Filipai 3 - WEN GBAŊKA

¹ M suata, ni basi ate ni sue a peenti ti Naawenni nyiŋ. Mi liŋ ŋmarisi weeni ni ka wari alege mi a yaali ayen m ŋman ŋmarisi ka dila dekdega, ku be kan daani mi, dii nyiŋla, ku le maari ni kama ate ni kan lo.

² Ni kpesi nidek ale baai ale gebi ba yoaŋa ale a tom tuimbaata alege ba a yaali ayen ba gebi nama mɛ yoaŋa la.

³ Ba ale a gebi ba yoaŋa diila a kan va ku suiku ale ka diila. Wen a kan yaali ayen tama a gebi tidek dila, dii nyiŋla wa pai ka wa Chiika a nyo ti suiniimaŋa po, ate ti baga a zuli wa ale wensie. Yɔgyɔgla de ka Yeezu Kirisita ale soa ti. Dila nyiŋla ti ŋman ka wari ale nuruba ale a tom ba tuima dii ale badek zupuuta la.

⁴ Ase ku dan ka wensie ayen, nyaŋa de nyeka ka wamaŋsa nalimnyiini, mi dek ate ta siaka ale ŋa kama a gaam waai meena.

⁵ Mi nyini ka Izirali buuni po, Benjamin dɔkku biik, dila la m kowa ka Juu. Ase ba le jam a biak mi ate mi a nya daa naaniŋ la, ale ba gebi mi yɔni. Mi yaa le jam a chim la, ate mi yaa a chim nuru baai ate ba a wi ba ayen Farisiiba la po wanyi. Nuru bala a jam ka baai ale jam a va Juuma kisitaŋa nalimnyiini la.

⁶ Nuru waai an diem a jam baga a weeni ayen mi diem a jam nye Juuma wari dinyi mɛ la a kaasi ya. Dila nyiŋla, mi jam chim ka wayɔrisima nyɔnɔ wieŋa de po. Mi nina jam kasim muni kama ate mi daani baai ale a va Yeezu la.

⁷ Dila powa mi jam a poli kama ayen mi le nya nyuenta wieŋa de meena po kama alege yɔgyɔgla de ate mi a yaali ayen m seba Kirisita la, m seba ayen ŋala meena a chim ka wakayaata mi jigi.

⁸ Ka wensie ate mi a weeni ayen jaabuuri meena ate mi ta la, mi an pai ba chim ŋanta dii nyiŋla, m dan seba ti Nyɔnɔwa Yeezu Kirisita, kula a gaam ŋantaŋa de meena kama nna yegayega. Ka Kirisita sebika nyiŋ ale soa ate mi a yaali ayen m va wa nyiŋ a jɔk jaab meena la. Dila nyiŋla, mi nya wari meena ase ka kinla la alege a yaali ayen mi ale wa a kasim a chim bunyi.

⁹ Mi yaa ka wayɔrisima nyɔnɔ Wen niŋ m le ta siaka ale Kirisita la nyiŋ. Ku be daa wari ate m nye nyiŋŋa yaase Juuma kisitaŋa vaka nyiŋŋa. Yɔgyɔgla alege ta siaka ale Kirisita la nyiŋ ate Wen weeni ayen mi ka wayɔrisima nyɔnɔ.

¹⁰ M be ŋman a yaali kama ayen m seba Kirisita dek abe m ta pagrim buui ate Wen a pai nak wa a yiti kum po la. M be ŋman a yaali mɛ ayen m nam a kpi ase Kirisita la,

¹¹ ate Wen a nak mi mɛ a yiti kum po ate m ga bo ale wa.

¹² Mi kan weeni kama ayen mi poom deri nya wieŋa de meena ate mi a poli ayen m nya la kama. M be kan weeni kama ayen m deri ka nuru weleŋ alege, m chali a dɛ ka niŋ ayen nya ŋantaŋa de, dii nyiŋla ka dila nyiŋ ate Yeezu Kirisita dek a yik mu a nyo wa nisima po.

¹³ M suata, mi an diema a poli ayen m soa ŋantaŋa de, alege m pai m suinum meena a basi ka jaab wanyi jigi. Mi baŋ ŋaaŋnyiŋ wieŋa kama, alege a pai m nina ale m popola meena a basi ka wa dii ale bo niŋ la po.

¹⁴ Mi popola a bo ka niŋ ayen m nya wanni de, be ka Wen wiik Yeezu Kirisita nyiŋ ayen m nya nyuvuri dii ale bo wenŋmazuk la.

¹⁵ Tama baai ale pak Wen suiku po la a magsi ayen ti ta ka popolaŋa de chaab. Alege baai a dan ta popola yɔna Wen ale basi ate ni miŋ.

¹⁶ Wakpienni meena ale ni basi ate ti meena a va Kirisita ase ti ale poom a va wa dii a ta jam paari jinla la.

¹⁷ M suata, ku a fɛ ate ni a tomsi mi ale a va Kirisita ŋaaŋ diila. Ti le jam bo ale chaab la, ti jam sak ni wa wie kama nalimnyiini. Ka dila ale soa ayen ni a tomsi mi dila.

¹⁸ Mi poom weeni nama wieŋa de a paari ka ku nɔi di choa ayen nuruba yegayega a zɛri Kirisita jabarimu wie sinsaŋŋa kama. Yɔgyɔgla de, m be ŋman a weeni nya kude a sak ni kama ale sui kaasuŋ.

¹⁹ Wen a za ayen wa kaasi bala chaama kama, dii nyiŋla ba nyiŋka kɔrisaŋa a chim ka ba bɔgta. Ba ale magsi ayen ba a chali chivie ale wie ŋaai la ba ta ka kanjanta ale ŋa. Ba a poli ka tɛŋzuk de wie nyiini.

²⁰ Tama ale ba a daa bunyi, dii nyiŋla tama ka Wen dek wenŋmazuk po nuruba. Ti a limisi ka ti Nyɔnɔwa Yeezu Kirisita waai ale vari ti ti tuimbaataŋa po a basi la ale nyiŋbiiri ayen wa basi dula jigini abe wa ŋman pilim jam ti jigi ate ti tu wa.

²¹ Wa dan jam, wa le tagri ti nyiŋsaŋa sii ale kan ta pagrim la a nye si ate si a nye ase wadek nyiŋka kaai ale ta pagrim ale nalim yegayega la. Wa pagrimu de mɛ ale basi ate wa tigsi jaab buuri meena a ta jam wa jigi a soa ba.