Niŋdeerɔba 3 - WEN GBAŊKA

¹ Tɛŋsaŋa de ale Naawen a tali basi ayen wa nye Izirali dem baai meena ale kan tu kpaliŋsa Keenan tɛŋka po la a nya.

² Wa nye kude ayen wa sak ba ka Izirali ŋaaŋbisaŋa baai ale kan seba kpaliŋ sii ale liŋ nye la wie.

³ Filistia niŋdeerɔba banuwa, Keenan demma meena ale Saidon demma ale Yivi demma ale bo Lebanon guutaŋa ale nyini Baal Yermon Guuku a cheŋ Lebo Yamat la.

⁴ Ba tali boro ayen ba nye ka Izirali demma a nya ase ba le siak te Naawen wieŋa, ŋaai ate wa ta va Moosis zuk a te ba kokpieŋsaŋa la.

⁵ Izirali demma a yaa jam bo Keenan ale Yit ale Amori ale Perizzi ale Yivi ale Jebus demma po.

⁶ Ba jam a faari ka ba liema ale pai badek liema a yalisi tɛŋ sila bisaŋa ale a va ba bɔgtaŋa.

⁷ Izirali demma a yaa nye biem Naawen nimbie po, ba jam baŋ Naawen ba Wenni wari kama ale a va Baal ale Asera bɔgtaŋa.

⁸ Ate Naawen sui a yaa puuri ale Izirali demma ate wa pai ba a nyo Kusan Arisataim, Araam Nayaraim tɛŋka naawa nisima po, waai ate Izirali demma a jam bo wa jigi a paari bena naaniŋ la.

⁹ Alege ase ba le jam kum te Naawen la, Wa yaa yeeri varibasidɔ a ta nyini badek po. Wa yuei ale Otniel Kenaz biik, Kaleb yoa ale nye wa, wala ale jam vari ba a basi.

¹⁰ Naawen Chiika yaa jam wa zuk, ate wa chim Izirali niŋdeerɔ a cheŋ kpaliŋ. Naawen a pai Kusan Arisataim, Araam naawa a nyo Otniel nisima po, wala ale jam nya pagrim wa zuk.

¹¹ Tɛŋka a yaa jam nya suiyɔgni bena pisinaansi a paari diipo ate Otniel Kenaz biika a kpi la.

¹² Izirali demma a ŋman nye biem Naawen nimbie po, ba le nye biemu de la nyiŋ Naawen a te Eglon Moab naawa ka pagrim Izirali demma zuk.

¹³ Wa jam wi ka Ammon ale Amalek demma ate ba gum wa po, Eglon yaa nye kpaliŋ ale Izirali demma a tuesi Tɛŋka ale ta Kpinkpatta Tiisaŋa la.

¹⁴ Izirali demma a jam bo ka Eglon Moab naawa jigi a paari bena pi ale naaniŋ.

¹⁵ Ate Izirali demma a ŋman kum te Naawen ate wa te ba varibasidɔ, wa yuei ale Eyud, wa jam ka galik, Gera Benjamin denɔwa biik. Izirali demma a jam tom wa ale ka zula tiirim Eglon Moab naawa jigi.

¹⁶ Eyud yaa nye gebik noa ŋaye ate ka woglimmu a paari anamagib buta, a pai ka su wa juga kɔsukku nyiŋ ate wa gattaŋa a lik ka.

¹⁷ Wa yaa pai zula tiirimu a te Eglon Moab naawa waai ale jam biigi nna yegayega la.

¹⁸ Eyud ale jam te zula tiirimu a nueri la ŋaaŋnyiŋ, wa yaa basi nuru baai ale ji tiirimu la suik po.

¹⁹ Bɔgtaŋa ale moata Gilgal jigini la wa yaa ŋman cheŋ a weeni ayen, <> Ate naawa a yaa weeni ayen, <> Ate baai ale tom a te wa la a yaa basi wa.

²⁰ Eyud yaa forisi paari wa ase wa le kala wadek wa nyiini wa naam yeri gboŋku zuk la a weeni ayen, <> Ase naawa ale yiti wa zukpaglika zuk la,

²¹ Eyud yaa pai wa gala nisaŋa a yeeri gebik a ta nyini wa juga kɔsukku nyiŋ a chub naawa lɔgni.

²² Gebika yikka jigini a maa feri jo kama a taam na nyini wa ŋaaŋka. Eyud an dari gebika a voori ya, ate wa nyiŋka kpaamu a lik gebika meena.

²³ Eyud yaa nyini peelim ale kpari dɔkku tuataŋa.

²⁴ Wa le cheŋ la ŋaaŋnyiŋ naawa tomteerɔma a yaa jam nya ŋmazuk dɔkku tuataŋa a kpari. Ba yaa weeni ayen, <>

²⁵ Ba yaa limisi ate chivie a ga yik ba, alege wa an diem a lak dɔkku tuataŋa, ba yaa pai saari fiik a lak ti. Dula baa yaa nya ale ba nyɔnɔwa a lo doa tɛŋ a kpi.

²⁶ Ase ba le a limisi la, Eyud yaa cheŋ. Wa jam va ka bɔgtaŋa tɛŋ a cheŋ Seira.

²⁷ Ase wa le paari dula la, wa yaa peeri damuniŋka Ɛfraim tɛŋka ate guutaŋa a bo ka po la, ate Izirali demma a va wa a nyini guuku zuk a siŋ. Wa ale jam de ba niŋ.

²⁸ Wa weeni ayen, <> ale Naawen a pai Moab ni dachaasaŋa a nyo ni nisima po kama.>> Ba yaa va wa a siŋ a tuesi kauk kuui meena ale va Jodan benni a cheŋ Moab la, ba an jam siak ate waai a lo jueli ya.

²⁹ Dila powa ba jam ko Moab demma ase ka nuruba tusa pi (10,000) la, baai meena ale pagra la, nuru yeŋ mɛ la an jam a bɛ ya.

³⁰ Dai dila danni Moab jam siak te Izirali demma kama, ate tɛŋka a nya suiyɔgni a paari bena pinaanuŋ.

³¹ Eyud ŋaaŋnyiŋ ka Samgar Anat biika, waai ale jam ko Filistia demma kobsiyuebi ale diok kuui nɔi ale chɔrisi la. Wa mɛ a jam vari Izirali demma a basi kama.