Jeemsi 5 - WEN GBAŊKA

¹ Jigsirɔma, ni wom mi. Ni le jam a nam ka nna yegayega. Dila nyiŋ ku a fɛ kama ayen ni a yiili abe ni a kum.

² Ni ŋantaŋa yegayega ate ni ta la, a kaasi kama ate ni gattaŋa miari mɛ a boro a dɛ ti.

³ Ni ligmɔniŋka mɛ a muni kaasi kama. Munika de a sak kama ayen ni nye kaasi kama ate Wen yaa nya a te ni waalika. Tɛŋka meena kpeglimka a kan beni ale ge jam, alege nama kasim kpelisi ni ŋantaŋa yegayega meena a dueni.

⁴ Ni an tuni nuru baai ale a tom ni tattaŋa po la. Ni be wom ba funfɔblaŋa. Baai ale a che ni ŋantaŋa ni tattaŋa po la kumsaŋa a paari Naawen Dii Ale A Dɛ Tugurik Tɔŋdɔma Niŋ La kama.

⁵ Ni ta ŋanta meena kama a de masim ale naam. Niiga ale a dɛ a biigi ate ba yik ŋa ko diila, nama mɛ a dɛ kama a biigi a gomsi ni dek a magsi Wen buusaŋa.

⁶ Nama a bo ka baai ale kan seba wari la buusa ale a ko ba mɛ, alege ba an baga a zɛri.

⁷ M suata, ni ta chichiiba a limisi ate ti Nyɔnɔwa Yeezu Kirisita a ŋman pilim jam. Kpaarɔ a ta ka chichiiba a limisi borika ŋmorukku ale ŋmoruk kuui ale ŋman pai a saŋ la ate wa yaa nye wa ŋantaŋa a ta jo dɔk.

⁸ Nama mɛ abe ta chichiiba. Ni basi ate ni popola bo jigi yeŋ, dii nyiŋla da dii ate ti Nyɔnɔwa Yeezu Kirisita ayen wa ŋman pilim jam la, a moata kama.

⁹ M suata, ni kan ta funfɔbla ale chaaba ate Naawen a jam a bo ni buusa. Ku kan beni ale ge ate wa jam bo ni buusa.

¹⁰ M suata, ni teeri Naawen biisiteerɔma baai ale jam boro dila po a biisi Naawen wieŋa la. Ni teeri ba le jam ta chichiiba ba ninammu po diila. Nama mɛ a be ta chichiiba ase bala la.

¹¹ Ba ta suipeentik kama yɔgyɔgla, dii nyiŋla ba nya ba ninammu kama ale chichiiba. Ni teeri Job, wa mɛ jam nya wa ninammu ale ka chichiiba. Ni be nya Naawen ale jam basi ate wa nya masim ku kpeglimka po diila. Nya kude a be a sak kama ayen ti nya Naawen ale ta jiirim ale nuruba ninammu po diila.

¹² M suata, dii ale gaam wie meena la ale nna, ku an nala ate ni a pɛ wenŋmazuk nyiŋŋa a yaase tɛŋzuk meena yaase jaab meena. Waai a dan nye wari ate nuru bek wa, ku magsi ka wa weeni ale wensie ayen, <> yaase wa weeni ale wensie ayen, <> Waai kan pɛ ate Naawen a bo mini fu.

¹³ Nuru a bo ni po a nya daanika? Kula nyɔnɔwa puusi a te Wen. Nuru a ŋman bo ni po mɛ ate wa sui a peenti? Nuru wala mɛ a yi yiila a pak Wen.

¹⁴ Nuru a bo ni po a yuagi? Kula nyɔnɔwa a wi Kirisita bisaŋa ale a tu chaab la kpaŋŋa ate ba nye kpaam a kpiiri wa zuk ti Nyɔnɔwa Yeezu Kirisita yuenni nyiŋ, abe ba puusi Wen a te wa.

¹⁵ Ba dan puusi a te Wen ale siaka ayen Wen le nye ate yuarɔwa nya nyiŋyɔgsa, wa le sum basi ate wa nya nyiŋyɔgsa kama. Tuimba tii ate wa tom la, Naawen le vɔŋ a te wa.

¹⁶ Nyaŋa de nyiŋ ni a weeni a sak chaab ni waba tii ate ni nye la abe ni a puusi Wen a te chaab, ate tuem a dan yik ni abe Wen tebi ni. Wayɔrisima nyɔnɔ a dan puusi te Wen, wa puusaŋa a pagra ka nna yegayega.

¹⁷ Dila po Wen biisiteerɔwa Elaja a jam ka nurubiik ase tama mɛ la. Wa jam puusi kama ale nin muna a te Wen ayen ŋmoruk kan ni. Dila nyiŋla, ku jam paari ka bena ŋata ale geli, ŋmoruk an jam ni ya.

¹⁸ Bena ŋata ale geli, ale jam taam la, wa yaa ŋman puusi a te Wen ayen wa basi ate ŋmorukku ni. Ŋmorukku yaa jam ni nna yegayega ate jaabuuri meena a ŋman a chim.

¹⁹ M suata, nama wanyi a dan a bɛ wensie suiku po ate ni wanyi a ŋman yik wa a ta nyini wa biem suiku po a ŋman jam,

²⁰ kula nyɔnɔwa a vari ka tuimbaata nyɔnɔwa a ta nyini kum po a nyini. Wa be ŋman nye kama ate Wen le vɔŋ tuimbaata nyɔnɔwa tuimbaataŋa yegayega a te wa.