Galatia 5 - WEN GBAŊKA

¹ Ni soa ka nidek yɔgla. Dii nyiŋla, Kirisita yeeri ti kama a ta nyini yɔmma po a nyini. Dila nyiŋ ni be ŋmasi yik nidek ate ni kan ŋman chim yɔmba.

² Ni lak tue a wom m biika. Mi, Pɔɔl ale a weeni ni ayen ni dan basi ate ba gebi ni yoaŋa, ku a sak se Kirisita ale nye dii a te ni la ka ka kiriya.

³ M ŋman pilim a kaam ni kama ayen waai a dan basi ate ba gebi wa yoari, ku a sak ase wa va ka Sinsaŋŋa meena la.

⁴ Nama baai ale a poli ayen Wen pai ni chim wayɔrisima nyam ni ale a va sinsak ŋaai ate wa pai te Juuma la, ni seba ayen, ni a zɛri ka Kirisita dila. Wamaŋ kaai ate Kirisita nye te ni la, abe ŋman daa wamaŋ a te ni.

⁵ Alege tama baai ale poom kan pai yua gebika chim wari la, tama ta yiila kama ayen Wen Chiika pagrim nyiŋ ti le chim ka wayɔrisima nyam Wen jigi. Dii nyiŋla, ti ta siaka ale Kirisita kama.

⁶ Ase waai ale Yeezu Kirisita a dan chim bunyi, kula nyɔnɔwa gebi yoari yaa wa an gebiya, ba daa tɔgatɔga ale chaaba. Ba ka bunyi. Wari dii nyiini ale ka wamaŋ la ale ti ta siaka ale Kirisita kama ale ta yaalika ale chaab mɛ ate ku sum a sak ayen ti ta yaalika ale Kirisita kama.

⁷ Ku piilimka po ni jam a va Wen suiku ka nalimnyiini. Alege yɔgyɔgla de ni basi kama ate sagrɔma de baai ale a velim la a jam nye ate ni basi wa wensie suiku vaka.

⁸ Ku daa Wen dii ale wi ni ayen ni chim wa nuruba la ale nye dila.

⁹ Nuru le magsi kama ayen, fi dan pai dabinta a nyo boroborok zom po, ku a fɛ ayen ku fuusi kama.

¹⁰ Alege tama ale ti Naawenni ale ka bunyi la, m ta siaka kama nalimnyiini ayen ni popolaŋa ale mi popolaŋa ka bunyi. M be seba chak kama mɛ ayen baai ale a daani ni la, Wen le te ba waalika kama.

¹¹ M suata, mi seba kama ayen nuruba diem a weeni kama ayen mi a sak nuruba ayen waai ale ta siaka ale Kirisita la ku a fɛ kama ayen kula nyɔnɔwa gebi wa yɔni. M dan jam a sak nuruba ka dila nna, ba ate kan ŋman jam a namsi mu ase ba ale a nye dii nna la. M dan a weeni nuruba ayen ku a fɛ kama ayen waai meena gebi wa yoari, ku la a sak kama ayen wie ŋaai meena ate mi a sak a magsi chaab ale Kirisita ale kpi jabarimu nyiŋla wie, dila ate basi kama ate waai sui kan puuri ale mu.

¹² Mi a yaali kama ayen baai ale a daani la, ba dan poom a yaali ba yeeri ba kolaŋa.

¹³ M suata, Wen wi ni kama ayen ni kan ŋman chim Moosis Sinsaŋŋa yɔmma. Ni be ale ŋman kan daa yɔm la, ku a fɛ ayen ni kan poli ayen ni nye wari dii meena ate ni a yaali la. Ni basi ate yaalika bo ni suŋsuŋ ate ni a tom a te chaab.

¹⁴ Boan nyiŋŋa, sinsaŋŋa meena a gum chaab ka Sinsak yeŋ. Sinsak yeŋka de ale, <> (Kaabka 19:18)

¹⁵ Alege ni daa nye chaab ase ni ka gɔi duŋsa la, a kpaliŋ chaab a te chaab tueta, ni kpesi ate ni kan kaasi chaab meena.

¹⁶ Dila nyiŋla ni lak tue wom m le a weeni ni dii ayen ni basi ate Wen Chiika dɛ ni niŋ wie meena po ate ku kan nye ase ni a tom ka nidek ŋanyaalik tuima la.

¹⁷ Nurubiik nyiŋka ale a yaali diila a kan va chaab ale Wen Chiika ale a yaali wie ŋaai la. Wen Chiika ale a yaali wie ŋaai la a kan va chaab ale nurubiik ŋanyaalika suiku. Ŋantaŋa de bayewa yaalika ka dachaasa ale chaab. Dila nyiŋla waai ka suik a nye dii ate wadek a yaali la.

¹⁸ Wen Chiika abe dan dɛ ni niŋ wie meena po, ku a sak se sinsaŋŋa ŋman karo a soa ni la.

¹⁹ Nama dek seba nurubiik dek popola a ta nyini wa suinum po ale ka diila kama. Ŋa an bola sugiya. Wie ŋaai ate nurubiik popola a basi ate wa a nye la ale, nipok yaalik ale nidoa yaalik ale daŋta tuima ale kaboŋsa tuima ale

²⁰ bɔgta kaabka ale sampoporinni tuima ale kisi chaab tuima ale kpaliŋsa ale nyuri dɛka ale suipuurum ale degaamka ale poori chaab ale nyanueriŋ ale

²¹ ninŋmaarima ale daam bukka ale kanjanta ale wieŋa chaab meena. Mi a yaali ayen m ŋman kaam ni kama ase m le poom liŋ kaam ni diila, baai meena ale a tom nyaŋa de chaab la a kan maa nya Wen Naamu.

²² Alege Wen Chiika ale a nye ate nuruba a ta wie ŋaai la ale yaalika ale popeentik ale suiyɔgni ale chichiiba ale zula teka ale wamaŋsa tuima ale wensie ale

²³ zaab m dek ale yik m dek. Sinsaga karo a weeni ayen nuru kan nye wieŋa de.

²⁴ Nuru baai ale ka Kirisita bisa la a basi wie ŋaai meena ale ka wabaata ate ba jam a nye la kama. Ku a nye se ba pai wieŋa de meena a nak kpi ka Yeezu Kirisita jabarimu nyiŋla.

²⁵ Be ka Wen Chiika ale te ti nyuvuri. Ni be basi ate wa soa ti ale wie meena wuu ate ti a nye la.

²⁶ Ni kan basi ate ti ta kanjanta, abe ti a nye ate chaab sue a puuri yaase ti a yaali chaab ŋanta.