Niŋdeerɔba 2 - WEN GBAŊKA

¹ Naawen maarɔwa a yaa nyini Gilgal a cheŋ Bokim ayen, <

² ate nama a kan nye nɔiyeŋ ale tɛŋka de nuruma, alege ni kpiti ba kuŋkuŋtaŋa a basi. Alege ni an wom m nɔi ya, ka boa ate ni nye nna?

³ Dila nyiŋ mi a weeni ni kama ayen m kan yiak ba a basi te ni, ba le chim ka munsa ni ganaŋa abe ba bɔgtaŋa a chim baruk a te ni.>>

⁴ Ase Naawen maarɔwa ale jam biisi wieŋa de a te Izirali demma meena la, nuruma a yaa kum nna yegayega,

⁵ ale wi jigini yuei ayen Bokim. Dula jigini ba yaa nye kaabka a te Naawen.

⁶ Josua ale basi Izirali demma ate ba cheŋ la ŋaaŋnyiŋ, ba yaa cheŋ ba tuesi tɛŋka, waai meena ale wadek nitalim.

⁷ Nuruma a jam va Naawen kama nalimnyiini diipo ate Josua a diem vua la ale nisɔm baai ale jam goa beni gaam wa la, baai meena ale nya wakpiema ŋaai ate Naawen a nye te Izirali demma la.

⁸ Naawen tomteerɔwa Josua waai ale ka Nun nidoabinni a jam ta ka bena kook ale pi ale kpi.

⁹ Ate ba gu wa tɛŋ kaai ale ka wa nitalim la po, Timnat Yeres ale bo guuku ale bo Ɛfraim la, Gaas Guuku wiilukku geŋsa.

¹⁰ Gaŋ kala meena ale kpi la ŋaaŋnyiŋ, gaŋ ka choa ale yiti a zɛ Naawen yaase wa le nye dii a te Izirali demma la.

¹¹ Izirali demma a yaa nye biem Naawen nimbie po a tom a te Baal bɔgtaŋa.

¹² Ba yaa zɛri Naawen, ba koma Wen dii ale ta ba nyini Ejipiti po a nyini la. Ba jam va ale a puusi nuruba tɔgatɔga wenaŋa ale gilim ba la. Ba jam nye kama ate Naawen sui a puuri,

¹³ dii nyiŋla ba zɛri wa kama ale tom a te Baal ale Astoret wenaŋa.

¹⁴ Wa suipuurumu po wa yaa ta chaab ale Izirali demma ate Naawen yaa pai ba a te baai ale siti ba la ate ba vari ba. Wa yaa pai ba a da te ba dachaasaŋa ale gilim ba la, baai ate ba an ŋman jam baga a zɛri.

¹⁵ Diipo meena Izirali demma a dan nyini peelim ba nye kpaliŋ Naawen ale namsi ba ate ba nak dɛ ba ase Wa le pɛ a te ba la. Ba jam bo ka ninam kpiem po.

¹⁶ Naawen a yaa lueri niŋdeerɔba baai ale vari ba a ta nyini baai ale siti ba la nisima po a basi.

¹⁷ Alege ba an diem a wom ba niŋdeerɔma nɔi ale pai badek a te bɔgluk yoŋta a puusi ti. Ba an jam a nye ase ba koma la, ba deri kpabi pai ba koma suiku a basi kama, suik kuui ale a te Naawen sinsaŋŋa zula la.

¹⁸ Diipo meena Naawen a dan te ba niŋdeerɔ, wa bo ale ba ka di a tom vari ba a ta nyini ba dachaasaŋa nisima po a basi ase niŋdeerɔwa ale vua a paari diipo la. Dii nyiŋla Naawen a ta jiirim ale ba kama ase ba le bo baai ale a namsi ba la jigi a kum la.

¹⁹ Alege niŋdeerɔwa a dan kpi, nuruma a nyiem pilim ŋmani kama a ŋmasi tom kaasi a gaam ba kokpieŋsaŋa, a va bɔgluk yoŋta a tom a te ale a puusi ti. Ba jam zɛri ba biem nyeelaŋa ale ba tukpari suitaŋa basika kama.

²⁰ Dila nyiŋ Naawen sui yaa puuri nna yegayega ale Izirali demma ate wa weeni ba ayen, <

²¹ Mi a kan ŋman yiak tɛŋsaŋa de kanyi a te ba, sii ate Josua a kpi alege la.

²² M le pai si kama a nye Izirali demma a nya ase ba ta Naawen suiku ale a cheŋ ku po ase ba kokpieŋsaŋa la ya.>>

²³ Naawen a basi tɛŋ sila ayen si tali boro kama, Wa an jam yiak si a basi bunyi dekki a pai si a nyo Josua nisima po.