Jeemsi 4 - WEN GBAŊKA

¹ Ka boa ale soa ate nama kasim a kpaliŋ chaab ale ta daanika ale chaaba? Ni a kpaliŋ chaab ka nidek ale a yaali diila nyiŋ.

² Ni ta kɔrisa ale ŋanta, alege ni kan nya ba. Ka dila ale soa ate ni a ko nuruba. Ni kasim a yaali ka ni vaanchaab ŋanta, alege ni an baga a nya ba. Ka dila ale soa ate ni sue kasim a kpaliŋ chaab la. Ni le kan puusi a bek Wen ayen wa pai te ni la nyiŋ ale soa ate ni kan nya ba.

³ Ni ka popola yɔrisima ale ŋan baai ate ni puusi a bek ayen wa pai te ni la. Ka nidek popola baataŋa yaalika nyiŋ ate ni a bek Wen. Ka dila ale soa ate wa kan pai a te ni.

⁴ Nama kaboŋ nyeerisaŋa nna, nama zɛ ayen doata ale tɛŋka po ka dachaani ale Naawen ya? Dila nyiŋ waai ale a yaali ayen wa chim tɛŋka po doa la a chim ka Naawen dachiak.

⁵ Ni kan a poli ayen ba le ŋmarisi dii Wen Gbaŋka po la, ka kinla. Ba ŋmarisi weeni ayen, <>

⁶ Alege ŋmante kaai ate Wen pai te ti la, a pagra gaam chiik kaai ate wa pai nyo ti po la kama. Ba ŋman ŋmarisi Wen Gbaŋka po a weeni ayen, <> (Wamagsima 3:34)

⁷ Dila nyiŋla ni pai nidek meena a te Wen abe ni zɛri jabioku ate wa nyini ni jigi a chali bɛ.

⁸ Ni forisi paari Wen ate wa mɛ forisi paari ni. Nama baai ale ka tuimbaata nyam la, ni nari ni nisima ale waba tii ate ni a nye la. Nama baai ale ka popola buye nyam la, ni sugri ni popola tɔgatɔga ŋaai ale bo ni suiniima po la a basi.

⁹ Ni basi ate ni sue kaasi abe ni a kum. Ni basi ate ni laataŋa mɛ a tagri chim kumsa, abe ni popeentika a chim sui kaasuŋ.

¹⁰ Ni yik nidek a zuli Naawen ate wa pai ni chim niŋdeerɔba.

¹¹ M suata, ni kan a biisi wabaata wie a te chaaba. Baai ale a biisi wabaata wie a te chaab ale a bo chaab buusa la, bala chaab a biisi ka wabaata wie a te Wen Sinsaŋŋa ale a bu ŋa buusa. Nama dan a bu Wen Sinsaŋŋa buusa, ku a sak se ni kan va ŋa kama la.

¹² Wen nyiini ale a te sinsaŋŋa ale a bo nuruba buusa mɛ. Wala nyiini le baga vari ti a basi, wala nyiini abe le baga a te ti waalika. Ni dan a bo ni suata buusa, nama a poli ayen ni ka bana?

¹³ Ni ba gela kasim a weeni chaab kama ayen, <>

¹⁴ Ni be basi ate m weeni sak ni ayen ni zɛ chum ale ta dii cheen la. Ni a nye se ka pik la, ka dan boro saluiku, ku kan beni ale ge ate ka ŋman a bɛ.

¹⁵ Ku magsi ka ni a weeni ayen, <>

¹⁶ Yɔgyɔgla de ni ta ka kanjanta ale a nak kuusa. Ni ale a weeni diila an nala.

¹⁷ Nuru waai ale seba tuimaŋsa tomka, alege a zɛri ŋa tomka la, wa a nye ka wabiok.