Jeremaya 52 - WEN GBAŊKA

¹ Zedekia jam ta ka bena pisiye ale dinyi ale chim naab. Wa jam de naamu Jerusalem po ka bena pi ale dinyi. Wa mawa yuei jam le Yamutal. Wa jam ka Jeremaya lie a nyini Libna.

² Wa jam nye ka biem Naawen nina po, ase Jeyoiakim ale jam nye diila.

³ Ku jam ka Naawen suipuurumu nyiŋ ate kude meena a nye Jerusalem ale Juda, ate ku kpeglimka wa tusi ba a nyini wadek jigi a basi. Yɔgyɔgla Zedekia a jam nye ka tukpari a ta chaab ale Babilon naawa.

⁴ Dila Zedekia naamu bena neokku po, chiisa piwa ka daa piwa danni Babilon naawa Nebukadnezzar a gɔk santiri a ta chaab ale Jerusalem ale wa tugurik tɔŋdɔma meena. Ba jam tigsi ka tɛŋ nummu peelim a sɛ bimbimi a gilim ka.

⁵ Ba jam lik tɛŋka a ta paari ka naab Zedekia naamu bena pi ale dinyiwa.

⁶ Chiisa sinaansiwa po, daa neokku po, kɔmmu a jam pagra kama tɛŋ nummu po nna yegayega ate ŋandiinta karo ate nuruma a dɛ.

⁷ Ba yaa wɛ tɛŋ nummu parika a jo ate tugurik tɔŋdɔma meena a yiri chali. Ba jam basi tɛŋ nummu ka yokku a va nansuiŋku parisa siyewa suŋsuŋ a moata naawa kadukka, Babilon demma ale gilim tɛŋ nummu la po a nyini. Ba jam chali kama a duŋ Araba,

⁸ alege Babilon tugurik tɔŋdɔma a vi naab Zedekia a yik wa Jeriko peelimmu po. Wa tugurik tɔŋdɔma a jam gaari kama a waaŋ chaab alege wa,

⁹ ate ba jam yik wa. Ba jam ta wa cheŋ ka Babilon naawa jigi Aribla ale bo Yamat tɛŋka la, ate ba mooli ba le ba nye wa diila.

¹⁰ Aribla po ate Babilon naawa a tɔgri Zedekia nidoabilisaŋa wa nimbie. Wa jam ko Juda kpaŋŋa mɛ kama.

¹¹ Wa yaa yeeri Zedekia ninaŋa ale bobi wa ale kutuk mɔnuŋ chɔrima a ta wa cheŋ Babilon, juijui ate wa lik wa a ta ga paari wa kum dai.

¹² Babilon naawa Nebukadnezzar naamu bena pi ale neokku po chiisa sinuwa po ka daa piika danni Nebuzaradan tugurik tɔŋdɔma kpagni waai ale tom a te Babilon naawa la, yaa jam Jerusalem.

¹³ Wa yaa jam ju Naawen yenni ale naawa yenni ale Jerusalem yieŋa meena. Tuilum yeri meena wa jam ju basi kama.

¹⁴ Babilon tugurik tɔŋdɔma meena ate kpagni Nebuzaradan a jam a nya ba zuk la a jam wɛ parisaŋa meena ale gilim Jerusalem la kama.

¹⁵ Kpagni Nebuzaradan a jam ji ŋanjaksaŋa gela kama ale baai ale tali tɛŋ nummu po la, a maa gum baai ale ka yɔgdɔba la ale baai ale dɛ niŋ a cheŋ Babilon naawa jigi la.

¹⁶ Alege kpagni Nebuzaradan a jam basi ka ŋanjaksaŋa gela ŋaaŋ ayen ba a tom kaduksaŋa ale tattaŋa po.

¹⁷ Kaldiya demma a jam wɛ kutuk mɔnuŋ zaŋŋa kama ale ŋanzaan tii ate fi baga a pai la ale kutuk mɔnuŋ Nyakpiemu ale bo Naawen yenni po la, yaa ji kutuk mɔnuŋku meena a ta cheŋ Babilon.

¹⁸ Ba jam maa pai ka samɔnsa ale saabuluta ale boomsa ŋangebinta, ale taasi ŋaai ate ba ta a misi ale kuta mɔnta ŋanta ate ba ta a tom Naawen yenni tuimaŋa la.

¹⁹ Kpagni pai ka taasi kpiema ale jabuui ate ba pai ŋan baai nyum ale masa la a ju du la ale taasi ŋaai ate ba ta a misi la ale samɔnsa ale zeuŋta ŋanzaanita ale china ale daam tiirim taasa bade meena ka ligmɔniŋ maŋ yaase kpana ate ba pai nye.

²⁰ Kutuk mɔnuŋku ale nyini zaŋŋa ŋayewa po la ale Nyakpiemu ale kutuk mɔnuŋ lalisa pi ale siyewa ale bo ku tɛŋ la ale ŋanzaan tii ale a zagri la ate Naab Solomon a nye a magsi Naawen yenni la a jam gaam magsika kama.

²¹ Zaŋŋi yeŋ meena woglim a jam magsi paari ka anamagib pisita ale buyuebi a jueli ŋmai ale chim anamagib pisiye ale bunaansi a ta gilim. Dinyi meena a jam wobla ase ka nandubsa sinaansi la ale ta yɔli.

²² Kutuk mɔnuŋku tulika ale jam bo zaŋni zuk la a jam jueli ka anamagib pi alege ŋmirisi ate kuta yɔn fii gilima a gilim. Zaŋŋi dindila ale di yɔn fii gilimaŋa a jam ka dila.

²³ Yɔn fii gilima pineok ale ŋayuebi ale jam bo ganaŋa, yɔn fii gilimaŋa meena a gum a bo ŋmazukku a ŋmirisi la ka kook.

²⁴ Limisidɔma kpagni a jam pai ka kaabteerɔ kpagni Seraiya ale kaabteerɔ pai saŋdɔwa Zefania ale nansuiŋ limisidɔma bata ase ligrɔba la.

²⁵ Baai ale diem jam bo tɛŋka po la, wa jam pai ka kpagi dii ale a nya tugurik tɔŋdɔma zuk la ale sagrɔ baai ale bo naab yenni po la bayopɔi. Wa jam maa pai ka gbaŋ ŋmarisidoawa, wa ale chim kpagi dii ale a pai tɛŋka nuruma a gum tugurik tɔŋdɔma po ale wa nuruma pisiyuebi baai ate wa jam a nya ba tɛŋka po la.

²⁶ Kpagni Nebuzaradan a jam pai ba meena kama a ta ba jam Babilon naawa jigi Aribla.

²⁷ Aribla po, Yamat tɛŋka po, ate naawa a jam ko ba. Ba abe jam yik Juda demma a nyini ka badek tɛŋka a ta cheŋ.

²⁸ Nuru baai ate Nebukadnezzar a ji a ta cheŋ la ale nna: Bena ŋayopɔiwa po jam ka Juuma tusa ŋata ale pisiye ale bata (3,023).

²⁹ Nebukadnezzar naamu bena pi ale naanika po nuruba kobsinaaniŋ ale pisita ale baye a nyini Jerusalem.

³⁰ Wa bena pisiye ale ŋatawa po Juuba kobsiyopɔi ale pisinaansi ale banu ate kpagni Nebuzaradan a ta cheŋ. Ba meena jam ka nuruba tusa ŋanaansi ale kobsiyuebi (4,600).

³¹ Ba le jam yik Juda naawa Jeyoiachin a ta cheŋ la bena pisita ale ŋayopɔiwa po ate Evil Merodak a chim Babilon naab la wa yaa lak Juda naawa Jeyoiachin likka dɔkku po chiisa pi ale siyewa po ka daa pisiye ale ŋanuwa danni.

³² Wa yaa jam biisi jiirim biik ale wa ale te wa zula zukpaglik a gaam nalima m ŋala ale jam bo le wa Babilon la.

³³ Dila Jeyoiachin yaa yeeri wa likka gattaŋa a dueni nakpiak alege ate wa boka po meena wa a dɛ ale naawa.

³⁴ Daa meena Babilon naawa a jam a tuni Jeyoiachin kama wa boka po ga paari wa kum dai.