama.

¹⁰ Laŋsaŋa a kaasi kama, ate tɛŋka a kɔ. Ŋanbieŋa a kaasi kama. Da paalika a kpeeri kama, ate kpaamu a karo.

¹¹ Nama kpaarɔba, ni be jɔk yiila, nama baai ale a nya tiisa zuk la, ni be kaari. Ni kum ŋankpaantaŋa nyiŋ, dii nyiŋla kaduksaŋa ate ba a che ŋantaŋa du la a kaasi kama.

¹² Talimu a kɔ kama ate kiŋkaŋka a kpi. Ti yɔnsaŋa ale tiisaŋa meena ale bo kadukka po la a kpi kama. Nurubiik masimu a muriŋ bɛ kama.

¹³ Kaabteerɔma, ni jɔ boorisa gatta abe ni kum. Nama baai ale a tom kuŋkuŋku niŋ la, ni kum. Nama baai ale tom a te mi Wenni la ni jam jɔ boorisa gatta yokku po. Dii nyiŋla ba peri ŋanbie ale nyuka tiiritaŋa a ta kama ni Wen yenni po.

¹⁴ Weeni ate nuruma a bobi nɔi. Wi ate ba jam jigi yeŋ. Te nisɔmma ale nuruma meena ale bo tɛŋka zuk la a cheŋ Naawen fi Wenni yenni a kaari wi Naawen.

¹⁵ Niniga ale chim dai dila danni! Dii nyiŋla Naawen danni a moata kama. Di ale jam ase ka kaasuŋ la a nyini Wen Dii Ale A Niak La jigi.

¹⁶ Ba an pai ŋandiinta a nyini ti nina po ale ŋman yeeri masim ale suipeentik nyini ti Wen yenni po?

¹⁷ Bieŋa a kpi kama tɛŋ kosikka po. Duenika yieŋa a kaasi kama. Booŋa a lo dii nyiŋla ŋanbie karo a dueni ŋa po.

¹⁸ Nya niiŋa ale a ŋuuni dii ya! Ate duŋsa a butim dii nyiŋla wuyɔgsuk karo a te si. Piisa mɛ a poom a nam.

¹⁹ Naawen yaa, ka fi ate mi a wi, diila bolim ale dɛ wuyɔgsuku ale bo peelim la ate bolim ŋiak a dɛ tiisaŋa meena ale bo kaduksaŋa po la.

²⁰ Gɔi duŋsaŋa mɛ a poom lak ka nɔi a yaali fu. Beli naŋsaŋa nyaataŋa a kpeeri kama ate bolim a dɛ wuyɔgsuku ale bo peelim la.