Filipai 2 - WEN GBAŊKA

¹ Ni dan nya nyiŋbiiri a nyini ni le Kirisita ale ka bunyi la, ni daa a nya maarika a nyini wa yaalika po, ni daa a nya tuka ale Chiika, ni daa a nya yaalika ale jiirim,

² ni be basi ate m suipeentika a zuak ni ale ta popola yena ale Kirisita, ale ta wa yaalika, ale ta chiik yeŋ ale popola yena la.

³ Ni kan chim butueta nyama abe ni kan a nak kuusa a poli ayen nama zuak gaam ni chaaba, zaab m dek po, ni nya nuruba gela ayen ba gaam ni kama.

⁴ Ni kan a poli nidek ŋanta nyiini wie, alege ni a poli ni vaanchaab ale ba ŋanta jigi wie.

⁵ Ku a fɛ ate ni ta popola ŋaai chaab ate Yeezu Kirisita jam ta la:

⁶ Wa jam ka Wen alege wa kan jam a yaali ayen wa ta pagrim a soa ase wa le jam ka diila ate ba chim bunyi.

⁷ Wa jam pai wa le ka diila kama a basi ŋaaŋ alege a chim tomteerɔ ase nurubiik la.

⁸ Wa jam ka nuru waai ale seba wadek yikka la ale a zuli Wen nɔi a kpi jabarimu nyiŋ.

⁹ Dila nyiŋ ale soa ate Wen a zak wa a zaani ŋmai ale te wa yuei dii ale zuak a gaam yue meena la,

¹⁰ ate Yeezu yuenni dan wi duna meena kpi tɛŋ, wenŋmazuk po ale tɛŋzuk de ale kpiluŋ tɛŋ,

¹¹ ate noa meena a weeni ayen, Yeezu Kirisita ka Naawen, ate Kowa Wen a nya zula.

¹² Dila nyiŋla, m dek doaba, ase mi ale jam bo ale ni la, ni a zuli mi nɔi, alege yɔgyɔgla de ate mi ŋman karo ale ni la, ku magsi ka ni diema a zuli mi nɔi nalimnyiini. Ni pii nyiŋ nalimnyiini a tom wa tuimaŋa ale kpazinagsuk ate wa vari ni ni tuimbaataŋa po a basi.

¹³ Wen abe ale kasim bo ni suiniimaŋa po a tom la, wa a yaali kama ayen ni a tom wieŋa de ŋaai ale a te wa suipeentik la. Wa be a te ni pagrimu mɛ kama ate ni tom dii ate wa a yaali ayen ni tom la.

¹⁴ Ni a tom wa tuimaŋa abe ni ka a ŋuuni ale ni vaanchaaba yaase ni ta nanpaga ale chaaba.

¹⁵ Dila ale basi kama ate ni welema ni suiniima po abe ni kan ta kaasuŋ Wen nimbie po, dii nyiŋla ni ka wa bisa. Baai ale ka tuim kaasima nyam a kasim a tom tuimbaata nna yegayega la, a boro a gilim ni kama. Ni basi ate ni tuim maŋsaŋa a nyaksi ba suŋsuŋ ase chiŋmarisaŋa ale a nyaksi diila.

¹⁶ A sak ba ayen Wen a yaali kama ayen wa pai wa nyuvuri dii ale kan ta kpeglimka la a te ba. Ni daa nye dila ate Yeezu Kirisita a ŋman jam, ni le zak mi zuk a zaani. Dii nyiŋla, tuim ŋaai meena ate mi a tom a te ni la, a kan chim kayiokwa.

¹⁷ Mi a dan poom kpi nama siaka nyiŋ, ku a nye ka nna ase m pai m dek a kaab te ka Wen la. Ku be dan ka dila mi ale nama meena ta ka suipeentik.

¹⁸ Suik kula po ku a fɛ kama ate nama jam gum mi po ate ti maa chaab a ta suipeentik.

¹⁹ Ti Nyɔnɔwa Yeezu Kirisita dan te suik, ku kan beni alege ate m tom Timoti ni jigi ate wa dan ŋman pilim jam mi jigi, abe wa ta ni wie a jam paali a sak mu, ate ku te mu nyiŋbiiri.

²⁰ Wala nyiini ale bo ale mi dela ate wa niŋ a maa bo ale ni a gum mi po.

²¹ Baai ale tali bo dela ale mi la, niŋ a bo ale ka badek wie po, alege ba niŋ ka ale Yeezu Kirisita wieŋa.

²² Alege ni meena seba Timoti ale ka nuru maŋ la kama. Ni be ŋman seba mɛ mi ale wa ale a maa chaab a tom dii nna ase biik ale ka ko la a sak nuruba Wen wamaŋsaŋa wie la.

²³ Dila nyiŋla, m dan ga seba wie ale ŋa nye dii ni jigi la, m kan beni alege tom wa ni jigi ya.

²⁴ M ta siaka ale Naawen kama ayen ku kan beni alege ate mi dek a baga jam ni jigi ya.

²⁵ Mi a poli kama ayen m tom Epaforodaitus ni jigi, wa ka mi suok ale m tuimtomdɔ choa ale m tugurik tɔŋdɔ choa, waai ale ka nama me tintomdɔ la, waai ate ni tom ayen wa maari mu la.

²⁶ Wa kasim a yaali kama ayen wa ŋman jam ni jigi a nya ni. Ku jam kasim a daani wa kama wa popola po nama ale wom ayen wa jam ka nyiŋyɔgsa la.

²⁷ Ku ka wensie ayen wa ale jam kan ka nyiŋyɔgsa la, ku jam tali ka maga dega ate wa kpi, alege Wen jam ta jiirim ale wa kama ate wa ŋman nya nyiŋyɔgsa. Wen a jam ta jiirim ale mi mɛ kama, dii nyiŋla wa dan jam kpi kama mi sui te kaasi ka nna yegayega, wie ŋaai ale gilim mu a daani mu la po.

²⁸ Ka dila nyiŋ ale soa ate mi a yaali ayen m tom wa ate wa jam ni jigi yɔgyɔgla de la. Wa dan jam ate ni nya wa ni sue ale peenti abe mi mɛ dek sui kaasuŋku a bɛ.

²⁹ Wa be dan jam ni jigi ate ni nya wa, ni tuesi wa nalimnyiini ale masim ti Naawenni nyiŋ. Ni a te nuru baai meena ale a nye ase wala la zula,

³⁰ dii nyiŋ la wa pai ka wa nyuvuri da a tali maga ate wa kpi Kirisita tuimaŋa nyiŋ ayen ku te mu maari kaai ate nama dek an baga a te mi la.