Jeemsi 2 - WEN GBAŊKA

¹ M suata, nama baai ale ta siaka ale ti Nyɔnɔwa Yeezu Kirisita waai ale ka zula meena nyɔnɔ la, ni kan luk a yaali nuruba gela abe ni basi ba gela.

² Ni dan tigsi chaab ayen ni puusi a te Wen ate nuruba baye a jam jo ni tigsika jigini, ate ba wanyi a jo jigsirɔ gatta ale su ligra nifelima ate ŋa a nyaksi, alege nwala mɛ jo garuk tii ale kan nala,

³ ni dan te jigsirɔwa zula nna yegayega a weeni wa ayen, <> alege weeni jajakka ayen wa, <> yaase <>

⁴ nya kude a sak kama ayen ni a bo ka nuruba buusa dii nyiŋla, ni popolaŋa ka popola baata, ku an nala ate ni a luk chaaba.

⁵ M dek suata, ni wom de. Wen lueri ka baai ate tɛŋzuk de nuruma a poli ayen ba ka ŋanjaksa la ayen ba jigsi ale ba siaka ale Wen, abe ba dɛ Wen naam buui ate wa puulim ayen wa pai a te baai ale a yaali wa la.

⁶ Nama a nye ŋanjaksa ase ba daa nuruba la alege a zuli jigsirɔba baai ale a basi ate ni a nya ninam ale a dari ni a ta a cheŋ boteerɔba niŋ la.

⁷ Bala ale biisi a kaasi yuei maŋ kaai ate Wen a te ni la.

⁸ Ni dan a va Wen naamu sinsak ŋaai ate ba ŋmarisi Wen Gbaŋka po la nalimnyiini ayen, A yaali fi vaanchoa ase fi ale a yaali fidek diila. (Kaabka 19:18)

⁹ Ni dan luk a yaali nuruba gela ale kan yaali ba gela, dila an nala. Kula nyɔnɔwa a tom ka wabiok. Wen Sinsaŋŋa abe le bek wa kama

¹⁰ dii nyiŋla, waai a dan va wa sinsaŋŋa meena alege jam kaasi dinyi wa kaasi ka ŋa meena.

¹¹ Waai ale weeni ayen, Kan nye kaboŋ la, (Nyinika 20:14) mɛ ale weeni ayen, Kan ko nuru, (Nyinika 20:13) yɔgyɔgla de fi dan kan nye kaboŋŋa, alege a ko nuru, fi nye kaasi Sinsaŋŋa kama.

¹² Ku a fɛ kama ayen ti boro abe ti a poli ayen ti ka nuru baai ate Wen le pai wa sinsak ŋaai ale a vari nuruba a basi la, a bo ti buusa.

¹³ Tama be dan kan basi ate ti boka a nye dila, Wen kan ta jiirim ale ti dii nyiŋla, ti an jam ta jiirim ale ti vaanchaaba. Jiirim nyɔnɔ kan chali yɔgsum ale Wen buusa boka.

¹⁴ M suata, nuru waai a dan weeni ayen wa ta siaka ale Yeezu alege kan tom tuimaŋsa wa siaka nyiini an baga vari wa a basi,

¹⁵ ase ni wanyi nin kan ta garuk a jo yaase ŋandiinta a dɛ,

¹⁶ ate ni wanyi yaa nya wa a weeni wa ayen, <> alege kan poom a poli nuruwa ale a yaali fi maarika diila,

¹⁷ fi siaka ale Yeezu nyuenta ale boa? Dii nyiŋla waai a dan ta siaka ale Yeezu ale kan tom tuimaŋsa ku a sak se siak kala choa kpi kama la. Ka ka kiriya.

¹⁸ Alege waai ale weeni ayen, <> Mi ale weeni wa ayen, <>

¹⁹ Fi ta siaka ayen Wen ka dinyi dekki a boro? Kula ka wensie. Chichirik baataŋa mɛ a ta siaka kama ayen Wen ka dinyi dekki a boro. Si a chali wa yɔgsum mɛ kama.

²⁰ Ni basi ate m weeni sak ni ayen ni ka betta, waai a dan ta siaka ale Yeezu alege kan tom tuimaŋsa, wa siaka kiri ale boa?

²¹ Ni basi ate ti teeri ti kokpieŋka Abrayam wie. Wen jam wi wa kama ayen wayɔrisima nyɔnɔ. Wa yaa jam weeni wa ayen wa yik wa nidoabinni Aizik a ta cheŋ juijui ate ba a kaab la a ko te wa. Wa ale weeni wa dila la, kun beni ya alege ate Abrayam siak ayen wa ko wa te wa.

²² Abrayam siaka ale wa tuimaŋa a jam ka bunyi. Wa ale nye diila a sak ti kama ayen wa sum ta siaka ale Naawen kama.

²³ Wie ŋaai ate ba ŋmarisi gbaŋka po la, ka wensie. Ba ŋmarisi weeni ayen, Abrayam ta siaka kama ale Wen. Ka dila nyiŋ ale soa ate Wen a wi wa ayen wayɔrisima nyɔnɔ (Piilimka 15:6) ate ba wi wa ayen Wen doa la.

²⁴ Yɔgyɔgla de ni be basi ate m weeni sak ni ayen ku a fɛ kama ayen waai ale ta siaka ale Wen la a tom ka tuimaŋsa. Be daa wa siaka nyiini ale basi ate wa a chim wayɔrisima nyɔnɔ, ka wa nyeka.

²⁵ Ku jam ka dila ale Arayab. Wa jam ka nidoa yaalik nna yegayega. Nuruba yaa jam nyini Izirali tɛŋka po a cheŋ ayen ba mak nya ba dachaasaŋa Jeriko demma. Ba ale jam la, Arayab yaa jam maari ba ate ba nya suik a chali bɛ. Wa nye maŋka de ale basi ate Wen basi ate wa nya varibasika ase Abrayam nye maŋka ale basi ate wa nya varibasika diila.

²⁶ Ni basi ate m ŋman weeni sak ni ayen, ase nuru chiik a dan kan bo wa jigi ya, wa daa javuwa. Waai abe dan ta siaka ale Wen alege kan tom tuimaŋsa, wa siaka daa siak vuuwa, ka kpi kama.