Jeremaya 41 - WEN GBAŊKA

¹ Chiisa siyopɔiwa po Netania nidoabinni Ismael ate wa kokpieŋ a nye Elisama la ate wa chim naawa dɔkdemma wanyi la ale ŋman chim naawa kpaŋŋa dinyi la a yaa jam Ayikam nidoabinni Gedalia jigi Mizpa ale nuruba pi. Ba le diem boro a de ale chaab la,

² Netania nidoabinni Ismael ale nuruba piika ale jam bo le wa la yaa yiti ko Ayikam nidoabinni Gedalia ate wa kokpieŋ a nye Safan la ale gebik, a ko waai ate Babilon naawa a jam lueri ayen wa a nya tɛŋka zuk la.

³ Ismael a jam ko Juuma meena ale jam bo ale Gedalia Mizpa la kama, ale Kaldiya tugurik tɔŋdɔma gela ale jam bo dula la.

⁴ Dai dii ale pai saŋ Gedalia koka la, alege ate waai a seba ku nɔi po la,

⁵ nuruba pinaanuŋ ale chiiri ba teeŋsa, a cheeri ba gatta ale gebi badek a nyini Sikiim ale Siilo ale Samaria a ta ŋanbie tiirita ale ŋan baai nyum ale masa a jam Naawen yenni.

⁶ Netania nidoabinni Ismael yaa jam nyini Mizpa a nyini ayen wa tu ba, a kum a cheŋ. Wa le tu ba la, wa yaa weeni ayen, <>

⁷ Ba le jo tɛŋka po la, Netania nidoabinni Ismael ale nuru baai ale jam bo le wa la a yaa tɔgri ba a yuk ba basi vili po.

⁸ Alege ba po pi a weeni Ismael ayen, <> Dila wa yaa basi ba ale an jam ko ba ale mbala.

⁹ Yɔgyɔgla de vili dii ate wa yuk nuru baai ate wa ko la ale Gedalia a basi du la ka dii ate naab Asa a jam tu a maari wadek Izirali naawa Baasia ale jam a siti wa la. Netania nidoabinni Ismael a jam sueri di ale ka kpieba.

¹⁰ Ismael yaa yik nuru mbala meena ale bo Mizpa la, naawa liema ale baai meena ale tali dula ate tugurik tɔŋdɔma kpagni Nebuzaradan a lueri Ayikam nidoabinni Gedalia ayen wa a nya ba zuk la. Netania nidoabinni Ismael yik ba a yaa ta a duŋ Ammon tɛŋka.

¹¹ Karea nidoabinni Joyanan ale tugurik tɔŋdɔ kpaŋŋa ale bo ale wa la ale wom biem buui meena ate Netania nidoabinni Ismael a nye la,

¹² ba yaa yik ba nuruma meena a cheŋ ba kpaliŋ Netania nidoabinni Ismael. Ba yaa paari ba beli kpienni ale bo Gibeon la.

¹³ Nuru baai meena ate Ismael a yik la ale nya Karea nidoabinni Joyanan ale wa tugurik tɔŋdɔma ale bo le wa la ba sue yaa peenti.

¹⁴ Nuruma meena ate Ismael a yik Mizpa la a ŋmani cheŋ Karea nidoabinni Joyanan jigi.

¹⁵ Alege Netania nidoabinni Ismael ale wa nuruba naaniŋ a vari Joyanan jigi a chali cheŋ Ammon tɛŋka.

¹⁶ Karea nidoabinni Joyanan ale wa tugurik tɔŋdɔ kpaŋŋa ale bo le wa la yaa de baai ale vuuk la Mizpa ate wa tuesi Netania nidoabinni Ismael jigi wa le ko Ayikam nidoabinni Gedalia la ŋaaŋnyiŋ: ba jam ka tugurik tɔŋdɔma ale nipooma ale bisaŋa ale baai ate ba jɛ ba la ate wa ta nyini Gibeon.

¹⁷ Ate ba cheŋ a ga wari Gerut Kimyam a moata Betiliyem ba suiku po a cheŋ Ejipiti

¹⁸ ayen ba bɛ ale Kaldiya demma. Ba jam a chali ba ka yɔgsum dii nyiŋla Netania nidoabinni Gedalia ate Babilon naawa a lueri ayen wa a nya tɛŋka zuk la.