Jeemsi 3 - WEN GBAŊKA

¹ M suata, ni seba ayen Wen le jam a bo tama baai ale ka sagrɔba la buusa a gaam ti sua tintila. Ka dila ale soa ate ku a fɛ ayen ni kan piisi a chim sagrɔba.

² Ti meena a kasim a nye wie a kaasi kama. Nuru a dan kan nye wie a kaasi wa biik po, wa ka nuru maŋ nna yegayega ale baga wadek mɛ a yik nalimnyiini.

³ Nuruba nyiem a pai ka wusuma noabaŋsa a su ŋa noa po ate ŋa baga a siak ba noa a va ba a cheŋ juijui meena ate ba a yaali la.

⁴ Ni a poli ŋaaruŋ kpioŋ kuui ale bo nyiam po ate vioku a fɔbi ku ate ku a chali nyiam zuk nna yegayega la. Ŋaaruŋku damdɔma a baga a pai duok fiik kama a nye ate ŋaaruŋku a cheŋ juijui meena ate ba a yaali ayen ku cheŋ la.

⁵ Ku ka dila ale nurubiik giŋgeluŋ kuui ale kan soa dii alege a biisi kanjanta wie la. Ni be ŋman poli nya ase bolim magadega ale baga a dɛ sagi kpienni diila.

⁶ Nuru giŋgeluŋ a nye se ka bolim la. Ku ka bolim buui ale nyini Sitaana jigi a baga ju tɛŋka meena la. Giŋgeluŋku de abe le baga kaasi ti nyuvunni ti nyeka meena po ale bolim buui ale a nyini bolim buui ale kan maara kpimsi la jigini.

⁷ Nuruba baga a baliŋ duŋsa ale nuinsa ale wiiga ale nyiam po ŋanta alege

⁸ waai karo a diem baga a baliŋ wa giŋgeluŋŋoa. Ti giŋgeluŋtaŋa ka ŋan baata nna yegayega ate ti an baga a yik ti. Ti a nye se ka choŋ pagrik la.

⁹ Ti giŋgeluŋtaŋa ate ti pai a pak Naawen ti Kowa, ale ŋman pai kula a ka a te nuruba, baai ale a neesi Wen la.

¹⁰ Ti pai ka noa ŋala a pak Wen ale ŋman pai noa ŋala dek a lɛ nuruba. M suata, dii ate ti a nye la an nala.

¹¹ Ni seba ayen vili yeŋ nyiam an baga a masa ale a tua.

¹² M suata, nama diem nya kiŋkaŋ ale ka yɔni chaama yaase gaab ale bu yɔni kiŋkama yaase nya buui ale ta yesa la a baga a chim nyanyuimoa?

¹³ Nuru wanyi a bo ni po a ta yammoa? Wa basi ate wa boka ale wa tuimaŋsaŋa a sak nuruba ayen wa ka yam nyɔnɔ, alege ka kanjanta mɛ.

¹⁴ Alege ni dan ta nyuri ale popo soblum ale chim butuem nyam, ni kan a nak kuusa a velim ayen ni ka wensie nyama.

¹⁵ Yammu de choa an nyini Wen jigi ya, bu nyini ka nurubiik ale chichirik baata jigi.

¹⁶ Juijui meena ate nuruba a dan boro ate ba ta nyuri ale butuem ba nyiem kasim ta ka chaab ale a tom wabaata tuima meena nna tɔgatɔga.

¹⁷ Nuru waai ate Wen a pai wa yam weleŋka a te wa la, kan nye kpaliŋsa, wa a yik ka wadek, wa kan zɛri nuruba noa, wa ka jiirim nyɔnɔ, wa a tom ka tuimaŋsa, ale kan lugi, ale chim nuru peeluk nalimnyiini.

¹⁸ Nuru waai ale a nye ate nuruba a boro ale suiyɔgni ale chaab la, ku a nye ase nuru wala choa a bori ka suiyɔgni ale ge a che wayɔrisima yaase wamaŋsa la.